Өнөөдөр Монгол Улсын Ерөнхийлөгч Цахиагийн Элбэгдорж “Монголын Ногоон Эвсэл”-ийн Ерөнхий зохицуулагч О.Бум-Ялагч, “Монголын Үндэсний Ногоон Хөдөлгөөн”-ий тэргүүн А.Саруул, “Туул гол хамгаалах хөдөлгөөн”-ий тэргүүн Ц.Туяацэцэг нарыг хүлээн авч уулзлаа.
Тэд саяхан Тайваны Тайпай хотноо болсон “Ази, Номхон далайн ногоон сүлжээ” байгууллагын 10 дугаар чуулга уулзалтад оролцоод ирсэн бөгөөд тус чуулганаас Монгол Улсын байгаль орчныг хамгаалах талаар тодорхой саналууд гаргажээ.
Тус чуулганаас Монгол Улсад хандан, Монгол Улсад байгаль орчны экологийн тэнцвэрийг алдагдуулж буй “Алт хөтөлбөр”-ийг зогсоох, мөн ураны олзворлох хуулийг эргэн харах, хүний эрүүл аюулгүй орчинд амьдрах эрх ноцтойгоор зөрчигдөж буй жишээ болох Хонгор сумын асуудлыг олон улсад ил болгох гэсэн гурван зүйлээр санал гаргажээ.
Мөн тус хурлаас Монгол Улсын Ерөнхийлөгчийн цаазаар авах ялын эсрэг хориг тавьсан шийдвэрийг талархан дэмжиж байгаагаа илэрхийлж Монголын төлөөлөгчдөөр дамжуулан уламжилсан байна.
