Эрхэм хүндэт Монгол Улсын Ерөнхийлөгч өө,
УИХ, Засгийн газрын эрхэм гишүүд ээ,
Хүндэт зочид оо,
Өнөөдөр Монгол Улсын Ерөнхийлөгчийн дэргэд иргэдийнхээ санаа бодлыг сонсож, төр засгийн албан ёсны шийдвэрт тусгаж, төрийн ажлыг эрчимжүүлэхэд дэмжлэг үзүүлэх үүрэг бүхий олон нийтийн оролцоонд суурилсан алба-Иргэний танхим байгуулагдаж байгаа явдалд талархлаа илэрхийлье.
Эдийн засаг, нийгэм, улс төрийн аливаа асуудлаар аль ч түвшинд шийдвэр гаргахад иргэдийн дуу хоолой, тэдний санал бодлыг тусгах нь төр, иргэний хоорондын харилцаа, хамтын ажиллагаа, харилцан ойлголцол, итгэлцлийг бэхжүүлж, төрийн хууль тогтоомж, шийдвэр оновчтой гарч, үр дүнтэй хэрэгжих үндэслэл болж байдаг гэдэгтэй Та бүхэн маргахгүй бизээ.
Анхны байнгын ажиллагатай парламент байгуулагдсан цагаас эхэлж хууль боловсруулах, батлах, хууль хэрэгжих, хэрэгжүүлэх явцад Иргэний байгуулалагууд ямар үүрэг оролцоотой ажиллаж байсан бэ, тэдний жин, нөлөө хууль тогтоох үйл ажиллагаанд ямар үр дүнтэй байсан бэ гэдгийг бид тойм төдий судалж байсан. Харамсалтай нь иргэдийн оролцооны түвшин төдийлөн хангалттай байдаггүй гэсэн судалгаа гарч байсан. Энэ нь иргэдийн дуу хоолойг сонсох тогтолцооны байгууллагын бүтэц, чадавхийг бий болгож чадаагүйтэй холбоотой байна. Парламентийн төлөвшлийн маань он цагийн явцад анхаарах ёстой асуудал нь иргэдийн дуу хоолойг сонсох асуудал байжээ гэж би хувьдаа бодож байна.
Иргэдэд хууль тогтоомжийн болон Монгол Улсын Ерөнхийлөгчийн шийдвэрийн төсөлд санал бодлоо тусгуулах боломж олгож буй энэхүү Иргэний танхим байгуулах санаачлагыг Монгол Улсын Ерөнхийлөгчийн улс төрийн баг болон Тамгын газраас гаргаж, санаачилж, хэрэгжүүлж эхэлж байгаа нь төрийн байгууллагын зүгээс олон нийттэй харилцах харилцааны шинэ хэлбэрийг бий болгож, түүгээрээ бусад байгууллагад үлгэр дуурайл, засаглалын манлайлал болж байна гэж үзэж байна.
Төрийн гүйцэтгэх засаглалын байгууллагуудад хууль тогтоомжийн болон шийдвэрийн төсөл боловсруулах, тэдгээрийн хэрэгжилтийг зохион байгуулахад олон нийтийн санаа бодол, мэдээлэл, төрийн үйл ажиллагаанд тэдний зүгээс өгч буй үнэлэлт, дүгнэлт нэн чухал билээ. Энэ чиглэлээр яам, агентлаг, орон нутгийн засаг захиргааны байгууллагын түвшинд тодорхой арга хэмжээ авч хэрэгжүүлэх ажлыг хийж байгаа боловч цаашид улам боловсронгуй болгох хэрэгцээ шаардлага байгаа юм гэдгийн тойм төдий хийсэн судалгаа харуулж байсан. Ялангуяа иргэдийн нийтлэг эрх ашгийн асуудлаар олон нийтийн санаа бодлыг судлахын зэрэгцээ онцлог хэрэгцээ бүхий өвөрмөц бүлгүүдийн эрх ашигт анхаарлаа хандуулах эрэлт хэрэгцээ байгаа гэдгийг сануулж байна.
Засгийн газрын байгууллагууд иргэдийнхээ санал хүсэлт, өргөдөл, гомдлыг аман болон бичгийн хэлбэрээр, түүнчлэн цахим хуудас, шуудангаар хүлээн авах, тодорхой хууль тогтоомжийн болон бусад шийдвэрийн төслөөр зөвлөлдөх уулзалтууд зохион байгуулах, төрийн үйлчилгээний чанар, хүртээмжийн талаар мэдээлэл авах, тусгайлан судалгаа явуулах зэрэг олон арга хэлбэрийг ашиглаж байна.
Гэхдээ хууль төрөхийн өмнө, шийдвэр гарахын өмнө иргэний нийгмийн байгуулагуудтай хамтран ажиллаж байгаа бүх л хэлбэрүүдийг үндсэндээ системчилж өгөх хэрэгтэй байгаа юм. Иргэдийн санаа бодлыг сонсоод эргээд энэ иргэдийн санаа бодол маань ямар үр дүнд, ямар шийдвэрт хүрсэн байгаа юм гэдэг эргэх холбоог бий болгох тогтолцоо механизм оновчтой бий болгох шаардлага, эрэлт, хэрэгцээ байна. Бид энэ талаар одооноос эхэлж хамтын үйл ажиллагаан дээрээ ямар тогтолцоо механизмыг бий болгох вэ гэдгийг тал талаасаа бодолцож, ярилцах хэрэгтэй болов уу гэж бодож байна.
Нийгэмд тулгамдаад байгаа ажилгүйдэл, ядуурлыг буруулах арга замын талаар иргэдийн санал бодлыг судлах, тэдний оролцоотойгоор тохиромжтой, зохистой шийдэл олоход Иргэний танхимтэй Засгийн газрын зүгээс, Засгийн газрын гишүүдийн зүгээс хамтран ажиллахад нэн таатай байх болно.
Төр, засаг шийдвэрээ гаргахдаа иргэдийн дуу хоолойг сонсож, тэдний санал хүсэлтэд тулгуурладаг байх нь ардчиллын үнэт зүйлсийн нэг, төрийн бодлого оновчтой зөв байхын үндэс суурь нь гэдгийг хэн бүхэн хүлээн зөвшөөрдөг билээ. Тэгээд ч манай ард түмэн эрт дээр үеэс “бүгдээрээ хэлэлцвэл буруугүй, бүлээн усаар угаавал хиргүй” гэсэн мэргэн үгийг үеийн үед санаж явахыг үр удамдаа захиж ирсэн байх аа.
Өвгөд дээдсийнхээ сургаалийг санаж, өнөөгийн улс орнуудад өргөн хэрэглэгдэж байгаа ардчиллын хэрэгсэл, ард түмэн иргэдийнхээ төрийн гол хэрэгт оролцох оролцооны сонгодог аргыг хөгжүүлэх, төр иргэний харилцааг бэхжүүлэхэд Монгол Улсын Ерөнхийлөгчийн дэргэдэх Иргэний танхим хувь нэмрээ жинтэй оруулана гэдэгт итгэж байна.
Ингээд Та бүхэнд амжилт хүсье.
