Монгол Улсын Ерөнхийлөгч Ц.Элбэгдорж Баян-Өлгий аймгийг зорьсонтой холбогдуулж Төрийн тэргүүний Олон нийтийн харилцаа, нийтлэг бодлогын асуудал эрхэлсэн зөвлөх А.Ганбаатараас дараах тодруулгыг авлаа.
-Ерөнхийлөгч үндэсний цөөнхийн өлгий нутаг Баян-Өлгий аймагт ажиллахаар мордлоо. Тус аймагт ажиллах гол зорилго, онцлог нь юу вэ?
-Жил бүрийн гуравдугаар сарын 22-нд Монгол түмний нэг хэсэг болох казахын ард түмний хамгийн том баяр болох хаврын баяр тохиодог. Хахир хүйтэн өвлийг мэнд давсаны, хаан харц тэнцэж амгалан жаргасны баяр гэдэг утгаараа Наурызыг манай казах түмэн өргөн дэлгэр тэмдэглэдэг. Өдөр шөнө тэнцдэг гэдгээрээ ч энэ өдөр онцлогтой. Монгол Улсын Ерөнхийлөгч бүх ард түмний эв нэгдлийн билэгдэл болдогийнхоо хувьд энэ баярын нээлтэд оролцож, үндэсний цөөнхөд хандаж баяр хүргэж үг хэлэх юм.
Улмаар аймгийн төв Өлгий хот болон Буянт, Сагсай сумдын иргэдтэй уулзаж, ахмад настнуудад хүндэтгэл үзүүлнэ. Алс хязгаар Баян-Өлгий нь өвөржилт хүндэрсэн аймгуудын тоонд орж байгаа. Өвөлжилтийн дараах хавартай хэрхэн золгож буй байдалтай Ерөнхийлөгч биечлэн танилцах юм. Түүнээс гадна энэ жил Баян-Өлгий аймгийн 70 жилийн ой тохиож байгаа. Ерөнхийлөгчийн энэ удаагийн албан томилолтын нэг хэсэг ойн үйл ажиллагаатай холбогдож байгаа.
-Ерөнхийлөгч шагналын бодлогыг цогцоор нь шийднэ хэмээн мэдэгдсэн байгаа. Энэ асуудал юу болж байна вэ?
-Одоо хүчин төгөлдөр мөрдөгдөж байгаа шагналын тогтолцоо нь цаг үеээсээ хоцорсон, хэлбэр, агуулгын хувьд ч учир дутагдалтай байгаа учир илүү боловсронгуй болгон үүднээс төслийн уралдаан зохиохоор бэлтгэл ажлыг хангаад байна. Ирэх сарын 1-нээс энэхүү уралдааныг зарлах бөгөөд боломжтой хувилбаруудыг сонгож Иргэний танхимаар хэлэлцүүлж шалгаруулах юм. Үүнтэй уялдуулж шаардагдах эрхзүйн орчинг бүрдүүлнэ. Ингэснээр шагналын тогтолцоо цогцоороо өөрчлөгдөнө гэж үзэж байгаа.
-Таны эрхлэх асуудлын хүрээнд, олон нийтийн харилцаа, нийтлэг бодлогын чиглэлээр ойрын үед Ерөнхийлөгч ямар бодлого шийдвэр гаргах гэж байна вэ?
-Хоёр чухал зарлиг гаргах гэж байгаа. Эхнийх нь залуу үеийн бие бялдрын хөгжлийг хангах чиглэлээр “их сорилго” буюу хуучнаар ХБХБ тэмдэгийн норматив тогтоож мөрдүүлэх. Бид бүгд мэдэж байгаа. Сүүлийн үеийн хүүхэд залуус бие бялдрын хөгжлөөр сул дорой, өвчлөмтгий болж байгаа шүү дээ. Үүнд хоол хүнс, ус агаар гээд гадны хүчин зүйлүүд нөлөөлж байгаа ч хувь хүний бэлтгэлжилт, бие бялдрын чийрэгжилт дутаж байгаа юм. Үүнийг төрийн бодлогын хэмжээнд авч үзэн тодорхой болзол гаргаж мөрдүүлнснээр өсвөр, залуу үеийнхний дунд өвчлөл буурч, элдэв өвчнөөс урьдчилан сэргийлэх ажил идэвхжинэ. Үүнд мөн их дээд сургуулийн дунд лигийн шигшээ баг байгуулах асуудал хамаарч байгаа. Оюутан залуусыг биеийн тамир, спортод сонирхолтой болгох, тэдний чөлөөт цагийг зөв боловсон өнгөрүүлэх, бие бялдрын хөгжлийг хангах үүднээс их, дээд сургуулиудын дэргэд шигшээ багууд байгуулж, тогтмол ажиллуулах юм. Удаах зарлиг нь ардын язгуур урлагийг өвлөх, хөгжүүлэх, залуу хойч үеийнхэнд залгамжлан үлдээхтэй холбоотой. Язгуур урлагийн “өв түгээгч” нар буюу залуус хүүхдүүдэд сурталчлан таниулж, зааж сургаж байдаг ахмад настнууд жилээс жилд ховордож байгаа. Тиймээс ардын урлагаа хөгжүүлэн авч явахад энэ зарлиг чиглэгдэх юм.
-Галаас дүүгээ аварсан гурван настай охинд Төрийн тэргүүн “Шударга журам” медаль гардуулна гэсэн мэдээлэл хэвлэлээр гараад байна. Энэ хэр бодитой вэ?
-Энэ талаар эцсийн байдлаар шийдвэр гараагүй байна. Төрийн тэргүүний Баян-Өлгий дэх томилолт энэ сарын 24-нд өндөрлөж, нийслэлд хүрэлцэн ирнэ. Тэр үеэр асуудал яригдах байх.
-Ярилцсанд баярлалаа.
