МУ-ын Ерөнхийлөгч Ц.Элбэгдоржийг Швейцарийн Давос хотноо болсон Дэлхийн эдийн засгийн чуулга уулзалтанд оролцож, Европын Холбоонд айлчлах үеэр Монгол Улсын Ерөнхийлөгч цаазаар авах ялаас түдгэлзэж, уг ялыг бүрмөсөн халах байр суурьтай байгаагаа мэдэгдсэнд талархаж, олон иргэний нийгмийн төлөөлөл, хүний эрхийн байгууллагууд уулзаж байлаа.
Тухайлбал, Швейцарийн хөгжил, хамтын ажиллагааны агентлагийн удирдлагууд МУ-ын Ерөнхийлөгчтэй уулзах үеэрээ энэ сарын 24-26-ны өдөр Женевт болох “Цаазлах ялын эсрэг” дэлхийн 4 дүгээр конгресст оролцож үг хэлэх албан ёсны урилгыг гардууллаа. Энэхүү бага хурлыг Швейцарийн Засгийн газрын дэмжлэгтэйгээр, НҮБ-ын Хүний эрхийн комисс зохион байгуулдаг бөгөөд, “Эмнести Интернэшнл” “Death penalty focus” “Human right watch” зэрэг хүний эрхийн чиглэлээр ажилладаг дэлхийн 100 гаруй байгууллагууд оролцох юм байна. Уг хуралд Европын Холбоог төлөөлөн уг холбоог одоо тэргүүлж буй Испани Улсын Ерөнхий сайд Л.Р.Сапатиро, Швейцарийн гадаад хэргийн сайд М.Калми-Рей зэрэг улстөрчидөөс гадна Иран Улсын иргэн Нобелийн энхтайвны шагнал хатагтай Ширин Эбади нарын хүмүүс оролцох ажээ.
Мөн “Цаазаар авах ялын Европын холбоо” ТББ-ын Европын асуудал хариуцсан захирал М.М. Зүппи Брюссель хотноо МУ-ын Ерөнхийлөгчид бараалхаж, цаазаар авах ялыг бүрмөсөн халах байр суурьтай байгаад нь талархал илэрхийлж, энэ оны 5-р сард Италийн Ром хотноо зохион байгуулах “Цаазаар авах ялын эсрэг хамтдаа” Олон Улсын холбооны хуралд гол илтгэгчээр оролцохыг урив.
Олон улсын энэхүү ТББ нь дэлхийн 75 оронд салбартай, хүний эрхийн чиглэлээр идэвхтэй ажилладаг байгууллага бөгөөд, дээрх олон улсын бага хурлыг 4 дэх удаагаа зохион байгуулж байгаа юм байна.
Ноён М.М.Зүппи “Эрхэм Ерөнхийлөгч таны парламентдаа хандаж хийсэн мэдэгдэл, хэлсэн үгийг бид бүх гишүүн орнууддаа тараасан. Сүүлийн 20 жил цаазаар авах ялыг халах талаар хийсэн бүх мэдэгдүүдийн дотроос хамгийн ул суурьтай, судалгаа баримт сайтай, хүний эрхийг дээдэлсэн үг боллоо гэж бид дүгнэж байгаа. Ийм учраас Таныг Ром хотод ирж, хурлын индэр дээрээс, дэлхийн бүх орнуудад хандан цаазаар авах ялыг бүрмөсөн халах талаар үг хэлэхийг урьж байна” гэлээ.
