Өнөөдөр Монгол Улсын Ерөнхийлөгчийн Тамгын газрын дарга Д.Дорлигжав, Ерөнхийлөгчийн зөвлөх Р.Болд, БСШУЯ-ны Ерөнхий боловсролын газрын дарга Д.Эрдэнэчимэг нар “Монголын уламжлалт сэтгэлгээ ба арга билгийн ухааны үндэс” хичээлийн тухай Монгол Улсын Ерөнхийлөгчийн зарлиг гарах гэж буйтай холбогдуулан хэвлэлийн хурал хийв.
Дээрх зарлигийн төсөл нь удахгүй 2010 оны 5 дугаар сарын 13-нд Иргэний танхимаар хэлэлцэгдэх бөгөөд дараах хоёр үндсэн хэсэгтэй байна.
Зарлигийн нэгдүгээр зүйлд, Ерөнхий боловсролын суралцагчдад үндэсний үнэт зүйлс, соёл, уламжлалт сэтгэлгээ, зан заншлын нийтлэг хэм хэмжээг таниулах зорилгоор “Иргэний боловсрол” хөтөлбөрийн хүрээнд заавал судлах “Монголын уламжлалт сэтгэлгээ ба арга билгийн ухааны үндэс” хичээлийг хавсралтын үндсэн агуулгыг баримтлан батлан хэрэгжүүлэхийг Засгийн газарт чиглэл болгосон байна. Уг хавсралтад нь 1-ээс 6 дугаар ангийн сурагчдад зориулсан 210 цагийн багц хичээл, 7-гоос 9 дүгээр ангийн сурагчдад зориулсан 105 цагийн багц хичээл, 10-аас 12 дугаар ангийнханд зориулсан 105 цагийн багц, нийт 12 жилийн турш 420 цагийн хичээлийг оруулах хөтөлбөрийг оруулжээ.
Зарлигийн төслийн хоёр дахь хэсэгт улс үндэстнийхээ оюуны биет ба биет бус өв соёл, үнэт зүйлс, уламжлалт зан заншлыг өвлөх, хадгалах, хамгаалах, судлах, сурталчилах хөдөлгөөн өрнүүлэхийг нийт ард иргэд, айл өрх, төрийн ба төрийн бус байгууллага, урлаг соёлын болон бүх шатны боловсролын байгууллагын ажилтнуудад уриалсан байна.
Тус хичээлийн хөтөлбөрийг хэрэгжүүлэхтэй холбогдсон сурах бичиг хэвлэх, багш боловсон хүчин бэлтгэх, давтан сургах, мэргэжил дээшлүүлж сургалт зохион байгуулах ажлыг БСШУЯ судалж байгаа бөгөөд Зарлиг гармагц хэрэгжүүлж эхлэх юм байна.
Ерөнхийлөгчийн Тамгын газрын дарга Д.Дорлигжав хэвлэлийн хурлын үеэр хэлэхдээ, “Уламжлалт сэтгэлгээ, арга билгийн ухааны үндсийг монгол хүнийг бага балчирд нь ойлгуулж, сургаж хэвшүүлэх нь эх оронч сэтгэлгээтэй, шинэ үеийн жинхэнэ монгол хүний хүмүүжил төлөвшихөд онцгой ач холбогдолтой бөгөөд Ерөнхийлөгчийн бүрэн эрхийнхээ хүрээнд санаачилж буй томоохон ажил болох болно” гэж онцлон тэмдэглэв.
