Дэлхийн эдийн засгийн чуулга уулзалтанд оролцож байгаа Монгол Улсын Ерөнхийлөгч Ц.Элбэгдорж 1-р сарын 29-ний өдөр Дэлхийн уул уурхай, металлургийн салбарын удирдагчдын уулзалтанд оролцлоо. Энэ уулзалтыг Америкийн “АЛКАО” группын захирал К.Клайнфэлд нээж үг хэлэн, Их Британийн “Чэтхэм Хаус” тинк танк байгууллагын захирал, алдарт Р.Ниблет хөтлөн явуулсан юм.
Ерөнхийлөгч Ц.Элбэгдорж, Монголын уул уурхайн салбарын хөгжил, тавигдаж байгаа зорилтуудын талаар танилцуулсан нь оролцогчдын сонирхлыг ихэд татаж, яриа хэлэлцүүлгийн голлох сэдэв нь боллоо. Монгол улс, уул уурхайн салбарын хөгжлийн дүнд бүх салбарт эдийн засгийн тэнцвэртэй хөгжлийг хангах, дэд бүтцийг хөгжүүлэх, байгалд ээлтэй технологийг нэвтрүүлэх, дэлхийн хэмжээний боловсон хүчин бэлтгэх, баялгийг эх орондоо боловсруулж, өртөг шингэсэн эцсийн бүтээгдэхүүн экспортлох зорилтууд тавьж байгааг уулзалтанд оролцогчид сайшааж байлаа.
Уул уурхайн олборлолт нутгийн иргэдийн дунд хүлээлт үүсгэдэг. Тэд орлогыг маш хурдан хугацаанд хүртэхийг, орлогын зарцуулалтын асуудалд бодитойгоор оролцохыг хүсдэг нь зүйн хэрэг бөгөөд, энэ тохиолдолд зөв бодлого, зөв зарцуулалт чухал гэдэгтэй уулзалтанд оролцогчид санал нийлж байлаа.
Хөрөнгө оруулалтын томоохон гэрээг амжилттай хийсэн Монгол улсын туршлагын талаар уулзалтанд оролцогчид асууж сонирхсон. Энэхүү уулзалтанд Рио Тинто компанийн удирдах зөвлөлийн дарга ноён Ж.дю Плесси оролцсон бөгөөд, тэрээр Оюутолгой төсөл дээр удаан хугацаанд тогтвортой ажиллах болно гэдгээ дахин илэрхийлсэн юм.
Уул уурхай, металлургийн салбарын удирдагчдын уулзалтанд дэлхийн хэмжээний томоохон компануудын удирдлага оролцлоо. Тэдний дотор, “BHP billiton”, ОХУ-ын “Северосталь”, “Базовый элемент”, “Русаль” компаниуд болон “Нью Маунт” “Гленкор” группуудын удирдлага оролцож, санал бодлоо илэрхийлсэн юм.
Уулзалтанд оролцсон Австралийн худалдааны сайд Саймон Крийн “ Би Монгол улсыг мотоциклээр туулж байсан. Тэр үед жуулчин байсан бол одоо шийдвэр гаргагчын хувиар дахин очиж үзэхийг хүч байна. Хөрөнгө оруулагчид, бизнес эрхлэгчид та бүхэн ч бас энэ гайхалтай оронд очиж уул уурхайн хөгжлийн явцыг нүдээр үзээрэй” хэмээн уриалж байлаа.
