Та бүхэнд их түүхт, эрх чөлөөт Монгол Улсын эр цэргийн баярын дайчин цогтой, гал халуун мэндийг хүргэе.
Монгол Улсын цэргийн, Монгол жанждын гавъяа түүх, эр зориг, ур чадварыг дэлхий мэднэ. Өнөөдөр ч Монгол Улсын Зэвсэгт хүчин, Эх орон ард түмэндээ үнэнч зүтгэхээ тангарагласан манай цэргийнхэн Монгол цэргийн бахархалт түүхийг үргэлжлүүлж, албан үүргээ нэр төртэй гүйцэтгэж байна.
Цэргийн албаны салбар бүрийг төлөөлүүлж Монголын төр, ард түмний гүн хүндэтгэлийн илэрхийлэл болгож, Та бүхний ажил албаны чин үнэнч, их зүтгэлийг өнөөдөр үнэлж байгаа юм. Монгол Улсын төлөө зүтгэх Та бүхний нэр хүндтэй, хариуцлагатай албанд тань дахин амжилт хүсэж, чин сэтгэлийн талархал илэрхийлье.
Монгол Улсын Зэвсэгт хүчний, өргөсөн тангарагтаа үнэнч цэргийн албан хаагчдын суу алдар бадартугай.
