2010 оны 2 дугаар сарын 1-ний даваа гаригт Монгол Улсын Ерөнхийлөгчийн Тамгын газрын дарга Д.Дорлигжав хэвлэл мэдээллийн төлөөлөгчидтэй уулзаж Монгол Улсын Шинэ Ерөнхийлөгч тангараг өргөснөөс хойшхи зургаан сарын дотор нийгэмд болсон онцлох үйл явдлуудын талаар сэтгүүлчдийн асуултанд нээлттэй хариулсан юм.
Дээрх уулзалтын үеэр яригдсан сэдвүүдээс нэгэн сонинд ташаа нийтлэл гарсан байх тул зохих тайлбар хийж байна.
Тухайлбал, ЕТГ-ын дарга өнгөрсөн зургаан сарын хугацаанд тодорхой асуудлууд дээр байр сууриа илэрхийлж ирсэн бөгөөд хэвлэлийнхэнтэй тэр бүр нээлттэй асуулт хариулт, чөлөөт ярилцлага зохион байгуулж байгаагүй бөгөөд тус уулзалтанд хэвлэл мэдээллийн төлөөлөгчид хүссэн асуултандаа хариулт авсан болно. Харин үүнийг нь зургаан сарын тайлан тавьсан мэтээр зарим нэгэн хэвлэл ташаа мэдээлсэн болохыг онцолж байна.
Мөн “С.Зориг агсны хэргийг хаах хэрэгтэй гэх агуулгатай” гэж ЕТГ-ын даргыг хэлсэн хэмээн таамаглал мэдээ нийтэлсэн нь ор үндэсгүй юм. Харин ЕТГ-ын дарга Д.Дорлигжав нь “С.Зоригийн хэрэг гэх хэргээр улс төрийн тоглоом, хонжоо хайсан явдал их явагдсан. Одоо ч гэсэн энэ нь ямар нэгэн хэмжээгээр тасраагүй байна. Үүнийг зогсоох хэрэгтэй”-г онцолсон болно.
