Монгол Улсын Ерөнхийлөгч Ц.Элбэгдорж, Орхон аймгийн иргэдтэй уулзах үеэр үг хэлж, санал бодлоо илэрхийлсэн иргэдийн бараг гуравны хоёр нь аймгийнхаа хууль шүүхийн байгууллагын үйл ажиллагааг шүүмжиллээ.
Нөхөр нь үйлдвэрийн хортой нөхцөлд ажилласны улмаас, дүү нь үйлдвэрийн ослоор тус тус нас барсан хэрэг, хүү нь 2 гар утасны хулгайд буруутгагдаж 8 жилийн ял авсан хэргүүдийн үнэн мөнийг олохоор 10 шахам жил шүүхийн үүд сахиж байгаа эмэгтэй цөхрөнгөө баржээ. “Олон жил шүүхийнхэнтэй нүүр тулж байгаа болохоор энэ хүмүүс ядарсан хүнд болон мөнгөтэй эрх мэдэлтэй дарга нарт ямар ялгаатай үйлчилдгийг мэддэг болсон. Манай аймагт авилга хээл хахууль газар авсан” гээд Ерөнхийлөгчид шударга ёс тогтоож, шүүхийг шинэчлэх ажлаа тууштай, мохошгүй хийгээрэй гэж хүсэв.
Шударга ёс алдагдаж байгаа тухай олон баримттай үйл явдлуудыг иргэд Ерөнхийлөгчид ярьж байсан учраас Ерөнхийлөгч, шударга ёс тогтоож, шүүхийг шинэчлэх чиглэлээр хийж хэрэгжүүлэх ажлаа дэлгэрэнгүй танилцуулсан.
“Хууль шударга ёсыг сахиулахтай холбоотой асуудал бол амин чухал. Энэ чиглэл рүү онцгой анхаарал хандуулж ажиллах шаардлага байгаа. Хийе гэсэн чин зориг, хүсэл надад байна. Ний нуугүй хэлэхэд, зарим салбарыг удирдан ажиллаж байгаа хүмүүсийн итгэл үнэмшил сэтгэлд хүрэхгүй тал байгаа. Та бүхэн ч бас сэтгэл дундуур байгаагаа илэрхийлж байна.
Хуулийн заалтаар дархлаа бий болгочихоод, ажлын хариуцлага алдсан хүмүүст хариуцлага тооцохгүй байгаа. Хуулийн байгууллагын үйл ажиллагааг, өөрчлөхийн тулд эхлээд хуулийг өөрчлөх хэрэгтэй. Бид хуулийн төсөл дээрээ ажиллаж байна” гэж Ерөнхийлөгч ярилаа. Хууль, шүүхийнхэнд хандан, хүний эрхийг хүндэтгэж ажиллахыг захив.
Эрдэнэтчүүд аймгаа хотын статустай болгох хүсэлтэй байгаагаа уулзалтын үеэр хэлж байсан.
Цаазаар авах ялд тавьсан хориг, дээд боловсролын санхүүжилт, суралцагчдын тэтгэлэг тэтгэмжийн тухай хууль, төсвийн тухай хууль болон үндэсний өв соёлыг уламжлуулах чиглэлээр Ерөнхийлөгчийн санаачилсан ажлууд, хийж байгаа ажлын талаар иргэд асууж хариултаа авлаа.
Үүгээр Монгол Улсын Ерөнхийлөгчийн орон нутаг дахь томилолт өндөрлөв.
