Хүн төрөлхтөний түүхэн дэх хамгийн аймшигт дайн, бас хамгийн гайхамшигт ялалт болон тэмдэглэгдсэн Аугаа их Эх орны дайны ялалтын 65 жилийн ойн баярыг ОХУ, тусгаар улсуудын хамтын нөхөрлөлийн орнууд, Зөвлөлтийн холбоотон байсан улсууд хамтдаа тэмдэглэх гэж байна.
Дэлхийн 2-р дайнд хамгийн том үүрэгтэй оролцож, хамгийн их хохирол амссан Оросын ард түмний хувьд энэ өдөр онцгой чухал өдөр билээ. Дайны уршгаар амиа алдсан, сүйрч устсан хот тосгодын тоог өнөөг хүртэл эцэслэн тогтоож чадаагүй ч, гурван тивийн 61 улсыг хамарч, 50 гаруй сая хүний аминд хүрсэн энэ дайнд Зөвлөлтийн ард түмэн 26 сая 600 мянган хүнээ алдсан юм. Ямар үнэ цэнээр ялалт олдсоныг мартаагүй бөгөөд, мартах ч учиргүй гэдгийг жил бүрийн 5-р сарын 9-нд Оросын ард түмэн бүх дэлхийд харуулдаг юм.
Түүхт ялалтын баяраа тэмдэглэхээр Москва болон, дэлхийн 70 гаруй том жижиг хот бэлэн болоод байна.
Энэ өдөр Оросын болон хуучин ЗХУ-ын бүрэлдэхүүнд байсан улс орнуудын ард түмэнд хүндэтгэл үзүүлж, түүхт ялалтын баяры нь хамтдаа тэмдэглэхээр ОХУ-ын нийслэл Москва хотод дэлхийн 30 орчим орнуудын Төр, засгийн тэргүүнүүд хүрэлцэн ирээд байна. Тэдний дунд Монгол Улсын Ерөнхийлөгч Ц.Элбэгдорж, БНХАУ-ын дарга Ху Жинтао, ХБНГУ-ын Канцлер А.Меркель, БНФУ-ын Ерөнхий Сайд Франсуа Филлон, Израилийн Ерөнхийлөгч Ш.Перес,Вьетнам улсын Ерөнхийлөгч Нгуен Минь Чиен, болон Туркменистан, Белорусь, Узбекистан, Молдав, Болгар, Украин, Словак, Таджикистан зэрэг Улсуудын Ерөнхийлөгч нар байна.
Улс орнуудын Төр засгийн тэргүүнүүд 5-р сарын 9-нд Улаан талбайд болох цэргийн ёслолын жагсаалд оролцох юм.
