Ерөнхийлөгч Ц.Элбэгдорж Ховд аймгийн Ховд хотын иргэд хөдөлмөрчидтэй уулзав.
Хөдөө орон нутагт томилолтоор ажиллаж байгаа Ерөнхийлөгч Ц.Элбэгдорж Баянхонгор, Завхан, Говь-Алтай, Ховд аймгуудад ажиллаад байна. Тэрээр 3-р сарын 1-ний орой Ховд аймгийн Ховд хотод очингуутаа аймгийн иргэд хөдөлмөрчидтэй уулзсан юм.
Уулзсан газар бүрт Монгол Улсын Ерөнхийлөгчөөс нутгийн иргэд цаг үеийн хүндрэлийг даван туулахад тусламж дэмжлэг үзүүлэх тухай асууж, саналаа хэлж ярилцахаас гадна хөгжлийн чиглэлийн олон асуултуудыг асууж хариулт авч байлаа.
Хамгийн их хүсэн хүлээж байгаа асуудлуудын нэг нь өрхийн эдийн засагт хүнд дарамт учруулж байгаа оюутны сургалтын төлбөрийн асуудал байна. Баруун хязгаар нутгийн иргэд хүүхдээ Улаанбаатарт их дээд сургуульд сургахын тулд байгаа малаа банкны зээлийн барьцаанд тавьдаг, эсвэл зарж борлуулаад хотоо харлуулах шахам үлддэг. Сургалтын төлбөр, байр хоолны зардал гээд нэг оюутанд доод тал нь 2 сая төгрөг зарцуулдаг байна. Гурван хүүхдээ оюутан болгосон айл ядууралд хүрэх нь , дахиад дараа жил сургаж чадахгүй боллоо гэж санаа зовон хэлж байна.
Ийм хүнд нөхцөл байдалд байгаа баруун нутгийн иргэдийн хувьд Монгол Улсын Ерөнхийлөгчийн санаачилсан “Оюутны тэтгэмжийн тухай хууль” сайхан мэдээ болж байгааг иргэд талархан хэлж байлаа.
Энэ хуулийн төслөөр бол, оюутны сургалтын төлбөрийн 50%-ийг төрөөс даах бөгөөд, сурлагын онцгой сайн амжилт гаргасан оюутны төлбөрийг бүрэн даах юм. Төрийн албан хаагчдын хүүхдэд үзүүлдэг хөнгөлөлт хэвээр байх бөгөөд, төгсөгдчийн ажлын байр, дээд боловсролын чанар зэрэг асуудлыг цогцоор нь шийдэх хууль болох юм.
Хуулийн төслийг боловсруулахын өмнө ажлын хэсэг тусгай судалгаа хийсэн бөгөөд, энэ судалгаанд баруун бүсийн иргэд ч хамрагдсан билээ.
Энэ хууль батлагдвал олон өрхийн эдийн засагт дэмжлэг болж, олон айл ядуурлаас гарч, дээд боловсролын чанар сайжирч, төгсөгчид ажлын байрны асуудалд санаа зовох зүйлгүй болно гэдэгт итгэж байгаагаа иргэд малчид илэрхийлж байлаа.
Ховд хотын иргэд уулзалтын үеэр тулгамсдан бусад асуудлаа танилцууллаа. Тухайлбал, уур амьсгалын өөрчлөлтөнд дасан зохицох мал аж ахуйн шинэ бодлого хэрэгтэй болжээ гэдгийг малчид ойлгох болжээ.
Төрийн үйлчилгээ улам бүр муудаад байгаа, гурван хүнтэй байгууллагын дарга 30 сая төгрөгний үнэтэй машин унаж байна гэж шүүмжилж байна. Ховдчууд мөн бусад баруун аймгийнхны адил бүсийн нэмэгдэл хэзээ өгч эхлэхийг хүлээж байна.
Ерөнхийлөгч энэ бүх асуудалд хариу өгч ярилцсаны дараа Увс аймгийг зорилоо.
