Монгол үндэстний түүх, хэл, соёлыг хадгалан хамгаалах, судлах, сурталчлах үйлсэд дэлхийн монголчууд, Монголын анд нөхдийн хүчин чармайлтыг нэгтгэх зорилготой “Дэлхийн Монголчуудын чуулган” олон улсын ТББ дөрөв дэх удаагийнхаа хуралдааныг “Даяаршил ба дэлхийн монголчууд” сэдвийн хүрээнд энэ оны 7-р сарын 15-18-ны өдрүүдэд ОХУ-ын Буриад улсад хийх гэж байгаа юм байна.
Энэхүү хуралдаанд Монгол Улсын Ерөнхийлөгч бөгөөд, “Дэлхийн монголчуудын чуулган”-ы Хүндэт Ерөнхийлөгч Ц.Элбэгдоржийг урьсан урилгаа өнөөдөр, тус ТББ-ын төлөөлөл Ерөнхийлөгчийн зөвлөх А.Ганбаатарт гардуулав.
“Ерөнхийлөгч Ц.Элбэгдорж хуралдаанд оролцохоо мэдэгдсэн бөгөөд, “Дэлхийн монголчуудын чуулган”-ы ээлжит хуралдааныг монгол түмний үнэт зүйлс бүхнийг хамгаалан дэлгэрүүлэхэд үнэтэй хувь нэмрээ өгөхүйц үр дүнтэй, дэлхийн монгол угсаатны эв эеийг зузаатгасан чухал арга хэмжээ болгон зохион байгуулна гэдэгт Ерөнхийлөгч итгэлтэй байгаа” гэж зөвлөх А. Ганбаатар хэллээ.
“Дэлхийн монголчуудын чуулган”-ы 4-р хуралдааны зохион байгуулах хороог Буриадын Ерөнхийлөгч бөгөөд, Засгийн Газрын дарга В.В.Наговицын тэргүүлж байна. Одоогийн байдлаар дэлхийн өнцөг булан бүрт амьдран суугаа, монгол туургатны төлөөлөл болсон 120 орчим төлөөлөгч оролцохоо мэдэгдээд байгаа юм байна.
