БНХАУ-д төрийн айлчлал хийж байгаа Монгол Улсын Ерөнхийлөгчийн айлчлал ӨМӨЗО-ны Хөх хотод үргэлжилж байна.
Ерөнхийлөгч Ц.Элбэгдорж, Тэргүүн хатагтай Х.Болормаа нар дагалдан яваа хүмүүсийн хамт өнөөдөр Хөх хот дахь Монголын соёлын өдрүүдийн нээлтэд оролцлоо.
Монгол Улсын БСШУЯ болон ӨМӨЗО-ны хэвлэл мэдээллийн алба хоронд байгуулсан хамтын гэрээний дагуу энэхүү арга хэмжээ зохиогдож байна.
Монгол Улсын БСШУ-ы дэд сайд Ч.Куланда соёлын өдрүүдийг нээж хэлсэн үгэндээ “Манай хоёр орны харилцаа сүүлийн жилүүдэд эрчимтэй хөгжиж байгаа нь соёл урлагийн салбарын хамтын ажиллагаагаар илэрч байна. Өнгөрсөн хугацаанд хоёр орон өөр өөрсдийн соёл уламжлал, үндэсний өв , зан заншилд хүндэтгэлтэй хандаж ирлээ. Цаашдаа ч энэхүү харилцан хүндэтгэл, хамтын ажиллагаагаа хадгалах болно.” гэлээ.
БНХАУ-ын Коммунист намын ӨМӨЗО-ны байнгын хорооны гишүүн Улаан, анх удаа ӨМӨЗО-нд Монголын соёлын өдрүүд зохиогдож байгаад тус орны зүгээс өндөр ач холбогдол өгч байгаа гэдгийг нээлтийн үеэр онцолж хэлэв.
Монголын соёлын өдрүүдийн хүрээнд хүндэтгэлийн тоглолт, кино өдрүүд, гэрэл зургийн үзэсгэлэн тус тус зохиогдох юм.
Хүндэтгэлийн тоглолтонд, нийт 82 жүжигчин оролцож байгаагийн дотор дэлхийн сонгодог урлагийн бүтээлийн дээж, хязгаар нутгаас ирсэн сайн дурын уран сайханчдаас бүрдсэн ардын язгуур урлагийн тоглолт, үндэсний дуу бүжиг, мөн хүүхдийн урлагийн тоглолт, рок попын тоглолтыг тус тус толилуулах гэж байна.
Монгол Улсын хөгжил цэцэглэлт, монгол ахуй, Их Монгол Улс байгуулагдсаны 800 жилийн ойн үйл явдал зэргийг харуулсан 100 орчим гэрэл зургийн үзэсгэлэн өнөөдөр нээгдлээ.
Мөн өнөөдрөөс эхлэн Өвөр Монголын “Одон” телевизээр “Алтан өргөө” “Би чамд хайртай” зэрэг уран сайхын болон баримтат киног үзүүлэх гэж байна.