Европын Холбоонд айлчлах үеэрээ Монгол Улсын Ерөнхийлөгч Ц.Элбэгдорж, айлчлалын 2 дахь өдөр Европын комиссын Ерөнхийлөгч Х.М.Барросотой уулзлаа.
Өнгөрсөн онд НҮБ-ын Дээд хэмжээний уулзалтын үеэр хамтран хурал даргалж байсан, мөн Данийн Копенхаген хотноо уулзаж ярилцаж байсан хоёр Ерөнхийлөгч халуун дотноор уулзалдаж, хоёр талын харилцаа хамтын ажиллагааны талаар өргөн хүрээнд ярилцлаа.
“Манай улс ардчилал, зах зээлийн эдийн засагт шилжсэн үеэс хойш биднийг тууштай дэмжиж, хамтран ажиллаж ирсэн Европын холбоонд талархлаа илэрхийлье. Монгол Улс, Европын Холбоотой Түншлэл, Хамтын ажиллагааны Хэлэлцээр байгуулахаар ажиллаж байгаа бөгөөд, энэ хэлэлцээр нь бидний хамтын ажиллагааг шинэ шатанд гаргах чухал баримт бичиг болно гэдэгт би итгэлтэй байна.
Европын Холбоо нь шинэ эрч хүчээр ажиллаж, өөрийн 27 гишүүн орон төдийгүй, хүн төрөлхтөний өмнө тулгараад байгаа сорилтуудыг гэтлэн давахад чухал үүрэг гүйцэтгэж байна. Дэлхийн улс төрийн тавцанд Европын Холбооны нөлөөгөөр шинэ уур амьсгал бүрдэж байгаа нь улам бүр тодорхой харагдсаар байна” гэж Монгол Улсын Ерөнхийлөгч Ц.Элбэгдорж ярилаа.
Ерөнхийлөгч Х.М.Барросо, Монгол Улсын Ерөнхийлөгчийг дэлхий дахины арга хэмжээнүүдэд идэвхтэй оролцож байгааг сайшаагаад, Монгол Улс олон улсын анхаарлыг зүй ёсоор татаж байгаа бүс нутаг гэдэг нь улам бүр нотлогдсоор байна гэлээ. “Монгол Улсад ардчилал, хүний эрхийг ханган баталгаажуулах, чадавхийг нэмэгдүүлэх, сайн засаглалыг тогтооход Европын Холбооны зүгээс өгч байсан дэмжлэг туслалцаа үр дүнгээ өгч байсанд баяртай байна. Бидний байгуулах Түншлэл, хамтын ажиллагааны хэлэлцээр амжилттай урагшилж байгаа бөгөөд, энэ ондоо багтаад бид хэлэлцээрт гарын үсэг зурна гэдэгт найдаж байна” гэж тэрээр ярилаа.
“Саяхан Монгол Улсын Ерөнхийлөгч цаазаар авах ялыг бүрмөсөн халах талаар парламентдаа хандан мэдэгдэл хийснийг манай Европын Комисс маш талархан хүлээж авсан. Хэдийгээр Ерөнхийлөгч таны энэ шийдвэр амаргүй байсан боловч, ирээдүйг одооноос харсан, хүний эрхийг дээдэлсэн маш зоригтой, зөв алхам болсон гэдгийг тэмдэглэн хэлмээр байна. Европын комисс үүнд шуурхай мэдрэмжтэй хандаж, дэмжиж байгаагаа хамгийн анх илэрхийлэн, мэдэгдэл гаргасан билээ. Таны энэ шийдвэрийг тууштай дэмжиж байгаагаа дахин өөрийн биеэр нотлон хэлэхийг хүсч байна” гэж Европын комиссын Ерөнхийлөгч Х.М.Барросо онцлон ярив.
Европын комиссын Ерөнхийлөгч, Давост болсон эдийн засгийн чуулга уулзалт, түүн дэх Монгол Улсын оролцоо, Монгол Улсад үүсээд байгаа өвөлжилтийн хүндрэл, Монгол Улсын Ерөнхийлөгчийн гаргаж байгаа шийдвэр, хэрэгжүүлж байгаа үйл ажиллагааны талаар асууж харилцан ярилцлаа.
