Монгол Улсын эрхэм хүндэт генералууд аа!
Анд нөхөд өө!
Туурга тусгаар Төр улсынхаа ариун гал голомтыг сахин хамгаалагч цэрэг дайчдаа дээдлэн хүндэлж алдар суу, гавъяат үйлсийг нь мөнхжүүлэн алдаршуулах нь Монгол Төрийн үеэс үед өвлөх эрхэм нандин уламжлал билээ.
Монгол цэргийн ялан дийлэх арга ухааны нэн чухал эх булаг нь цэргийн жанжин дарга нарын цэргээ залах суу билэг, нугарч шантаршгүй зориг зүрх, цэргүүд нь удирдагч нартаа амь бие, санаа зоригоо сэтгэл хоёрдолгүй даатгадаг хязгааргүй итгэл болж иржээ. Суут богдын үед ч ийм байсан. Шинэ цагийн Зэвсэгт хүчин, энхийг сахиулагчдын хувьд ч ийм байх учиртай болов уу.
1944 оны 04 дүгээр сарын 28-нд Монгол Улсад цэргийн дээд цол генерал цолыг бий болгосон нь Монгол Улсын шинэ үеийн Зэвсэгт хүчний хөгжилд хүндтэй байр суурь эзэлсэн арга хэмжээ мөн.
Монгол цэргийн шилдэг өв уламжлал, дэлхий дахины цэргийн хэргийн хөгжил, дайн тулааны туршлага, сургамжид тулгуурласан энэхүү шийдэл, арга хэмжээ нь цэргийн удирдлагыг бэхжүүлэх, даргалах бүрэлдэхүүний чадал чансааг сайжруулах, нэр хүндийг нь өргөх, цэргийн байгуулалтын тулгуур зарчим нэгтгэн удирдах ёс, сахилга зохион байгуулалтыг бэхжүүлэхэд чиглэсэн түүхэн арга хэмжээ болжээ.
Манай эх оронч, их түүх, баатарлаг үйлсээрээ бахархдаг манай ард түмэн Монгол цэргийн шинэ үеийн түүхийн нугачаат их зам, алдар гавъяат үйлслийн гэрч, бүтээгчид нь болсон генералуудад гүнээ хүндэтгэлтэй ханддагийг баярын тань өдөр илэрхийлэхэд таатай байна.
Монгол Улсын үе үеийн генералууд та нөхдийн мэдлэг, чадвар, авъяас билэг, ажил амьдралын их туршлага Монгол Улсын төрийн цэргийн бодлогын шинэчлэлийг амжилттай хэрэгжүүлж Зэвсэгт хүчний үүрэг гүйцэтгэх болон энхийг дэмжих ажиллагаанд оролцох чадавхи боломжийг нэмэгдүүлэх нэн чухал нөөц, сурч мэдэж хөгжих дэвшихийн их сан хөмрөг гэдгийг онцлон тэмдэглэе.
Монголын генералуудын өдрийг тохиолдуулан Та бүхэнд ажлын амжилт, эрүүл энх, хамгийн сайн сайхан бүхнийг хүсч чин сэтгэлийн баярын мэндчилгээг дэвшүүлье.
Монгол цэргийн даргын суу алдар үеийн үед мандан бадартугай.
2010.04.27.
