БНХАУ-д хийсэн төрийн айлчлалынхаа хүрээнд, Монгол Улсын Ерөнхийлөгч ӨМӨЗО-нд ажилласан. Энэ үеэр ӨМӨЗО-ны Намын Хорооны нарийн бичгийн дарга бөгөөд, ӨМӨЗО-ны АТИХ-ын БХ-ны дарга Ху Чуньхуатай уулзаж, Өвөр Монголын Их сургуульд зочилж, Монгол-Өвөр монголын ажил хэрэгч хүмүүсийн уулзалтанд оролцож, мөн салхин сэнсний “Вистас” үйлдвэртэй танилцсан юм.
Ху Чуньхуа тэргүүтэй ӨМӨЗО-ны дарга нар уулзах үеэрээ, сүүлийн 10 шахам жил эрчимтэй хөгжин бүх Хятад Улс даяар тэргүүлэх эдийн засагтай бүс болж байгаа Өвөр Монголын тухай товч танилцуулав. Өвөр Монгол нь 8 жил дараалан дотоодын нийт бүтээгдэхүүний өсөлтөөр 1-р байранд орж яваа ажээ. Хятадын засгийн газраас явуулж байгаа шинэ бодлого мөн аж үйлдвэржүүлэх бодлогуудад хамрагдаж, 60 тэрбум юанийн хөрөнгө оруулалтаар бүтээн босголтын ажил хийж байна.
“Ерөнхийлөгч та манай ӨМӨЗО-нд айлчилж байгаа явдлыг бид манай оронд үзүүлж байгаа онцгой анхаарал гэж үзэн талархан хүлээж авч байна. Өвөр Монгол бол хятад-монголын харилцааны чухал муж болохын хувьд, эдийн засаг худалдаа, соёл боловсрол, хүмүүнлэгийн салбарыг эрчимтэй хөгжүүлэх саналтай байна. Өвөр Монгол нь өөр бусад найман мужтай хиллэдгийн хувьд манай оронтой худалдаа хөгжүүлэхээс гадна, бусад мужтай худалдаа хөгжүүлэх гүүр болох сайхан боломжтой юм.
Бид өндөр хурдны зам, ачааны тэрэгний зам, мөн галт тэрэгний замуудыг шинээр тавьж байна. Бээжин-Хөх хот, Хөх хот-Шинян гэсэн чиглэлээр өндөр хурдны зам тавигдана. Энэ нь хоёр орны хувьд худалдаа эргэлтийг нэмэгдүүлэхэд томоохон дэмжлэг үзүүлэх нь дамжиггүй” хэмээн ӨМӨЗО-ны НХ-ны нарийн бичгийн дарга бөгөөд, ӨМӨЗО-ны АТИХ-ын БХ-ны дарга Ху Чуньхуа ярилаа.
Ерөнхийлөгч Ц.Элбэгдорж , Монгол-Хятад улсуудын харилцааны гол гүүр нь Өвөр Монгол хэмээн онцлоод хоёр орны харилцааг хөгжүүлэх талаар саналаа хэллээ.
“Сүүлийн 10 жилийн дотор манай хоёр орны худалдаа эргэлтийн хэмжээ 20 дахин нэмэгдлээ. Үүний 80 хувь нь ӨМӨЗО-нд ногдож байгаа нь танай орон 2 улсын эдийн засаг, худалдааны хувьд ямар чухал үүрэгтэй болох нь харагдаж байна. Бид дамжин өнгөрөх тээврийн асуудлаар тодорхой яриа хэлцлүүдийг хийх шаардлага байгаа. Монгол Улсаас Өвөр Монголд сурч байгаа оюутнуудын тоо жилээс жилд нэмэгдэж байна. Цаашдаа хоёр орны харилцаа дэд бүтэц, уул уурхайн салбарт эрчимтэй хөгжих хандлага байгаа тул энэ чиглэлээр боловсон хүчин бэлдэхэд дэмжлэг үзүүлэхийг хүсье. Мөн бид хилийн боомтуудын үйл ажиллагааг өргөтгөхийг чухалчилж байна. Бид Ху Жинтао даргатай өргөтгөсөн хэлэлцээ хийж, хоёр орны соёлын харилцааны тухай хэлэлцээр байгуулсан. Энэ хүрээнд Бээжин хотод төдийгүй Хөх хотод соёлын төв байгуулах нь чухал гэж үзэж байгаа” гэж Ерөнхийлөгч ярилаа.
Уул уурхай, хөдөө аж ахуйн чиглэлийн эцсийн бүтээгдэхүүн үйлдвэрлэж гуравдагч заах зээлд гаргахад хамтран ажиллах, аялал жуулчлалыг хөгжүүлэх, байгалийн гамшиг, цөлжилттэй хамтран тэмцэх талаар мөн уулзалтанд оролцогсод санал солилцлоо.
Ерөнхийлөгч Ц.Элбэгдорж энэ өдөр мөн Өвөр Монгол-Монголын ажил хэрэгч хүмүүсийн уулзалтыг нээж үг хэлсэн. Мөн ӨМӨЗО-ны Монгол Судлалын сургуулийн үйл ажиллагаатай танилцав. Дараа нь салхин сэнсний “Вистас” үйлдвэрийг үзэж сонирхов.
Орой нь , Хөх хотод нээлтээ хийсэн “Монголын соёлын өдрүүд”-ийн хүрээнд болсон хүндэтгэлийн концертыг үзэж сонирхов. Ардын язгуур урлаг, дэлхийн сонгодог бүтээлүүд, рок попынхны хамтарсан тоглолт сайхан болж, Өвөр Монголын үзэгчдийн таашаалыг өндрөөр хүлээсэн юм.
