3-р сарын 2-ны өдөр Монгол Улсын Ерөнхийлөгч Увс аймгийн төв Улаангом суманд иргэдтэй уулзалт хийлээ.
Увс аймгийн удирдлага орон нутагт тулгамдаж байгаа асуудлаар дорхи тодорхой саналуудыг тавив. Юуны өмнө ажилгүйдэл ядуурал, шилжилт хөдөлгөөнийг бууруулахад хувь нэмрээ оруулна гэж үзэж байгаа бүсийн нэмэгдлийг олгох, баруун бүс нутагт үндэсний үйлдвэрлэл, хөдөө аж ахуйн бүтээгдэхүүн боловсруулах үйлдвэр хөгжүүлэх хөтөлбөрийн төсөл, хөнгөлөлттэй зээлд хамруулах хүсэлт тавилаа. Мөн Улаангом-Тосонцэнгэл, Улаангом-Ховд чиглэлийн хатуу хучилттай замын ажлыг 2010 оноос эхлүүлэх, Боршоо-Хандгайтын хилийн боомтыг олон улсын статустай болгож худалдаа, эдийн засгийн чөлөөт бүс болгох асуудлыг шийдвэрлэх, иргэний агаарын тээврийн үнэ тарифыг хөнгөлөх хүсэлтэй байна. Өнөөдөр Увс-Улаанбаатрын хооронд талдаа 250 мянган төгрөгөөр нисдэг юм байна. Түүнчлэн ОХУ-аас Монголд Тува улсаар дамжин орж ирэх төмөр замыг Улаангомоор дайруулан тавих асуудлыг холбогдох газарт нь тавьж шийдвэрлүүлэхэд дэмжлэг хүсэв.
Мал сүргийн тоо өсөөд байдаг, гэтэл манай улс хөрш орнуудад эрүүл ахуйн шаардлага хангахгүй байна гэдэг шалтгаанаар мах, махан бүтээгдэхүүн экспортолж чадахгүй байгаад төр засаг ямар арга хэмжээ авах вэ гэдэг асуулт уулзалт бүр дээр хөндөгдөж байсан.
Махны экспортын асуудлыг шийдэхийн тулд юуны өмнө мал эмнэлгийг сайжруулах , эрүүл ахуйн шаардлага хангасан мах бэлтгэдэг болох нь үнэхээр тулгамдаж байгаа асуудал мөн. Цаашдаа төрийн оролцоотой мал эмнэлгийг бий болгох, төрийн хяналтыг энэ салбарт чангатгах зэрэг арга хэмжээ авахаар төлөвлөж байгаа гэдгийг уулзалтанд оролцсон албаны хүмүүс хэллээ.
Атрын гуравдугаар аян төвийн бүсүүдэд амжилттай хэрэгжсэн, одоо баруун аймгуудад онцгой анхаарч, газар тариалан эрхлэхэд нь дэмжлэг үзүүлэх хэрэгтэй байна гэж иргэд хүслээ.
Уулзалт бүр дээр иргэдийн хариулт авахыг хүсч байсан нэг асуудал бол 1 сая, 1.5 сая төгрөгийн амлалтын асуудал байлаа. Нэгэнт амласан учраас өгөхийг шаардаж байна гэж иргэд хэлж байгаа ч, дахиж бэлэн мөнгөний амлалт өгөхийг хатуу эсэргүүцэж байна. Ерөнхийлөгч мөн ийм байр суурьтай байгаагаа хэлж байв. УИХ-ын намрын чуулганы үеэр төсвийн талаар үг хэлэхдээ, бэлэн мөнгөний амлалтыг хуулиар хориглох байр суурьтай байгаагаа илэрхийлж байсан билээ.
76 тэрбум төгрөгийг иргэд эсэргүүцэж байна, жижиг дунд үйлдвэрийг дэмжсэн зээл янз бүрийн шалгуур хэлсэн шалтгаар эзэддээ очихгүй байна, Тайширын усан цахилгаан станц тооцоо судалгаан дээрээ алдсан бол тэр хүмүүст нь хариуцлага тооцох хэрэгтэй гэдэг саналуудыг иргэд хэллээ. Мөн төрийн албаны хүмүүсийн хойрго, хүнд сурталтай байдлыг хүчтэй шүүмжилж байлаа. Ерөнхийлөгчийн санаачлагаар байгуулагдсан Иргэний танхим шиг бүтцийг орон нутагт ажиллуулахыг иргэд хүсч байна.
Увс аймгийн хил дагуу байрлалтай зарим сумдын засаг дарга нар хилийн тусгай бүс гэдэг 15 км бүст мал оруулж, хүнд байгаа энэ нөхцөлд хаврыг дуустал түр мал идэшлүүлж болох эсэхийг асуулаа. Энэ асуудлаар Ерөнхийлөгч хилийн цэргийн удирдах хүмүүстэй газар дээр нь ярьж, түр хугацаагаар журам гаргах тухай ярилцлаа.
