Швейцарийн Давос хотноо дэлхий нийтийн анхаарал хандаж байна.
Шийдвэр гаргагчид, эдийн засагчид, эдийн засгийн гол тоглогчид хямралын дараах эдийн засгийн чиг хандлагыг хэрхэн харж байгааг энэ уулзалт харуулж байгаа юм.
Чуулга уулзалтын хүрээнд мөнгө санхүү, эдийн засагтай холбогдох бүх асуудлаар салбар хуралдаанууд болж байгаа. “Эдийн засаг ба хүмүүнлэг байдал” “эдийн засаг ба ёсзүй” гэхчилэн шинэ хандлагууд хүчтэй гарч ирж байгаа нь хэлэлцүүлгүүдийн явцаас харагдаж байна.
Оролцогчдын анхаарлыг татсан нэг салбар хуралдаан нь “ Уул уурхайн салбарын хөрөнгө оруулалтын загвар гэрээ”-ний асуудлаар болсон хурал байлаа.
Уул уурхайн салбарт хийгдэж байгаа гэрээнүүд олон улсын түвшний хүлээн зөвшөөрөгдсөн, загвар гэрээ байх ёстой гэдэгтэй энэ салбар хуралдаанд оролцогчид санал нэг байсан юм.
Уг хуралдаанд Монгол улсын ГХ-ны сайд Г.Занданшатар оролцсон. Тэрээр Оюутолгойн хөрөнгө оруулалтын гэрээг байгуулсан монгол улсын туршлага, мөн загвар гэрээ бий болгох талаар Монгол Улсын Ерөнхийлөгчийн гаргасан санаачлагыг танилцууллаа.
Дэлхий даяар, уул уурхайн гэрээ хэлэлцээрийн нэгдсэн загвар бий болгох талаар ярилцаж, гэрээнд оролцогч талууд болох Засгийн газрууд, хөрөнгө оруулагчдаас гадна орон нутгийн иргэд болон төрийн бус байгууллагуудын оролцоо ямар түвшинд байх, хөрөнгө оруулагчид тэдэнтэй ямар түвшинд хэрхэн харилцах гэх мэт өргөн хүрээнд асуудлыг олон талаас нь нухацтай ярилцлаа.
Уул уурхайн салбарт хөрөнгө оруулалт нь бүхэл бүтэн цогц харилцаа бөгөөд, хөрөнгө оруулагчийн ёсзүй, нутгийн иргэдийн оролцоо, орлогын хуваарилалт, төрийн бус байгууллагуудын харилцаа, хэвлэл мэдээллийн оролцоо, хяналт гэх мэт олон асуудал ил тод байж гэмээ нь, энэ харилцаа амжилттай болдог гэдгийг туршлагатай олон эдийн засагчид, уул уурхайн салбарынхан хэлж байсан.
Уг хуралдаанд Лондонд төвтэй олон улсын уул уурхайн холбооны тэргүүн Энтони Хож, Австралийн худалдааны сайд Саймон Крийн, болон уул уурхайн салбарын том хөрөнгө оруулагчид оролцлоо.
Лондонгийн Олон Улсын уул уурхайн холбоо Давостой хамтран энэ 2010 ондоо багтаж, хөрөнгө оруулалтын загвар гэрээний асуудлаар хэд хэдэн уулзалтуудыг хийхээр болов.
Түүний дотор Монгол Улсын Ерөнхийлөгчийн гаргасан санаачлагын дагуу, монгол улсад уулзалт семинар хийх боломжийг судлахаар боллоо.
