Монгол Улсын Ерөнхийлөгч Ц.Элбэгдорж энэ өдөр Жорж Соростой уулзсан. Өнгөрсөн оны 9-р сард Нью-Йорк хотод уулзсаны дараа ийнхүү дахин Давост уулзаж, тодорхой асуудлаар санал солилцлоо. Тухайлбал, уул уурхайн ил тод байдал, орлогын зөв зарцуулалт, мөн хөрөнгө оруулалтын загвар гэрээ байгуулах тухай зэрэг асуудлуудыг хөндсөн юм. Жорж Соросын илгээсэн судалгааны тусгай баг өнгөрсөн 1-р сард манай улсад ирж ажилласан бөгөөд, тэдний ажлын үр дүнд сэтгэл хангалуун байгаа гэж ноён Ж.Сорос ярилаа.
Ерөнхийлөгч, ардчилал тогтсоноос хойш манай улсад үзүүлж ирсэн хамгийн бодитой туслалцаанууд бол Жорж Соросын Нээлттэй нийгэм хүрээлэнгээр дамжин хэрэгждэг төсөл хөтөлбөрүүд гээд, энэ удаад ч мөн хөрөнгө оруулалтын загвар гэрээ байгуулах асуудалд анхаарлаа чиглүүлж байгаад талархлаа илэрхийллээ.
Ноён Жорж Сорос энэ зун монголд ирж амрах бодолтой байгаагаа илэн далангүй, халуун дотно ярианыхаа үеэр хэлж байлаа.
