Айлчлалынхаа хоёр дахь өдөр Ерөнхийлөгч Ц.Элбэгдорж, Европын зөвлөлийн Ерөнхийлөгч Ван Ромпуйтай уулзлаа.
Европын зөвлөлийн анхны Ерөнхийлөгчөөр сонгогдсон ноён Ван Ромпуй нь Монгол Улстай үр бүтээлтэй, идэвхтэй хамтран ажиллахыг тууштай дэмждэг нэгэн юм. Тэрээр, Лиссабаны гэрээний дагуу Европын зөвлөл шинэ үүрэг хариуцлага хүлээх болсон талаар дурдлаа. Европын Холбооны зүгээс Монголд ардчиллыг бэхжүүлж, эдийн засгийг эрчимтэй хөгжүүлэхэд ямагт дэмжиж, хамтран ажиллах болно гэдгээ Европын холбооны бусад удирдлагын адил илэрхийллээ.
Ерөнхийлөгч Ц.Элбэгдорж, хүлээн авч уулзаж байгаад нь ноён Ван Ромпуйд талархаад, МУ-ын Ерөнхийлөгчийн хувьд улс орондоо ардчиллыг хөгжүүлэх, хүний эрхийг хамгаалах эрхзүйн үндсийг бэхжүүлэхэд улам бүр анхаарах болно гэдгээ хэлэв. Энэ чиглэрээр хийсэн тоймтой алхам болох, цаазаар авах ялыг түр хугацаагаар зогсоосон явдлыг Европын холбоо дэмжсэнд талархаж байгаагаа онцоллоо.
Саяхан Улаанбаатарт, хоёр талын хооронд байгуулахаар зэхэж буй Түншлэл, Хамтын ажиллагааны Хэлэлцээрийн эхний шатны уулзалт амжилттай болсонд баяртай байгаагаа уулзалтанд оролцогсод нотоллоо.
Европын зөвлөлийн Ерөнхийлөгч энэхүү хэлэлцээрийг байгуулах болон Монгол Улсад зах зээлийн эдийн засгийн статус олгоход дэмжлэг үзүүлэхээ илэрхийллээ.
Энэ уулзалтын үеэр Ерөнхийлөгч Ван Ромпуй, 2001 онд манай улсад хувийн шугамаар ирж амарч байсныгаа дурслаа. Тэрээр, монгол орны тухай асууж сонирхож байсан. Ерөнхийлөгч Ц.Элбэгдорж, Ерөнхийлөгч Ван Ромпуйг тааламжтай цагтаа монголд айлчлахыг урилаа.
Энэ оны 1-р сарын 1-ээс Европын зөвлөлийн Ерөнхийлөгчөөр сонгогдон ажиллаж байгаа Ван Ромпуйн анхны гадаад орны /Европын Холбооны гишүүн бус/ төрийн тэргүүн зочин нь Монгол Улсын Ерөнхийлөгч болж байгаа юм байна.
Ийнхүү Европын холбоонд айлчилсан богино хугацаанд, Европын парламентын дарга И.Бүзек, Европын комиссын Ерөнхийлөгч Х.М.Барросо, Европын зөвлөлийн Ерөнхийлөгч Ван Ромпуй нар гурвуулаа Монгол Улсын Ерөнхийлөгчтэй уулзан, харилцааг улам бүр өргөжүүлэн хөгжүүлж, шинэ шатанд гаргахыг төлөө байгаагаа нэгэн зэрэг илэрхийлсэн нь Европын холбооны зүгээс Монгол Улсад үзүүлсэн том хүндэтгэл, хамтын ажиллагааны цаашдын өнгийг тодорхойлсон алхам боллоо гэж энэ айлчлалын хүрээнд ажилласан гадаад харилцааны сайд болон элчин сайдууд дүгнэж байна.
