Монгол Улсын Ерөнхийлөгч Цахиагийн Элбэгдоржийн энэ оны 3 дугаар сарын 26-нд гаргасан “Нийтийн биеийн тамир спортыг хөгжүүлэх тухай” зарлигийн хүрээнд "Хүн амын бие бялдрын хөгжил, чийрэгжилтийн түвшин тогтоох сорил"-ыг Монгол Улсын Ерөнхийлөгчийн санаачилгаар жил бүрийн дөрөвдүгээр сард явуулж байхаар болсон билээ.
Нийт хүн амын 7-64 насныхны бие бялдрын түвшин тогтоох уг сорил нь Биеийн тамир, спортыг нийтийн үйл хэрэг болгох, улмаар орчин үеийн эрүүл амьдралын хэв маяг, зан үйлд сургах, аливаа саад, бэрхшээлийг даван туулах бие, сэтгэлийн тэсвэр хатуужилтай шинэ үеийг бий болгох зорилгоор хэрэгжүүлж байгаа бөгөөд өнгөрөгч долоо хоногт Ерөнхийлөгчийн Тамгын газрын нийт албан хаагчид уг сорилд хамрагдаж иргэн бүр уг сорилгод идэвхитэй оролцохыг уриаллаа.
Биеийн тамир, спортын газар болон шат шатны орон нутаг дахь биеийн тамир спортын газраас зохион байгуулж буй энэхүү сорил нь иргэдийн уян хатан чанар, тэсвэр, хүч чадал, хурд, тэнцвэр гэсэн таван чанарыг ямар түвшинд байгааг тодорхой дасгал, хөдөлгөөнөөр тогтоож цаашид эрүүл мэндээ сайжруулах, эрч хүчтэй чийрэг байхын тулд ямар дасгал хөдөлгөөн хийж болохыг зөвлөх юм. Ингэснээр Монголын маргааш болсон ирээдүй үе маань бага наснаасаа эрүүл цовоо өсөн торниж, насанд хүрэгчдийн хувьд элдэв өвчин эмгэгт өртөх бодит магадлал буурч улс үндэстнээрээ эрүүл чийрэг бие бялдартай байх боломж бүрдэх юм.
