Та хуулийн төслийн саналаа tsagaan@president.mn, bayartsetseg@president.mn, хаягаар ирүүлнэ үү.
Төсөл
МОНГОЛ УЛСЫН ХУУЛЬ
2009 оны ….дугаар сарын ….ны | Улаанбаатар өдөр хот |
МОНГОЛ УЛСЫН ИХ ХУРЛЫН ЧУУЛГАНЫ
ХУРАЛДААНЫ ДЭГИЙН ТУХАЙ ХУУЛЬД НЭМЭЛТ,
ӨӨРЧЛӨЛТ ОРУУЛАХ ТУХАЙ
1 дүгээр зүйл. Монгол Улсын Их хурлын чуулганы хуралдааны дэгийн тухай хуулийн 21 дүгээр зүйлийн 21.2 дахь хэсгийн “дүгнэлт гаргасан” гэсний дараа “Монгол Улсын Ерөнхийлөгч саналаа илэрхийлсэн бол” гэж, 21 дүгээр зүйлийн 21.6 дахь хэсгийн “заасны дагуу” гэсний дараа “Монгол Улсын Ерөнхийлөгч,” гэж, 21 дүгээр зүйлийн 21.13 дахь хэсгийн “Байнгын хорооны” гэсний дараа “Монгол Улсын Ерөнхийлөгч” гэж тус тус нэмсүгэй.
2 дугаар зүйл. Монгол Улсын Их хурлын чуулганы хуралдааны дэгийн тухай хуулийн 18 дугаар зүйлийн 18.2, 21 дүгээр зүйлийн 21.11 дахь хэсгийг дор дурдсанаар өөрчлөн найруулсугай.
1/ 18 дугаар зүйлийн 2 дахь хэсэг:
“18.2. Энэ хуулийн 18.1-д заасны дагуу хуваарилсан төсөл, түүнд хавсаргасан баримт бичгийг уг төслийг Байнгын хорооны хуралдаанаар хэлэлцэж эхлэхээс 7-оос доошгүй хоногийн өмнө холбогдох Байнгын хороо нийт гишүүд мөн Монгол Улсын Ерөнхийлөгчид хүргүүлнэ”.
2/ 21 дүгээр зүйлийн 11 дэх хэсэг:
“21.11. Байнгын хороо төслийн анхны хэлэлцүүлэг явуулах үед гишүүд, Монгол Улсын Ерөнхийлөгч буюу түүний бие төлөөлөгч хууль санаачлагаас асуулт асууж, саналаа урьдчилан бичгээр томъёолж хуралдаан даргалагчид өгсний үндсэн дээр саналын үндэслэлээ тайлбарлан 5 минутаас илүүгүй хугацаанд үг хэлж санал хураалгах, санал нь олонхийн дэмжлэг аваагүй бол нэгдсэн хуралдаанд зарчмын зөрүүтэй саналаа тайлбарлан үг хэлж санал хураалгах хүсэлтээ Байнгын хорооны санал, дүгнэлтэд тусгуулж болно”.
3 дугаар зүйл. Энэ хуулийг 2009 оны …дугаар сарын …-ны өдрөөс эхлэн дагаж мөрдөнө.
ГАРЫН ҮСЭГ
Монгол Улсын Их Хурлын чуулганы хуралдааны дэгийн тухай
хуульд нэмэлт, өөрчлөлт оруулах тухай хуулийн төслийн танилцуулга
Монгол Улсын Их Хурлын чуулганы хуралдааны дэгийн тухай хуульд, Монгол Улсын Ерөнхийлөгч хуулийн төслийн талаар хэрхэн санал гаргах, санал гаргасан тохиолдолд уг саналыг байнгын хорооны болон нэгдсэн чуулганы хуралдаанаар хэрхэн хэлэлцэх талаар тодорхой хуульчлан тогтоогоогүй байна. Монгол Улсын Ерөнхийлөгчийн хуулиар тогтоосон эрхийг хэрэгжүүлж, хууль тогтоох үйл ажиллагаа болон Улсын Их Хурал, түүний бүтцийн байгууллагуудтай бүтээлчээр хамтран ажиллах боломжийг нэмэгдүүлэх үүднээс Улсын Их Хурлын чуулганы хуралдааны дэгийн тухай хуульд нэмэлт оруулах дараахь санаачлагыг гаргаж байна.
Монгол Улсын Үндсэн хуулийн гучин гуравдугаар зүйлийн 3 дахь хэсэгт “Ерөнхийлөгч Монгол Улсын Их Хуралд болон ард түмэндээ хандан илтгээлт гаргаж, чуулганд өөрийн тааллаар оролцон улс орны дотоод, гадаад байдлын нэн чухал асуудлаар мэдээлж, саналаа оруулж болно”, Монгол Улсын Ерөнхийлөгчийн тухай хуулийн 12 дугаар зүйлийн 7 дахь хэсэгт “Хууль санаачлагчаас Улсын Их Хуралд өргөн мэдүүлсэн хуулийн төслийн талаар саналаа илэрхийлж болно” гэж тус тус заасан нь энэхүү хуулийн төслийг боловсруулах зарчмын үндэслэл болж байна.
Энэхүү хуулийн төсөлд дараахь харилцааг зохицуулахаар тусгалаа.
- Байнгын хорооны хуралдаанаар хэлэлцэж эхлэхээс өмнө, аливаа хууль санаачлагч нь хуулийн төсөл болон түүнд хавсаргасан баримт бичгийн хувийг Монгол Улсын Ерөнхийлөгчид хүргүүлэх,
- Ерөнхийлөгч тодорхой нэмэлт санал илэрхийлсэн бол Ерөнхийлөгчийн Тамгын газар, түүнийг санал хураалгах томъёоллын хамт, холбогдох Байнгын хороонд хүргүүлэх,
- Тухайн Байнгын хороо нь Ерөнхийлөгчөөс ирүүлсэн саналын томъёоллыг нэг бүрчлэн хэлэлцэн санал хураалт явуулж олонхийн санал авсан, аваагүйгээр нь бүлэглэн нэгдсэн хуралдаанд танилцуулж санал хураалгах,
- Байнгын хороо төслийн анхны хэлэлцүүлэг явуулах үед Монгол Улсын Ерөнхийлөгч буюу түүний бие төлөөлөгч хууль санаачлагчаас асуулт асууж, саналаа урьдчилан бичгээр томъёолж, хуралдаан даргалагчид өгсний үндсэн дээр саналаа үндэслэлээ тайлбарлан үг хэлж санал хураалгах, санал нь олонхийн дэмжлэг аваагүй бол нэгдсэн хуралдаанд зарчмын зөрүүтэй саналаа тайлбарлан үг хэлж санал хураалгах хүсэлтээ Байнгын хорооны санал, дүгнэлтэд тусгуулах,
- Монгол Улсын Ерөнхийлөгчөөс санал болгосон томъёоллоор санал хураалт явуулсан тохиолдолд төслийн томъёолол хажуугийн саналд тооцогдохоор тус тус тусгасан болно.
МОНГОЛ УЛСЫН ЕРӨНХИЙЛӨГЧ
Монгол Улсын Их Хурлын чуулганы хуралдааны дэгийн тухай
Хуульд нэмэлт, өөрчлөлт оруулах тухай хуулийн төслийн
үзэл баримтлал
Нэг.Хуулийн төсөл боловсруулах болсон үндэслэл, шаардлага
Монгол Улсын Үндсэн хуулийн Гучин гуравдугаар зүйлийн 3 дахь хэсэгт “Ерөнхийлөгч Монгол Улсын Их Хуралд болон ард түмэндээ хандан илгээлт гаргаж, чуулганд өөрийн тааллаар оролцон улс орны дотоод, гадаад байдлын нэн чухал асуудлаар мэдээлж, саналаа оруулж болно”, Монгол Улсын Ерөнхийлөгчийн тухай хуулийн 12 дугаар зүйлийн 7 дахь хэсэгт “Хууль санаачлагчаас Улсын Их Хуралд өргөн мэдүүлсэн хуулийн төслийн талаар саналаа илэрхийлж болно” гэж тус тус заасан нь энэхүү хуулийн төслийг боловсруулах үндэслэл болно.
Монгол Улсын Их Хурлын чуулганы хуралдааны дэгийн тухай хуульд Монгол Улсын Ерөнхийлөгч хуулийн төслийн талаар хэрхэн санал гаргах, санал гаргасан тохиолдолд уг саналыг байнгын хорооны болон нэгдсэн чуулганы хуралдаанаар хэрхэн хэлэлцэх талаархи заалт байхгүйгээс Монгол Улсын Ерөнхийлөгч хуулиар олгосон бүрэн эрхээ бодитойгоор хэрэгжүүлэх боломжгүй байх тул Монгол Улсын Их Хурлын чуулганы хуралдааны дэгийн тухай хуульд нэмэлт оруулах шаардлагатай гэж үзлээ.
Хоёр. Хуулийн төслийн хамрах хүрээ
Монгол Улсын Их Хурлын чуулганы хуралдааны дэгийн тухай хуульд нэмэлт оруулах тухай хуулийн төслөөр уг хуулийн 18 дугаар зүйлийн 18.2, 21 дүгээр зүйлийн 21.2, 21.6, 21.11, 21.13 дахь хэсгүүдэд нэмэлт оруулж Улсын Их Хурлаар хэлэлцэж буй хуулийн төсөлд Ерөнхийлөгч санал оруулсан тохиолдолд байнгын хороо түүнийг хэлэлцэх үйл явцыг зохицуулсан.
Гурав. Хуулийн төсөл батлагдсаны дараа үүсэж болох нийгэм, эдийн
засаг, хууль зүйн үр дагавар, тэдгээрийг шийдвэрлэх талаар
авч хэрэгжүүлэх арга хэмжээний санал
Монгол Улсын Их Хурлын чуулганы хуралдааны дэгийн тухай хуульд нэмэлт оруулах тухай хууль батлагдсанаар Монгол Улсын Ерөнхийлөгч Үндсэн хууль болон Ерөнхийлөгчийн тухай хуульд заасан бүрэн эрхээ хууль хэлэлцэх явцад бүрэн хэрэгжүүлэх эрх зүйн үндэслэлтэй болно.
Дөрөв. Хуулийг хэрэгжүүлэхтэй холбогдон цаашид шинээр
боловсруулах буюу нэмэлт, өөрчлөлт оруулах, хүчингүй
болгох хуулийн талаар
Энэхүү хуулийн төсөлтэй холбогдуулан нэмж боловсруулах хуулийн төсөл байхгүй болно.
МОНГОЛ УЛСЫН ЕРӨНХИЙЛӨГЧ
