Дэлхийн эдийн засгийн чуулга уулзалтанд оролцохоор энэ сарын 28-нд Швейцарийн Давос хотноо хүрэлцэн ирсэн Монгол Улсын Ерөнхийлөгч Цахиагийн Элбэгдорж ирсэн даруйдаа, БНСУ-ын хүлээн авалтанд оролцлоо.
Энэ үеэр, тус улсын Ерөнхийлөгч Ли Мён Бак Бельгийн угсаа залгамжлах ханхүү Филипп Брабант болон Зимбабве улсын Ерөнхий сайд М.Цювангерий нартай уулзаж ярилцсан юм.
Ерөнхийлөгч Ц.Элбэгдорж, Ерөнхийлөгч Ли Мён Бак нар саяхан Копенгагенд уулзсаны дараа дахин уулзаж байгаадаа баяртай байгаагаа харилцан илэрхийлээд, 2 талын харилцааны асуудлаар санал солилцлоо.
Энэ жил МУ, БНСУ-ын хооронд дипломат харилцаа тогтоосны 20 жилийн ой болох бөгөөд, Ерөнхийлөгч Ли Мён Бак Монгол улсад айлчлахаар төлөвлөж байгаа билээ.
Ерөнхийлөгч Ц.Элбэгдорж, Солонгос улсын хүлээн авалтын үеэр төлөөлөгчдөд хандан баяр хүргэж үг хэлэхдээ Солонгос улсын туулсан зам, хүрсэн амжилт Монгол улсын хувьд үлгэр жишээ авахуйц зам юм хэмээн онцоллоо.
Мөн өдөр Ерөнхийлөгч Ц.Элбэгдорж, “Кредит Свис” банкны удирдах зөвлөлийн дарга ноён Х.У.Дөригтэй уулзлаа. Тус банк нь Швейцарийн тэргүүлэх банкнуудын нэг бөгөөд олон жилийн өмнөөс манай улсын ижил салбартай харилцаа холбоо тогтоож, банкны мэргэжилтэн бэлтгэхэд дэмжлэг үзүүлж ирсэн билээ. Энэхүү идэвхтэй хамтын ажиллагаагаа тууштай үргэлжлүүлэх талаар энэ уулзалтанд оролцогсод санал солилцсон. Ерөнхийлөгч Ц.Элбэгдорж, ноён Х.У.Дөригийг Монгол улсад айлчилж, банк санхүүгийн салбарын талаар илтгэл тавихыг урилаа.
Мөн энэ өдөр “Рио Тинто” компанийн удирдах зөвлөлийн дарга Ж.Дю Плесси Ерөнхийлөгч Ц.Элбэгдоржид бараалхлаа.
Ерөнхийлөгч “Урт удаан хугацааны хэлэлцээр, амаргүй яриа хэлцлүүдийн дараа Оюутолгойн хөрөнгө оруулалтын гэрээ хийгдсэнээс хойш та бүхэн бидний хамтрагчид болсон. Бидний зорилго нэг юм. Төслийн үр ашиг Монгол Улсад, Монголын ард түмэнд үр өгөөжөө богино хугацаанд өгөх ёстой. Бид та бүхнийг манай стратегийн хамтрагчид гэдэгт итгэлтэй байгаа” гэлээ. Боловсролын салбарт хөрөнгө оруулалт хийж , дэлхийн түвшний мэргэжилтэн бэлтгэхэд идэвхтэй оролцохыг Ерөнхийлөгч мөн хүслээ.
Ноён Ж.Дю Плесси, удаан хугацаанд Монгол Улстай хамтран ажиллах сонирхолтой байгаагаа илэрхийлээд, боловсролыг дэмжих, ажилгүйдлийг бууруулах талаарх тодорхой төслийн хүрээнд ажиллах болно гэлээ. “Рио Тинто бол байгальд ээлтэй технологийг ашигладаг компани. Бид Монгол Улсад мөн энэ талаар үлгэр жишээ харуулах болно” гэж хэлэв.
Бусад улс орнуудад үлгэр жишээ болохуйц хамтын ажиллагааны төлөө ажиллах болно хэмээн Рио Тинто компанийн удирдах зөвлөлийн дарга ноён Ж.Дю Плесси илэрхийллээ.
