"Төсвийн тогтвортой байдлын тухай" хуулийн төсөл
"ТӨСВИЙН ТОГТВОРТОЙ БАЙДЛЫН ТУХАЙ"
ХУУЛИЙН ТӨСЛИЙН ТАНИЛЦУУЛГА
Монгол Улсад төсөв зохиох, батлах, санхүүжүүлэх, гүйцэтгэлийг хангахтай холбогдсон асуудлыг Төсвийн байгууллагын удирдлага, санхүүжилтийн тухай хуулиар, төсвийн орлого, зарлагын ангилал, төсвийн гүйцэтгэлийг тайлагнах, төсвийн нягтлан бодох бүртгэлтэй холбогдсон харилцааг Монгол Улсын нэгдсэн төсвийн тухай хуулиар тус тус зохицуулж байна. Гэвч төсвийн бодлого, стратеги, төсвийн тогтвортой байдлын удирдлага, түүнийг хангах хэрэгсэл, төсвийн удирдлагын үндсэн зарчим, төсвийн тусгай шаардлагыг олон улсын жишгээр тогтоох, хууль тогтоох, гүйцэтгэх засаглалын байгууллагын түвшинд төсвийн тогтвортой байдлыг хангах талаарх эрх, үүрэг, хэм хэмжээ, хариуцлага нь бүрэн хэмжээнд хуульчлагдаагүй байна.
Үүнээс шалтгаалан улсын төсвийг зохиоход Засгийн газраас баримтлах үзүүлэлтүүдийн хязгаар, үндсэн тэнцвэрийг тодорхойлж төсвийн хүрээний мэдэгдлийг Улсын Их Хурлаас зөвшөөрдөг боловч улсын төсвийн төслийг боловсруулах, төсвийг батлахдаа түүнийг баримтлахгүй байх, хууль тогтоох байгууллага улсын төсвийн төслийг хэлэлцэх явцдаа Засгийн газраас өргөн мэдүүлсэн төсвийн төсөлд тусгагдсан эдийн засгийн өсөлт, төсвийн нийт орлого, түүний дотор татварын орлого, төсвийн нийт зарлага зэрэг суурь үзүүлэлтүүдийг өөрчлөх, санхүү, эдийн засгийн гадаад, дотоод түр зуурын хүчин зүйлийн улмаас бий болсон тогтворгүй орлогыг төсвийн санхүүжилтэд зориулж төсвийг хэт тэлэх шийдвэр гаргадаг. Түүнчлэн Монгол Улсын Ерөнхийлөгчийн болон Улсын Их Хурлын сонгуульд оролцогч улс төрийн нам улс орны эдийн засаг, санхүү, төсвийн бодит боломжоос хэтэрсэн мөнгө хуваарилах амлалтыг олон нийтэд сонгуулийн хөтөлбөрөөр амлах замаар иргэдийн саналыг авах буруу зуршил тогтож болзошгүй байгаа юм. Эдгээр байдлууд нь дараагийн жилүүдэд тодорхой шалтгаанаар төсвийн орлого буурах үед төсвийн санхүүжилтийг өмнөх түвшингээр нь уламжлан санхүүжүүлэх бодит боломжгүй болгож байна. Ийнхүү төсвийн тогтворгүй байдал үүссэн нөхцөлд төсөв тогтворжуулах үндэсний санхүүгийн хуримтлалгүйгээс төсвийн алдагдал нэмэгдэх, нийгэм, эдийн засгийн салбар, улсын хөрөнгө оруулалтын зэрэг уламжлалт санхүүжилтийг огцом хасах шаардлага гарч, энэ нь иргэдийн амжиргаанд сөргөөр нөлөөлөх, улмаар макро эдийн засаг, санхүүгийн тогтворгүй байдал үүсгэж, улсын төсөв санхүүгийн эрсдэл бий болгож байна.
Дээр дурьдсан зохисгүй нөхцөл байдлыг өөрчилж, төсвийн тогтвортой байдлаар дамжуулж макро эдийн засгийн урт, дунд хугацааны хөгжлийн тогтвортой байдлыг хангах зорилгоор Төсвийн тогтвортой байдлын тухай хуулийн төсөл боловсрогдсон билээ. Монгол Улсын Засгийн газраас Олон Улсын Валютын Сантай 2009 онд байгуулсан Тогтворжуулалтын хөтөлбөрийн хүрээнд төсвийн удирдлагын хууль эрх зүйн шинэчлэл хийх, үүний дотор Төсвийн тогтвортой байдлын тухай хуулийн төслийг боловсруулж батлуулах үүргийг Монгол улсын засгийн газар хүлээсэн байгаа.
Иймд улсын төсөв, түүний бодлого, стратегийн талаар шийдвэр гаргах, хууль тогтоох эрх бүхий этгээдийн түвшинд төсвийн тогтвортой байдлын удирдлага, төсвийн зохистой хязгаарлалтуудыг баримтлах, хэрэгжүүлэх, хяналт тавих харилцааг зохицуулах, төсвийн тогтвортой байдлыг хангах зориулалт бүхий хуримтлал бий болгох зорилгоор Төсвийн тогтвортой байдлын тухай хуулийн төслийг боловсруулах шаардлагатай байна.
Хөгжиж байгаа эдийн засгийн болон эдийн засгийн хамтын ажиллагааны хөгжлийн байгууллага (OECD)-ын нэлээд олон улс оронд Улсын төсвийн тогтвортой байдлын (хариуцлагын тухай) тухай материаллаг агуулгатай хуулийг төсвийн нийтлэг процессийн хуулиас тусгайлан баталж мөрддөг практик 80-аад оны дунд үеэс эхлэн явагдаж байна. Ийм чиглэл, агуулга бүхий хуулийг НҮБ-ын гишүүн орнуудын бараг 2/3 нь батлан мөрдөж байна. Тэдгээрээс манай улстай ижил төстэй эдийн засгийн хосолмол олон талт бүтэц султай, хөгжиж байгаа эдийн засагтай, ашигт малтмалын олборлолтоос эдийн засаг гол төлөв хараат байдалтай, үүнээс шалтгаалж төсвийн тогтвортой байдал хэлбэлзэх хандлага бүхий 40-өөд улсын төсвийн хуулийг харьцуулсан судалсаны үндсэн дээр өөрийн орны өнөөгийн практик, сургамжийг харгалзан үзэж энэ хуулийн төслийг боловсруулав. Түүнчлэн эдийн засгийн төдийгүй эдийн засгийн хамтын ажиллагаа, хөгжлийн байгууллагуудын өндөр хөгжилтэй олон улс орон, түүний дотор Англи (Төсвийн тогтворжуулалтын хууль), Австрали (Төсвийн шударга байдлын хууль), Шинэ Зеланд (Төсвийн хариуцлагын тухай хууль), Европын Холбоо бүхэлдээ Маастрихтийн гэрээ (Maastricht treaty)-ний хүрээнд бодлого тодорхойлогч болон шийдвэр гаргагч дээд түвшний зүгээс төсвийн удирдлагад болгоомжтой бөгөөд хариуцлагатай хандахад чиглэсэн төсвийн хариуцлагыг өндөржүүлэхэд чиглсэн хууль эрх зүйн орчинг бий болгож мөрдүүлснийг энд бодитой харгалзан үзсэн юм.
Төсвийн тогтвортой байдлын тухай хуулийн төслийг батлан мөрдүүлснээр төсвийн бодлого, стратегийг тодорхойлоход төсвийн удирдлагын зарчим ба төсвийн тусгай шаардлагыг тогтоож, дунд, урт хугацааны төсвийн тогтвортой байдлыг хангахад хууль тогтоох, гүйцэтгэх засаглалын байгууллагын үүрэг хариуцлага өндөрсөж, хямрал, эдийн засгийн хүндрэл тохиолдсон үед нийгэм, эдийн засгийн тогтвортой байдлыг төсвийн засаглалаар дамжуулж хангаж байдаг олон улсын сайн туршлагыг хэрэглэж төсвийн тусгай шаардлагад суурилсан төсвийн удирдлагын эрх зүйн шинэ орчин бүрдэх болно.
--------------------000---------------------
УИХ-д өргөн барьсан хувилбар
Төсөл
МОНГОЛ УЛСЫН ХУУЛЬ
| 2010 оны ... сарын .... өдөр | Улаанбаатар хот |
"ТӨСВИЙН ТОГТВОРТОЙ БАЙДЛЫН ТУХАЙ"
НЭГДҮГЭЭР БҮЛЭГ
Нийтлэг үндэслэл
1 дүгээр зүйл. Хуулийн зорилт
1.1. Энэ хуулийн зорилт нь нэгдсэн төсвийн тогтвортой байдлыг хангахад чиглэсэн төсвийн удирдлагын зарчим, төсвийн тусгай шаардлагыг тогтоох, түүнийг хэрэгжүүлэх, хяналт тавихад төрийн эрх бүхий байгууллагын эрх, үүрэг, хариуцлагатай холбогдсон харилцааг зохицуулахад оршино.
2 дугаар зүйл. Төсвийн тогтвортой байдлын тухай хууль тогтоомж
2.1. Төсвийн тогтвортой байдлын тухай хууль тогтоомж нь Монгол Улсын Үндсэн хууль, энэ хууль болон тэдгээртэй нийцүүлэн гаргасан хууль тогтоомжийн бусад актаас бүрдэнэ.
3 дугаар зүйл. Хуулийн үйлчлэх хүрээ
3.1. Энэ хууль нь Засгийн газрын үйл ажиллагааны хөтөлбөрт нэгдсэн төсвийн тэнцлийн зорилтыг тодорхойлж тусгах, дунд хугацааны төсвийн хүрээний мэдэгдэл болон жилийн нэгдсэн төсвийн төслийг боловсруулах, өргөн мэдүүлэх, батлах, тэдгээрт нэмэлт, өөрчлөлт оруулах, нэгдсэн төсвийн гүйцэтгэлийг батлах, хяналт тавихтай холбогдсон үйл ажиллагаанд хамаарна.
4 дүгээр зүйл. Хуулийн нэр томъёоны тодорхойлолт
4.1. Энэ хуульд хэрэглэсэн дараахь нэр томъёог дор дурдсан утгаар ойлгоно:
4.1.1. “төсвийн тусгай шаардлага” гэж нэгдсэн төсвийн тогтвортой байдлыг хангахад чиглэсэн, төсвийн богино, дунд, урт хугацааны бодлого, төсвийн хүрээг тодорхойлоход баримтлах энэ хуулиар тогтоосон зохистой үзүүлэлтийн түвшин, харьцаа, хязгаарлалтыг;
4.1.2. “гол нэр төрлийн эрдэс баялаг” гэж тухайн жилийн нэгдсэн төсвийн орлогын 1 хувь, эсхүл түүнээс дээш хувийг нь бүрдүүлж байгаа тухайн төрлийн эрдэс баялгийг;
4.1.3. “гол нэр төрлийн эрдэс баялгийн дундаж үнэ” гэж өмнөх 3 жилийн төсвийн төлөвлөгөөнд тусгасан үнэ болон тухайн төсвийн жил, түүний дараагийн 3 жилийн үнийн төсөөлөлд тулгуурлан энэ хуулийн 12 дугаар зүйлд заасан зөвлөлөөс тогтоосон үнийн түвшинг;
4.1.4. “гол нэр төрлийн эрдэс баялгийн дундажлан тооцсон орлого” гэж гол нэр төрлийн эрдэс баялгийг түүний дундаж үнийг үндэслэн тооцсон орлогыг;
4.1.5. “нэгдсэн төсвийн суурь орлого” гэж гол нэр төрлийн эрдэс баялгийн дундажлан тооцсон орлогоос бусад орлогын эх үүсвэрийг;
4.1.6. “нэгдсэн төсвийн тэнцвэржүүлсэн орлого” гэжгол нэр төрлийнэрдэс баялгийн дундажлан тооцсон орлого болон нэгдсэн төсвийн суурь орлогын нийлбэрийг;
4.1.7. “нэгдсэн төсвийн тэнцвэржүүлсэн тэнцэл” гэж нэгдсэн төсвийн тэнцвэржүүлсэн орлого, нэгдсэн төсвийн нийт зарлагын зөрүүг;
4.1.8. “улсын өр” гэж Засгийн газрын дотоод, гадаад зээл, санхүүгийн түрээс, Засгийн газрын гаргасан баталгаа, өрийн бичиг, төрийн болон орон нутгийн өмчит болон тэдгээр өмч давамгайлсан хуулийн этгээдийн ирээдүйд эргэн төлөх үүрэг хүлээсэн санхүүгийн бүх төрлийн төлбөрийн үүргийн Засгийн газарт хамаарах мөнгөн дүн, түүнд ногдох хугацаа хэтэрсэн хүү, алданги, торгуулийн нийлбэрийг;
4.1.9. “дунд хугацаа” гэж дараа жилийн болон түүний дараахь дараалсан хоёр жилийг хамарсан төсвийн 3 жилийг;
4.1.10. “дунд хугацааны төсвийн хүрээний мэдэгдэл” гэж тухайн төсвийн жилийн хүлээгдэж байгаа макро эдийн засгийн болон төсвийн гүйцэтгэлийн төлөв байдал, дунд хугацааны макро эдийн засгийн ба төсвийн үндсэн үзүүлэлтүүдийн төсөөлөлд суурилсан төсвийн бодлогын баримт бичгийг;
4.1.11. “нэгдсэн төсөв” гэж Монгол Улсын Нэгдсэн төсвийн тухай хуульд тодорхойлсныг.
ХОЁРДУГААР БҮЛЭГ
Төсвийн удирдлагын зарчим, тусгай шаардлага
5 дугаар зүйл. Төсвийн удирдлагын зарчим
5.1. Төсвийн удирдлагыг хэрэгжүүлэхэд дараахь зарчмыг баримтална:
5.1.1. төсвийн богино, дунд хугацааны бодлого, стратеги зорилт, урт хугацааны чиг хандлагын төсөөлөл, тэдгээрийн агуулга, хэрэгжилт нь ил тод байх;
5.1.2. төсвийн бодлого, стратегийн зорилт нь макро эдийн засгийн болон татварын тогтвортой орчинг бүрдүүлэх, инфляцийг хязгаарлахад чиглэсэн байх;
5.1.3. төсвийн тусгай шаардлагад нийцүүлэн баталсан дунд хугацааны төсвийн хүрээний мэдэгдлээр төсвийн бодлогыг тодорхойлж, түүнд үндэслэн төсвийг дээд шатны байгууллагаас анхан шатны байгууллага руу чиглэсэн байдлаар зохиох;
5.1.4. төсвийн бодлогыг тодорхойлохдоо олон улсад нийтлэг хэрэглэгддэг аргачлал, мэдээллийн эх сурвалжийг ашиглах замаар төсвийн тооцооны хараат бус, үнэн зөв байдлыг хангадаг байх;
5.1.5. үндэсний баялгийг хүн ам, нийгмийн бүлэг болон өнөө ба хойч үеийнхэнд шударга, тэнцвэртэй хуваарилдаг байх;
5.1.6. төсвийн хөрөнгийн хуваарилалт, байршуулалт, хэрэглээ нь эдийн засгийн үр ашигтай, нийгмийн ач холбогдолтой байх.
6 дугаар зүйл. Төсвийн тусгай шаардлага
6.1. Төсөвт дараахь тусгай шаардлагууд нэгэн зэрэг хангагдсан байна:
6.1.1 нэгдсэн төсвийн орлогыг тэнцвэржүүлсэн журмаар тооцдог байх;
6.1.2 нэгдсэн төсвийн тэнцвэржүүлсэн тэнцэл нь тухайн төсвийн жилийн дотоодын нийт бүтээгдэхүүний хоёр хувиас илүүгүй алдагдалтай, эсхүл ашигтай байх;
6.1.3 тухайн жилийн нэгдсэн төсвийн нийт зарлагын өсөлтийн хувь нь тухайн жилийн дотоодын нийт бүтээгдэхүүний өсөлтийн хувиас хэтрэхгүй байх;
6.1.4 уул уурхайн салбарын гадаадын хөрөнгө оруулалттай хуулийн этгээдийн дүрмийн санд хувь оруулах зориулалттай бөгөөд тухайн хуулийн этгээдийн ирээдүйн ашгаас эргэж төлөгдөх нөхцөлтэй гэрээ бүхий Засгийн газрын зээллэг, эсхүл энэ нөхцөл бүхий Засгийн газрын гаргасан зээлийн баталгааг хамааруулахгүйгээр тооцсон улсын өрийн өнөөгийн үнэ цэнээр илэрхийлсэн үлдэгдэл нь тухайн жилийн оны үнээр тооцсон дотоодын нийт бүтээгдэхүүний 40 хувиас хэтрэхгүй байх.
6.2. Төсвийн тусгай шаардлагыг хэрэгжүүлэхтэй холбогдсон журмыг Засгийн газар баталж, нийтэд мэдээлнэ.
7 дугаар зүйл. Төсвийн тусгай шаардлагыг баримтлах
7.1 Төсвийн тусгай шаардлагыг дараахь үйл ажиллагаанд баримтална:
7.1.1 Засгийн газрын үйл ажиллагааны хөтөлбөрт төсвийн тэнцлийн зорилтыг тодорхойлж тусгах;
7.1.2 дунд хугацааны төсвийн хүрээний мэдэгдэл боловсруулах, батлах;
7.1.3 нэгдсэн төсвийн гүйцэтгэлийг гаргах, тайлагнах, батлах;
7.2 Энэ хуулийн 7.1.1-д заасан төсвийн тэнцлийн зорилтыгдөрвөн жил тутамд нэг удаа өөрчлөн тогтооно.
7.3 Төсвийн төсөл боловсруулах, батлагдсан төсөвт нэмэлт, өөрчлөлт оруулахдаа дунд хугацааны төсвийн хүрээний мэдэгдэлд нийцүүлнэ.
7.4 Энэ хуульд зааснаас бусад тохиолдолд төсвийн тусгай шаардлагыг баримтлахгүйгээр дунд хугацааны төсвийн хүрээний мэдэгдэл боловсруулах, батлах болон дунд хугацааны төсвийн хүрээний мэдэгдэлд нийцүүлэхгүйгээр төсвийн төсөл боловсруулах, батлах, төсөвт нэмэлт, өөрчлөлт оруулахыг хориглоно.
8 дугаар зүйл. Төсвийн тусгай шаардлагыг түр баримтлахгүй байх тохиолдол
8.1Төсвийн тусгай шаардлагыг дараахь тохиолдолд түр баримтлахгүй байж болно:
8.1.1 дотоодын нийт бүтээгдэхүүн тухайн жилд нэг, эсхүл түүнээс доош хувийн өсөлттэй гарсан;
8.1.2 байгалийн гамшигт үзэгдэл тохиолдсон, онц байдалтай холбоотой хохирлыг арилгахтай холбогдуулан төсвөөс нэмж шаардагдах зардлын хэмжээ нь тухайн жилийн дотоодын нийт бүтээгдэхүүний 1 хувь буюу Засгийн газрын нөөц сан болон эрсдлийн сангийн хөрөнгийн нийлбэр дүнгээс 5 дахин хэтэрсэн;
ГУРАВДУГААР БҮЛЭГ
Төсвийн тогтвортой байдлыг хангах талаар
төрийн эрх бүхий байгууллагын бүрэн эрх, чиг үүрэг
9 дүгээр зүйл. Улсын Их Хурлын бүрэн эрх
9.1 Төсвийн тогтвортой байдлыг хангахад Улсын Их Хурал дараахь бүрэн эрхтэй:
9.1.1 дунд хугацааны төсвийн хүрээний мэдэгдлийгэнэ хуулийн 12 дугаар зүйлд заасан зөвлөлөөс тогтоосон үзүүлэлтүүдийг үндэслэн, төсвийн тусгай шаардлагад нийцүүлж хуульчлан батлах;
9.1.2 жилийн төсөв батлах, түүнд нэмэлт, өөрчлөлт оруулахдаа энэ хуулийн 12 дугаар зүйлд заасан зөвлөлөөс тогтоосон үзүүлэлтүүдийг үндэслэн, дунд хугацааны төсвийн хүрээний мэдэгдэлд нийцүүлэх;
9.1.3 энэ хуулийн 10.1.5-д заасныг үндэслэлтэй гэж үзвэл төсвийн тусгай шаардлагыг түр баримтлахгүй байх зөвшөөрөл олгох;
9.1.4 энэ хуулийн 10.1.6-д заасан хөтөлбөрийг хэлэлцэн батлах, хэрэгжилтэд хяналт тавих.
10 дугаар бүлэг. Засгийн газрын чиг үүрэг
10.1 Төсвийн тогтвортой байдлыг хангахад Засгийн газар дараахь чиг үүрэгтэй:
10.1.1 Засгийн газар энэ хуулийн 6.1.2-т заасан төсвийн тусгай шаардлагыг дотоодын нийт бүтээгдэхүүнд эзлэх хувиар, жилээр тооцож, Үйл ажиллагааны хөтөлбөртөө тусгах;
10.1.2 дунд хугацааны төсвийн хүрээний мэдэгдлийг боловсруулахдаа төсвийн тусгай шаардлагад нийцүүлэн Улсын Их Хуралд өргөн мэдүүлэх;
10.1.3 төсвийн төсөл боловсруулах, батлагдсан төсөвт нэмэлт, өөрчлөлт оруулахдаа дунд хугацааны төсвийн хүрээний мэдэгдэлд нийцүүлэх;
10.1.4 төсвийн гүйцэтгэлийг Улсын Их Хуралд тайлагнахдаа дунд хугацааны төсвийн хүрээний мэдэгдлийн үндсэн үзүүлэлтийг хангасан эсэх тухай тайлбарын хамт хүргүүлэх;
10.1.5 энэ хуулийн 8.1-д заасан аль нэг тохиолдол бий болсон бол Улсын Их Хуралд энэ тухай холбогдох үндэслэлийг тодорхойлж төсвийн тусгай шаардлагыг түр баримтлахгүй байх зөвшөөрөл хүсэх;
10.1.6 энэ хуулийн 8.1-д заасан тохиолдол арилсны дараа 3 сарын дотор төсвийн тусгай шаардлагыг үргэлжлүүлэн баримтлах хөтөлбөрийг боловсруулж Улсын Их Хуралд өргөн мэдүүлэх.
11 дүгээр бүлэг. Санхүү, төсвийн асуудал эрхэлсэн төрийн захиргааны төв байгууллагын чиг үүрэг
11.1 Төсвийн тогтвортой байдлыг хангахад санхүү, төсвийн асуудал эрхэлсэн төрийн захиргааны төв байгууллага дараахь чиг үүрэгтэй:
11.1.1 дунд хугацааны төсвийн хүрээний мэдэгдлийг төсвийн тусгай шаардлага, Засгийн газрын үйл ажиллагааны хөтөлбөрт тусгагдсан төсвийн тэнцлийн зорилтод үзүүлэлтийг баримтлан боловсруулж, холбогдох тооцоо, дүн шинжилгээний хамт Засгийн газарт өргөн мэдүүлэх;
11.1.2 төсвийн төсөл болон батлагдсан төсөвт нэмэлт, өөрчлөлт оруулах санал боловсруулахдаа төсвийн тусгай шаардлага, дунд хугацааны төсвийн хүрээний мэдэгдлийг баримтлах;
11.1.3 төсвийн гүйцэтгэл нь дунд хугацааны төсвийн хүрээний мэдэгдлийг хэрхэн хангасан байдалд дүн шинжилгээ хийх;
11.1.4 энэ хуулийн 10.1.6-д заасан хөтөлбөр боловсруулах.
12 дугаар зүйл. Зөвлөл, түүний чиг үүрэг
12.1Мэргэжлийн байгууллагуудын гаргасан тооцооллын хувилбаруудыг харьцуулан үнэлэлт, дүгнэлт өгөх замаар дунд хугацааны төсвийн хүрээ, төсвийн төлөвлөгөөнд мөрдөх дотоодын нийт бүтээгдэхүүний өсөлт, дотоодын нийт бүтээгдэхүүний(тухайн оны үнээр) хэмжээ, гол нэр төрлийн эрдэс баялгийн дундажлан тооцсон орлогыг тодорхойлох чиг үүрэг бүхий нарийн мэргэшсэн шинжээчдээс бүрдсэн, хараат бус, орон тооны бусзөвлөлийг санхүү, төсвийн асуудал эрхэлсэн төрийн захиргааны төв байгууллагын дэргэд байгуулж ажиллуулна.
12.2Энэ хуулийн 12.1-д заасан зөвлөлийн бүрэлдэхүүнийгсанхүү, төсвийн асуудал эрхэлсэн Засгийн газрын гишүүн 2 жилийн хугацаатай томилж, чөлөөлж, тус зөвлөлийн ажиллах журам, ажлын удирдамж, төсвийг баталж, бусад нөхцлийг тогтооно.
12.3Энэ хуулийн 12.1-д заасан зөвлөл нь гол нэр төрлийн эрдэс баялгийн зах зээлийн үнийн хандлагын тооцоог олон улсын зах зээлд судалгаа, мэдээлэл нь нийтлэг ашиглагддаг банк, санхүүгийн байгууллага, түүхий эдийн бирж, зэсийн үйлдвэрлэлээр тэргүүлэгч орны тооцсон эрдэс баялгийн үнийн жишиг, төсөөллийн дундаж, төсвийн тэнцвэржүүлсэн орлого тооцдог олон улсын аргачлалд үндэслэн тодорхойлно.
13 дугаар зүйл. Санхүүгийн нөөцийн удирдлагын хороо, түүний чиг үүрэг
13.1Энэ хуулийн 18.3-т заасан зорилгоор гадаад зах зээлд хийгдэх санхүүгийн хөрөнгө оруулалтын бодлого, стратеги боловсруулах, түүнийг хэрэгжүүлэх, хяналт тавих, тайлагнах талаар бодлогын зөвлөлгөө өгөх чиг үүрэг бүхий хараат бус ажиллагаатай санхүүгийн нөөцийн удирдлагын хороог санхүү, төсвийн асуудал эрхэлсэн төрийн захиргааны төв байгууллагын дэргэд нарийн мэргэшсэн шинжээчдийн бүрэлдэхүүнтэй байгуулж ажиллуулна.
13.2Энэ хуулийн 13.1-д заасан хорооны бүрэлдэхүүнийг санхүү, төсвийн асуудал эрхэлсэн Засгийн газрын гишүүн 2 жилийн хугацаатай томилж, чөлөөлж, тус хорооны ажиллах журам, ажлын удирдамж, төсвийг баталж, бусад нөхцлийг тогтооно.
ДӨРӨВДҮГЭЭР БҮЛЭГ
Төсвийн тусгай шаардлагыг дунд хугацааны төсвийн хүрээний мэдэгдэлд баримтлах
14 дүгээр зүйл. Дунд хугацааны төсвийн хүрээний мэдэгдэл
14.1 Дунд хугацааны төсвийн хүрээний мэдэгдэлд дараахь үзүүлэлтийг тусгана:
14.1.1 дотоодын нийт бүтээгдэхүүний бодит өсөлтийн хэмжээ;
14.1.2 хэрэглээний үнийн өсөлтийн түвшин;
14.1.3 нэгдсэн төсвийн тэнцвэржүүлсэн орлогын хэмжээ;
14.1.4 нэгдсэн төсвийн нийт зарлагын дээд хэмжээ;
14.1.5 нэгдсэн төсвийн нийт зарлагын өсөлтийн хэмжээ;
14.1.6 нэгдсэн төсвийн тэнцвэржүүлсэн тэнцэл;
14.1.7 нэгдсэн төсвийн хөрөнгийн зардлын хэмжээ;
14.1.8 улсын нийт өрийн хэмжээ.
14.2 Энэ хуулийн 14.1.3-14.1.8-д заасан үзүүлэлтийг төсвийн тусгай шаардлагад нийцүүлэн үнэмлэхүй хэмжээ болон дотоодын нийт бүтээгдэхүүнд эзлэх хувиар тооцно.
14.3 Дунд хугацааны төсвийн хүрээний мэдэгдэл дараахь агуулгатай байна:
14.3.1. төсвийн бодлого, зорилтыг энэ хуулийн 5 дугаарзүйлд заасан төсвийн удирдлагын зарчим, 6 дугаар зүйлд заасан төсвийн тусгай шаардлагад нийцүүлж дунд хугацаагаар тодорхойлсон байдал;
14.3.2. Засгийн газар бүрэн эрхийн хугацаанд хэрэгжүүлэхээр энэ хуульд заасан төсвийн тусгай шаардлагад нийцүүлж үйл ажиллагааны хөтөлбөрт тусгасан төсвийн бодлогын зорилтыг хангахын тулд авах арга хэмжээ;
14.3.3. макро эдийн засгийн тогтвортой байдалд төсвийн бодлого хэрхэн нөлөө үзүүлэх талаар хийсэн дүн шинжилгээ;
14.3.4. өнгөрсөн хоёр жилийн гүйцэтгэл, тухайн жилийн төсөвлөлт, дараагийн жилийн болон түүний дараахь дараалсан хоёр жилийн төлөв байдлыг хамруулан нийт 5 жилээр тооцсон дотоодын нийт бүтээгдэхүүн, хэрэглээний үнийн түвшин, мөнгөний бодлогын үндсэн үзүүлэлт, ажил эрхлэлт болон ажилгүйдлийн түвшин, төлбөрийн тэнцэл, гадаад худалдааны урсгал тэнцлийн талаарх макро эдийн засгийн үндсэн үзүүлэлтүүд;
14.3.5. макро эдийн засгийн төлөв байдал, дунд хугацааны төсвийн
хүрээний мэдэгдлийн үзүүлэлтийг тооцоход хэрэглэгдсэн аргачлал, тооцооны үндэслэл;
14.3.6. тэнцвэржүүлсэн орлогоор тооцсон нэгдсэн төсвийн тэнцэл, улсын хөрөнгө оруулалт, төсвийн нийт орлого, зарлагыг багтаасан төсвийн гол үзүүлэлтүүд, тэдгээрийн төлөвлөгөөг гүйцэтгэл, үр дүнтэй нь харьцуулсан байдал;
14.3.7. төсвийн болзошгүй өр төлбөр, түүний талаарх шинжилгээ;
14.3.8. өнгөрсөн 2 жилийн гүйцэтгэл, тухайн жилийн төсөвлөлт, дараагийн жилийн болон түүний дараахь дараалсан хоёр жилийн төлөв байдлыг хамруулан нийт 5 жилээр тооцсон төсвийн тэнцвэржүүлсэн орлогынтөлөвлөгөө болон түүний гүйцэтгэл, төсвийн нийт зарлагын хэмжээ, түүний өсөлт, төсвийн хөрөнгө оруулалтын хэмжээ, төсвийн тэнцвэржүүлсэн тэнцлийн зорилтот үзүүлэлт, түүний гүйцэтгэл, улсын нийт өрийн үлдэгдэл, авч ашиглах зээл, өрийн бичиг гаргалтын талаарх нэгдсэн төсвийн үндсэн үзүүлэлтүүд;
14.3.9. төсвийн төлөвлөгөө нь төсвийн тусгай шаардлагад нийцсэн байдал,дунд хугацааны төсвийн хүрээний мэдэгдлээр тавигдсан зорилт, арга хэмжээг хэрэгжүүлэхэд чиглэсэн байдал.
15 дугаар зүйл. Төсвийн тусгай шаардлагын хэрэгжилтэд хяналт тавих
15.1. Төсвийн тусгай шаардлагын хэрэгжилтэд хяналт тавихтай холбогдсон харилцааг төрийн аудитын тухай хуульд зааснаар зохицуулна.
16 дугаар зүйл. Төсвийн тусгай шаардлагын хэрэгжилтийг тайлагнах
16.1. Засгийн газар төсвийн тусгай шаардлагыг хэрхэн хангасан тухай дүгнэлт, тайланг бэлтгэн, төсвийн гүйцэтгэлийн тайланд тусгаж, Улсын Их Хуралд тайлагнана.
16.2. Энэ хуулийн 16.1-д заасан төсвийн гүйцэтгэлийн тайланд төрийн аудитын төв байгууллага аудит хийхдээ төсвийн тусгай шаардлагыг хэрхэн хэрэгжүүлсэн байдалд дүгнэлт гаргана.
17 дугаар зүйл. Засгийн газраас өргөн барьсан төсвийн төслийн хэлэлцүүлгийн явцад нэмэлт зарлага, орлогын өөрчлөлт оруулах
17.1 Улсын Их Хурал дунд хугацааны төсвийн хүрээний мэдэгдэл, эсхүл жилийн төсөвт, эсхүл Засгийн газраас Улсын Их Хуралд өргөн барьсан эдгээр баримт бичгийн төсөлд нэмэлт, өөрчлөлт оруулах, шинэ хөтөлбөр нэмж тусгах тохиолдолд уг асуудал нь макро эдийн засгийн төлөв байдалд болон төсвийн тусгай шаардлагыг баримтлахад хэрхэн нөлөөлөх талаар Засгийн газраар үнэлгээ хийлгэж, дүгнэлт гаргуулж болно.
ТАВДУГААР БҮЛЭГ
Төсвийн тогтвортой байдлыг хангах
18 дугаар зүйл. Төсвийн тогтворжуулалтын сан
18.1 Төсвийн удирдлагын зарчим, төсвийн тусгай шаардлагад нийцсэн нэгдсэн төсвийн дунд, урт хугацааны тогтвортой байдлыг хангах зорилго бүхий Төсвийн тогтворжуулалтын сантай байна.
18.2 Төсвийн тогтворжуулалтын сангийн хөрөнгө нь дотоодын нийт бүтээгдэхүүний 5 хувиас доошгүй байна.
18.3 Энэ хуулийн 18.2-т заасан хэмжээнээс давсан хөрөнгийн хэсгийг зөвхөн гадаадад санхүүгийн хөрөнгө оруулалт хийх замаар хуримтлуулна.
18.4 Энэ хуулийн 18.3-т заасан санхүүгийн хөрөнгө оруулалт хийх журмыг Засгийн газар батална.
18.5 Төсвийн тогтворжуулалтын сангийн эх үүсвэрийг бүрдүүлэх, зарцуулах, хяналт тавих, гүйцэтгэлийг тайлагнахтай холбогдсон харилцааг Засгийн газрын тусгай сангийн тухай хуулиар зохицуулна.
ЗУРГАДУГААР БҮЛЭГ
Бусад зүйл
19 дүгээр зүйл. Хариуцлага тооцох үндэслэл
19.1 Энэ хуулийн 7 дугаар зүйлийг зөрчсөн байгууллага, албан тушаалтанд хуульд заасны дагуу хариуцлага тооцно.
19.2 Засгийн газраас өргөн мэдүүлсэн дунд хугацааны төсвийн хүрээний мэдэгдэл, тухайн жилийн нэгдсэн төсвийн төсөл нь төсвийн тусгай шаардлагыг хангаагүй тохиолдолд төсвийн төслийг буцаана.
19.3 Нэгдсэн төсвийн гүйцэтгэл нь төсвийн тусгай шаардлагыг энэ хуулийн 8.1-д зааснаас бусад шалтгаанаар хангаагүй бол Үндсэн хуулийн 43 дугаар зүйлийн 4 дэх хэсэгт заасны дагуу Засгийн газрыг огцруулах тухай санал гаргах үндэслэл болно.
19.4 Улсын Их Хурал дунд хугацааны төсвийн хүрээний мэдэгдэл, жилийн төсөв батлах, тэдгээрт нэмэлт, өөрчлөлт оруулахдаа төсвийн тусгай шаардлагад нийцүүлээгүй нь Монгол Улсын Ерөнхийлөгч Монгол Улсын Үндсэн хуулийн 33 дугаар зүйлийн 1 дэх хэсгийн 1-д заасны дагуу хориг тавих бүрэн эрхээ хэрэгжүүлэх үндэслэл болно.
20 дугаар зүйл. Хууль хүчин төгөлдөр болох
20.1 Энэ хуулийг 2011 оны 1 дүгээр сарын 1-нээс эхлэн дагаж мөрдөнө.
20.2 Энэ хуулийн 6.1.2-т заасан төсвийн тусгай шаардлагыг 2013 оны төсвийн жилээс эхлэн дагаж мөрдөнө.
20.3 Энэ хуулийн 6.1.2-т заасан төсвийн тусгай шаардлагыг үе шаттай хангах үүднээс нэгдсэн төсвийн тэнцвэржүүлсэн тэнцлийг 2011 онд тухайн жилийн дотоодын нийт бүтээгдэхүүний 4 хувь, 2012 онд 3 хувь, 2013 оноос 2 хувиас илүүгүй алдагдалтай, эсхүл ашигтай байлгана.
20.4 Энэ хуулийн 18.2-д хэсэгт заасан нөхцлийг 2018 оны төсвийн жилээс өмнө хангана.
20.5 Улсын Их хурлын Байнгын хорооны болон чуулганы нэгдсэн хуралдаанд оролцсон гишүүдийн гуравны хоёроос доошгүй хувийн саналаар энэ хуульд нэмэлт, өөрчлөлт оруулж болно.
ГАРЫН ҮСЭГ
--------------------000---------------------
Төсөл
МОНГОЛ УЛСЫН ХУУЛЬ
| 2010 оны ... сарын.... өдөр | Улаанбаатар хот |
МОНГОЛ УЛСЫН ЕРӨНХИЙЛӨГЧИЙН
СОНГУУЛИЙН ТУХАЙ ХУУЛЬД НЭМЭЛТ ОРУУЛАХ ТУХАЙ
1 дүгээр зүйл . Монгол Улсын Ерөнхийлөгчийн сонгуулийн хуульд дор дурдсан агуулгатай зүйл нэмсүгэй:
“231 дүгээр зүйл. Сонгуулийн мөрийн хөтөлбөрийн амлалтыг хэрэгжүүлэх зардлын тооцооны үнэлгээ гаргах, олон нийтэд мэдээлэх
1. Нам, эвсэл энэ хуулийн 23 дугаар зүйлийн 3 дахь хэсэгт заасан сонгуулийн мөрийн хөтөлбөрийг ирүүлэхдээ түүнд сонгуулийн бүрэн эрхийн хугацаанд хэрэгжүүлэх аливаа амлалтын үндсэн зорилго, хүрэх үр дүн, түүнд нэгдсэн төсвөөс шаардагдах зардлын хэмжээг тооцон, тусгасан байна.
2. Сонгуулийн ерөнхий хороо нь сонгуульд оролцох нэр дэвшигчийг улсын бүртгэлд албан ёсоор бүртгэснээс хойш ажлын 3 хоногийн дотор энэ хуулийн 231дүгээр зүйлийн 3-тзаасан үнэлгээг хийлгүүлэхээр сонгуулийн мөрийн хөтөлбөрийг нь холбогдох материалын хамт санхүү, төсвийн асуудал эрхэлсэн төрийн захиргааны төв байгууллагад албан бичгээр хүргүүлнэ.
3. Санхүү, төсвийн асуудал эрхэлсэн төрийн захиргааны төв байгууллага нь үндэсний хөгжлийн асуудал эрхэлсэн төрийн захиргааны байгуулагатай хамтрансонгуулийн мөрийн хөтөлбөрийн амлалтыг хэрэгжүүлэх зардлын тооцооны үнэлгээ хийнэ.
4. Энэ хуулийн 23 дугаар зүйлийн 3-д заасан зардлын тооцооны үнэлгээнд дараахь зүйлийг тусгана:
4.1. сонгуулийн мөрийн хөтөлбөрт тусгагдсан амлалтуудыг хэрэгжүүлэх эдийн засгийн боломж ба нэгдсэн төсвөөс шаардагдах зардлын хэмжээ, эх үүсвэрийн тооцоо;
4.2. сонгуулийн мөрийн хөтөлбөрийн амлалтыг хэрэгжүүлэх зардал нь Төсвийн тогтвортой байдлын тухай хуульд заасан төсвийн тусгай шаардлагыг хэрхэн хангах, төлбөрийн тэнцэл, мөнгөний нийлүүлэлт, валютын ханш, инфляци, хэрэглээний үнийн түвшинд нөлөөлөх байдлын шинжилгээ;
5. Үнэлгээ хийхэд нэмэлт мэдээлэл шаардлагатай бол үнэлгээ хийх эрх бүхий төрийн байгууллага энэ тухай хүсэлтээ нам, эвслийн даргад албан бичгээр мэдэгдэнэ.
6. Санхүү, төсвийн асуудал эрхэлсэн төрийн захиргааны төв байгуулллага нь энэ хуулийн 23 дугаар зүйлийн 3-д заасан үнэлгээг, түүнд хэрэглэсэн арга зүйн тайлбарын хамтсонгууль болохоос 15-аас доошгүй хоногийн өмнө олон нийтийн мэдээллийн хэрэгсэлээр нийтэд мэдээлнэ.
7. Санхүү, төсвийн асуудал эрхэлсэн төрийн захиргааны төв байгууллага нь энэ хуулийн 23 дугаар зүйлийн 3-д заасан үнэлгээг хийж, олон нийтэд мэдээлснээс хойш цаашид ямарваа нэгэн нэмэлт үүрэг хүлээхгүй.”
2 дугаар зүйл. Энэ хуулийг Төсвийн тогтвортой байдлын тухай хууль хүчин төгөлдөр болсон өдрөөс эхлэн дагаж мөрдөнө.
Гарын үсэг
--------------------000---------------------
Төсөл
МОНГОЛ УЛСЫН ХУУЛЬ
| 2010 оны ... сарын ... өдөр | Улаанбаатар хот |
МОНГОЛ УЛСЫН ИХ ХУРЛЫН
СОНГУУЛИЙН ТУХАЙ ХУУЛЬД НЭМЭЛТ ОРУУЛАХ ТУХАЙ
1 дүгээр зүйл . Монгол Улсын Их Хурлын сонгуулийн тухай хуулийн 6 дугаар бүлэгт дор дурдсан агуулгатай зүйл нэмсүгэй:
1/361 дугаар зүйл:
“361 дугаар зүйл. Сонгуулийн мөрийн хөтөлбөрийн амлалтыг хэрэгжүүлэх зардлын тооцооны үнэлгээ гаргах, олон нийтэд мэдээлэх
361.1. Нам, эвсэл энэ хуулийн 24.4.3-т заасан сонгуулийн мөрийн хөтөлбөрийг ирүүлэхдээ түүнд сонгуулийн бүрэн эрхийн хугацаанд хэрэгжүүлэх амлалтын үндсэн зорилго, хүрэх үр дүн, түүнд нэгдсэн төсвөөс шаардагдах зардлын хэмжээг тооцон, тусгасан байна.
3612.Сонгуулийн ерөнхий хороо нь сонгуульд оролцох нам, эвслийг улсын бүртгэлд албан ёсоор бүртгэснээс хойш ажлын 3 хоногийн дотор энэ хуулийн 361.3.-д заасан үнэлгээг хийлгүүлэхээр сонгуулийн мөрийн хөтөлбөрийг нь холбогдох материалын хамт санхүү, төсвийн асуудал эрхэлсэн төрийн захиргааны төв байгууллагад албан бичгээр хүргүүлнэ.
361.3.Санхүү, төсвийн асуудал эрхэлсэн төрийн захиргааны төв байгууллага нь үндэсний хөгжлийн асуудал эрхэлсэн төрийн захиргааны байгууллагын хамтран сонгуулийн мөрийн хөтөлбөрийн амлалтыг хэрэгжүүлэх зардлын тооцооны үнэлгээ хийнэ.
361.4.Энэ хуулийн 361.3-д заасан зардлын тооцооны үнэлгээнд дараахь зүйлийг хамруулна:
361.4.1.сонгуулийн мөрийн хөтөлбөрт тусгагдсан амлалтуудыг хэрэгжүүлэх эдийн засгийн боломж ба нэгдсэн төсвөөс шаардагдах зардлын хэмжээ, эх үүсвэрийн тооцоо;
361.4.2.сонгуулийн мөрийн хөтөлбөрийн амлалтыг хэрэгжүүлэх зардал нь Төсвийн тогтвортой байдлын тухай хуульд заасан тусгай шаардлагыг хэрхэн хангах, төлбөрийн тэнцэл, мөнгөний нийлүүлэлт, валютын ханш, инфляци, хэрэглээний үнийн түвшинд нөлөөлөх байдлын шинжилгээ.
36.15. Үнэлгээ хийхэд нэмэлт мэдээлэл шаардлагатай бол үнэлгээ хийх эрх бүхий төрийн байгууллага энэ тухай хүсэлтээ нам, эвслийн даргад албан бичгээр мэдэгдэнэ.
3616.Санхүү, төсвийн асуудал эрхэлсэн төрийн захиргааны төв байгууллага нь энэ хуулийн 361.3-т заасан үнэлгээг, түүнд хэрэглэсэн арга зүйн тайлбарын хамт сонгууль болохоос 15-аас доошгүй хоногийн өмнө олон нийтийн мэдээллийн хэрэгсэлээр нийтэд мэдээлнэ.
3617. Санхүү, төсвийн асуудал эрхэлсэн төрийн захиргааны төв байгууллага нь 361.3-д заасан үнэлгээг хийж, олон нийтэд мэдээлснээс хойш цаашид ямарваа нэгэн нэмэлт үүрэг хүлээхгүй.”
2 дугаар зүйл. Энэ хуулийг Төсвийн тогтвортой байдлын тухай хууль хүчин төгөлдөр болсон өдрөөс эхлэн дагаж мөрдөнө.
Гарын үсэг
--------------------000---------------------
Төсөл
МОНГОЛ УЛСЫН ХУУЛЬ
2010 оны ... сарын ... өдөр
| Улаанбаатар хот |
ЗАСГИЙН ГАЗРЫН ТУСГАЙ САНГИЙН ТУХАЙ ХУУЛЬД
НЭМЭЛТ, ӨӨРЧЛӨЛТ ОРУУЛАХ ТУХАЙ
1 дүгээр зүйл. Засгийн газрын тусгай сангийн тухай хуулийн 3 дугаар бүлэгт дор дурдсан зүйл, хэсэг нэмсүгэй:
1/ 91 дүгээр зүйл. Төсвийн тогтворжуулалтын сан
“91.1. Төсвийн тогтворжуулалтын сан нь төсвийн удирдлагын зарчим, төсвийн тусгай шаардлагыг мөрдөж нэгдсэн төсвийн дунд, урт хугацааны тэнцвэртэй, тогтвортой байдлыг хангах, төсвийн тэнцвэржүүлсэн горимыг хэрэгжүүлэхэд санхүүгийн хэрэгслийн үүрэг гүйцэтгэнэ.
91.2. Төсвийн тогтворжуулалтын санг дараахь эх үүсвэрээс бүрдүүлнэ:
91.2.1. Төсвийн тогтвортой байдлын тухай хуульд заасан нөхцлөөр тодорхойлсон төсвийн тэнцвэржүүлсэн орлогоос давсан төсвийнорлого;
91.2.2. төсвийн тэнцвэржүүлсэн тэнцлийн ашиг;
91.2.3. Засгийн газрын нөөц сангийн болон эрсдлийн сангийн тухайн төсвийн жилийн зарцуулагдаагүй чөлөөт эх үүсвэр;
91.2.4. төсвийн тогтворжуулалтын сангийн санхүүгийн үйл ажиллагаанаас олсон орлого;
91.2.5. бусад орлого.
91.3. Энэ хуулийн 91.1-д заасан сангийн хөрөнгөөс дор дурдсан санхүүжилт хийх зориулалтаар улсын төсөвт шилжүүлж болно:
91.3.1. тухайн жилийн төсвийн тэнцвэржүүлсэн орлогын төлөвлөгөө, төсвийн орлогын гүйцэтгэлийн зөрүү;
91.3.2. Төсвийн тогтвортой байдлын тухай хуулийн 8 дугаар зүйлд заасан тохиолдлын улмаас үүссэн төсвийн санхүүжилтийн нэмэлт эх үүсвэр;
91.4. Төсвийн тогтворжуулалтын сангийн хөрөнгө нь Засгийн газрын тусгай сангийн тухай хуулийн 91.3.1-д заасан төсвийн алдагдлыг бүрэн санхүүжүүлэхэд хүрэлцэхгүй тохиолдолд уг алдагдлыг санхүүжүүлэх зориулалтаар Засгийн газар Төсвийн тогтвортой байдлын тухай хуулийн 6.1.4-д заасан улсын өрийн хязгаарт багтааж зээл авч болно.
91.5. Хуульд өөрөөр заагаагүй бол төсвийн тогтворжуулалтын сангийн хөрөнгийг Монголбанкинд тусгай дансанд байршуулна.
91.6. Төсвийн тогтворжуулалтын сангийн хөрөнгийг энэ хуулийн 91.3-т заасан зориулалтаар санхүүжилт хийхэд цаг ямагт хөрвөх чадвартай байлгах, эрсдлээс хамгаалах, олон улсын санхүүгийн зах зээлд үр ашигтай хөрөнгө оруулалт хийхэд чиглэсэн санхүүгийн нөөцийн удирдлагыг Төсвийн тогтвортой байдлын тухай хуулийн 12.1-д заасан хорооны саналыг үндэслэн санхүү, төсвийн асуудал эрхэлсэн төрийн захиргааны төв байгууллага, Монголбанк хооронд байгуулсан гэрээний үндсэн дээр хэрэгжүүлнэ.
2 дугаар зүйл. Засгийн газрын тусгай сангийн тухай хуулийн хуулийн 2.1 дэх хэсгийн “хууль тогтоомж нь” гэсний дараа “Төсвийн тогтвортой байдлын тухай хууль,” гэж нэмсүгэй.
3 дугаар зүйл. Засгийн газрын тусгай сангийн тухай хуулийн 5.4.9, 6.2.5-д “Монгол улсыг хөгжүүлэх сан” гэснийг “Төсвийн тогтворжуулалтын сан” гэж өөрчилсүгэй.
4 дүгээр зүйл.Энэ хуулийг Төсвийн тогтвортой байдлын тухай хууль хүчин төгөлдөр болсон өдрөөс эхлэн дагаж мөрдөнө.
Гарын үсэг
"Төсвийн тогтвортой байдлын тухай" хуулийн төсөл
