Эрхэм хүндэт зочид төлөөлөгчид өө,
Эрхэмсэг хатагтай ноёд оо,
Женев хотноо зохиогдож буй “Цаазаар авах ялын эсрэг дэлхийн дөрөвдүгээр конгресс”-ийн зохион байгуулагчид, нийт оролцогчид, энэхүү конгрессийг дэмжигч хүн бүхэнд талархал илэрхийлж ард түмнийхээ нэрийн өмнөөс болон хувиасаа мэндчилгээ дэвшүүлж байна.
Юуны өмнө энэ удаагийн конгресст намайг илтгэгчээр урьсанд талархаж байна. Харамсалтай нь цаг хугацааны хувьд миний бие оролцох боломжгүй болсондоо хүлцэл өчье. Гэвч би өөрийн төлөөлөгчид, судалгааны багаа илгээсэн болно.
Цаазааар авах ялын эсрэг энэ удаагийн дэлхийн конгрессийн зорилго, үзэл санаа өмнө нь Старсбург, Монтреал, Парис хотуудад зохиогдсон конгрессуудынхаа амжилтыг бататгаж “Цаазаар авах ял”-ыг дэлхий даяар бүрмөсөн халахад шийдвэртэй алхам болно гэдэгт би итгэл төгс байна.
Өнөөдрөөс яг 40 өдрийн өмнө, Монгол оронд ардчилсан хувьсгал өрнөсний 20 жилийн ой, Ардчилсан Үндсэн хуулиа баталсны 18 жилийн ойг тус тус тохиолдуулан миний бие ард түмэндээ болон парламент, засгийн газар, дэлхийн олон улсад хандаж Монгол Улсад цаазаар авах ялыг түдгэлзүүлж хориг зарлаж буйгаа мэдэгдсэн билээ.
Монгол Улсад цаазаар авах ялыг халах үндэслэлээ миний бие 8 бүлэг шалтгаан, 2 чухал онцгой нөхцөл, нийт 10 аргументд тулгуурлан дэвшүүлсэн билээ.
Улмаар 2010 оны эхний хагаст багтаан тус ялыг бүрмөсөн халахын тулд, парламентаар хэлэлцүүлж эрүүгийн хуулинд өөрчлөлт оруулахын төлөө идэвхитэй ажиллаж байна.
Монгол Улсад мораториум зарласантай холбогдуулан НҮБ, Европын холбоо болон дэлхийн олон орны засгийн газрууд, төрийн тэргүүд, мөн олон улсын байгууллагуудаас энэхүү шийдвэрийг маань дэмжсэн халуун дотно захидал, мэндчилгээ ирүүлсээр байгаад баяртай байна.
Цаазаар авах ялыг халах үйл явцыг төр нь санаачилж, төр нь ухуулж, төр нь үлгэр жишээ үзүүлж, төр нь хөтөлж шийддэг асуудал. Тийнхүү Монголын төр цаазаар авах ялыг бүрмөсөн халахын төлөө итгэл үнэмшилтэй тууштай ажиллахад Та бүхний бидэнд үзүүлж буй үзэл санааны дэмжлэг хамгийн хүчтэй дэмжлэг болж байна.
Цаазаар авах ялыг бүрэн халахын төлөөх бодлого маань Монголын ард түмний 20 жилийн өмнө хийсэн түүхэн сонголттой, манай улсын хүний эрх, ардчиллыг дээдэлсэн зам мөр, зорилготой бүрнээ нийцнэ гэж би үзэж байна.
Монгол Улсын төрийн тэргүүний хувьд би эхлүүлсэн энэ ажлаасаа ухрах, буулт хийх ямар ч бодол алга. Учир нь энэ бол зөв, ариун, шударга зорилт юм. Ирэх 2011 онд Монгол Улс тусгаар тогтнол, эрх чөлөөгөө сэргээн тогтоосныхоо 100 жилийн ойг тэмдэглэнэ. Аливаа орны эрх чөлөөт, бие даасан байдал тухайн орны иргэдийнх нь эрх чөлөө, бие даах чадвараар хэмжигдэх нь бий.
Монгол Улс бол түүхийн ч, эрх чөлөөний ч хувьд эрхэмсэг дүр төрхтэй орон. Иргэд нь ч ийм орон. Иймээс би цаазаар авах ялын тухай яриаг Монгол Улсад үүрд мартахыг хүсэж байна.
Энэ удаагийн Цаазаар авах ялын эсрэг дэлхийн дөрөвдүгээр конгрессийн зорилго ч тус ялыг бүрэн халах бидний бодлогыг хүчирхэгжүүлэх сайн хөшүүрэг гэж бодож байна.
Энэхүү арга хэмжээг зохион байгуулж буй, зохион байгуулахад оролцож буй бүхий л байгууллага, засгийн газрууд, төрийн бус байгууллагууд, хувь хүмүүст дахин амжилт хүсээд хүн төрөлхтөний амьд явах эрх чөлөө, эрхэмсэг байдлыг дээдэлсэн дэлхий нийтийн гэрэлт ирээдүйг цогцлоох Та бүхний зүтгэл бүхэн биелж байхыг ерөөж байна.
МОНГОЛ УЛСЫН ЕРӨНХИЙЛӨГЧ
ЦАХИАГИЙН ЭЛБЭГДОРЖ
2010 оны 2 дугаар сарын 26
