Давост ажиллаж байгаа Монгол улсын Ерөнхийлөгч Ц.Элбэгдорж энэ өдөр, Клинтоны эдийн засгийн зөвлөх багийн тэргүүн Лоуренс Саммерстай уулзлаа.
Харвардын Их сургуулийн Ерөнхийлөгч асан тэрээр Америкийн 3 том эдийн засагчийн нэг хэмээн зүй ёсоор хүлээн зөвшөөрөгддөг юм.
Ерөнхийлөгч Ц.Элбэгдорж, эдийн засагч Л.Саммерс нар чуулга уулзалтын хүрээнд яригдаж байгаа тодорхой асуудлуудаар санал солилцлоо.
Мөн , Майкрософтын үндэслэгч Билл Гейтстэй уулзлаа.
Билл Гейтс болон түүний гэр бүл сүүлийн үед нийгэм болон боловсрол, эрүүл мэндийн салбарт идэвхтэй ажиллаж, хөрөнгө оруулж, хүмүүнлэгийн санаачлагуудыг хэрэгжүүлж байгаа билээ.
Ядуу, буурай орнуудын хүүхэд эмэгтэйчүүдийн эрүүл мэндийг хамгаалахад зориулж, ирэх 10 жилийн хугацаанд 10 тэрбум долларын хөрөнгө оруулалт хийхээ мэдэгдсэн нь Давосын үеэр болсон анхаарал татсан мэдэгдлүүдийн нэг байсан юм.
Ерөнхийлөгч, нийгэм боловсролын салбарт явуулж байгаа үйл ажиллагаагаа монгол руу чиглүүлэх, монголын залуучуудыг дэлхийн нэр хүндтэй сургуулиудад сургаж, томоохон компаниудад ажиллуулахад туслалцаа үзүүлэхийг хүслээ.
Майкрософт компанийн дэд Ерөнхийлөгч Аяалатай уулзах үеэр мөн өөр бусад тодорхой саналуудыг Ерөнхийлөгчийн зүгээс тавьсан. Тухайлбал, Майкрософт компани , монголын мэдээлэл технологийн чиглэлийн сургуулиудтай холбоо тогтоож, оюутнуудад зориулсан программуудыг шууд ашиглах боломжийн талаар ярилцав.
Монголын Мэдээлэл, харилцаа холбоо, технологийн газар, Майкрософтиын хооронд байгуулсан санамж бичигт дурдагдсан тодорхой асуудлуудыг ажил хэрэг болгох, “word 2007” программыг 2010 онд багтаан монгол хэлэнд орчуулах тухай ярилцлаа.
Монголын залуучууд, мэдээлэл технологийн салбарт дэлхийн нэр хүндтэй байгууллагуудад ажиллаж байгааг Ерөнхийлөгч дурдаад, Майкрософт мөн адил монголчуудын авьяас чадлыг үнэлж, ажиллуулж байдагт талархлаа илэрхийллээ.
Энэ өдөр Монгол улсын Ерөнхийлөгч, Харвард төгсөгчдийн клубт уригдлаа. Давосын дэлхийн эдийн засгийн чуулга уулзалтыг үндэслэгч К.Шваб нь Харвардын төгсөгч бөгөөд, давост өөр бусад төгсөгчид мөн олон цугларчээ.
Харвардын их сургуулийн Ерөнхийлөгч, Монгол Улсын Ерөнхийлөгчийг хүндэтгэн уулзахдаа, төгсөгч нараараа бахархаж байгаагаа хэлээд, төрөлх сургуульдаа дахин ирж зочлохыг урилаа. “ Харвард гэр бүл бол дэлхийн лидер гэл бүл байх ёстой” хэмээн уригдан ирсэн төгсөгчид санал нэгтэй хэлж байлаа.
Мөн энэ үдэш, Монгол улсын Ерөнхийлөгч Давост ажиллаж буйтай холбогдуулан Монгол Улсаас ШХ-нд суугаа Онц бөгөөд Бүрэн эрхт Элчин сайд Л.Оргил хүндэтгэн зоог барив. Зоогт , монгол улстай идэвхтэй хамтран ажилладаг, хөрөнгө оруулж, бизнесийн үйл ажиллагаа эрхэлдэг, мөн цаашид хөрөнгө оруулах сонирхолтой 100 гаруй зочин ирсэн нь, Монгол улс олон улсын улстөрчид болон хөрөнгө оруулагчдын анхаарлыг татаж байгаагийн илрэл боллоо.
Тэдгээрийн дотор Францын “Арева” групп, Энэтхэгийн “Миддл” компанийн удирдлагууд хамтран ажиллах сонирхолтой байгаагаа дахин илэрхийллээ. Уригдан ирсэн зочдод, Ерөнхийлөгчийн Тамгын газар болон ГХ-ны яамны хамтран бэлтгэсэн “Монголика” сэтгүүл, монголын тухай дэлгэрэнгүй сурталчилсан “Экономист” сэтгүүл, МУ-ын Ерөнхийлөгч ярилцлага бүхий “First” сэтгүүлүүд, мөн урлагийн тоглолт, морин хуур, хөөмийн аялгуу, уран нугаралтын гайхамшигууд монгол улсын тухай сонирхолтой сурталчилгаа болж байлаа.
