МОНГОЛ УЛСЫН ЕРӨНХИЙЛӨГЧ Ц.ЭЛБЭГДОРЖ "ОЮУНЫ ЧАДАМЖ-ХӨГЖЛИЙН ТҮЛХҮҮР" ҮНДЭСНИЙ ТЕХНОЛОГИЙН ФОРУМЫН НЭЭЛТЭНД ОРОЛЦОЖ ХЭЛСЭН ҮГ
Энд хүрэлцэн ирсэн зочид гийчэд, эрдэмтэн судлаачдын энэ өдрийн түмэн амгаланг айлтгая.
Өнөөдөр шинжлэх ухаан, технологийн судалгаа шинжилгээний болон бизнесийн салбар хамтраад сүүлийн жилүүдэд хийж байгаа хамтын ажиллагааныхаа ололттой, дэвшилттэй талуудыг олон түмэндээ танилцуулах ажлыг зохион байгуулж байна. Дараах гурван зүйл дээр гол анхаарлаа хандуулах нь зүйтэй болов уу хэмээн бодож байна.
Нэгдүгээрт, аливаа шинэ бизнес гэдэг нь эрдэмтэдийн, аль эсвэл шинээр нээлт хийж буй хүний шинэ санаа, мөн бизнесийн буюу хувь хүний, банкны мөнгө, түүний оролцоо нийлж байж шинэ бизнес болдог. Манайд эрдэмтдээ орхисон, судалгаагаа үл ойшоосон ийм бизнес байгаа.
Манайд эрдэмтэд шинэ зүйл санаачилсан бол тэр нь нэг том бизнесийн эхлэл болж байх ёстой. Тухайн эрдэмтний, санаачилга гаргасан хүний санаа нь тэр бизнесийнхээ хувь болж хувирах ёстой. Эрдэмтэн судлаач, хөрөнгө оруулагч хоёр тохироод хамтарсан үйлдвэрлэлээ нэвтрүүлж эхлэх учиртай. Ийм ажил олон жил хийгдэлгүй хоцронги явж ирлээ. Эрдэмтдийн сайхан санаачилга байдаг, түүнийг нь дэмждэг эрх зүйн дэмжлэг байдаггүй. Тэр сайхан санаачилгыг бариад авдаг бизнесийн дэмжлэг, оролцоо хомс байгаа.
Хоёрдугаарт, дэлхий нийтэд шинэ хандлага болон гарч ирж байгаа нэг үзэгдэл байна. Энэ бол ногоон хөгжлийн асуудал юм. Байгальд ээлтэй хөгжлийн тухай асуудал. Тэгэхээр өнөөдөр хэцүү асуудалд хариулт олоход амархан болжээ. “Ямар технологийг сайн технологи гэх вэ?” гэсэн асуултад “Байгальд ээлтэй технологийг л сайн, дэвшилтэт технологи гэнэ” гэж хариулж байна. “Ямар бизнесийг сайн бизнес гэх вэ?” гэхээр “Байгальд хоргүй, хүний амьдралд ээлтэй бизнесийг л сайн бизнес гэж үзнэ” гэсэн ийм хандлага дэлхий нийтээрээ бий болжээ.
Байгальд ээлтэй шинжлэх ухаан, бизнес гэсэн ойлголт улам бүр газар авч байна. Байгальд хамгийн боловсронгуй төгс хууль үйлчилдэг. Үүнтэй нийцэж байгаа хөгжлийг хамгийн зөв хөгжил гэж үзэж байна.
Гуравдугаарт, өнөөдөр хувьсгалын тухай хүмүүс их ярьдаг болжээ. Ямар учраас гэхээр байгууллага доторх шинэчлэл хийгдээгүйн улмаас хувьсгал хэрэгтэй болоод байгаа юм. Манай оюуны өмчийн салбарт хувьсгал хийгдээгүй байна. Хүн бүхэн тархи толгойдоо, байгууллага бүхэн дотооддоо хийх ёстой өөрчлөлтөө хийж чадвал тэр нь нийгмийн хувьсгал, дэвшил болж чадна.
Тэгэхээр энэ гурван зүйлийг өнөөдрийн арга хэмжээнд оролцож буйгаа тохиолдуулан хэлэх гэсэн юм.
Форумын үйл ажиллагаанд амжилт хүсье.
