Монгол Улс, Германы фашистууд ЗХУ-д халдсан эхний өдрөөс хойш Зөвлөлтийн ард түмний хийсэн тэмцэлд нэгдэн орсон билээ. Эх орны дайнд холбоотнууд ялалт байгуулахад Монголын ард түмний зүгээс үзүүлсэн эд материалын туслалцаа нь эдийн засгийн хувьд төдийгүй, сэтгэл санааны хувьд асар их дэмжлэг болж байсныг өнөөдөр оросын ард түмэн мартаагүй болохыг энэ өдрүүдэд хэвлэл мэдээллийн хэрэгслээс харж болохоор байгаа юм.
Түүнчлэн энэ өдрүүдэд хөлд дарагдаж, хүн тасардаггүй газруудын нэг болох Поклонная Уулан дахь Аугаа их Эх орны дайны ялалтын Төв музейд хадгалагдаж байгаа олон баримт энэ дайнд Монголын ард түмний оролцсон түүхэн гавъяаг харуулж байна.
Монгол Улсын Ерөнхийлөгч Ц.Элбэгдорж, Батлан хамгаалахын сайд Л.Болд нарын тэргүүтэй төлөөлөгчид уг музейг үзэж сонирхсон юм.
Баатруудын алдрын танхим, Эгэл цэргүүдийн хүндэтгэлийн танхим зэргээс гадна Ленинградын бүслэлт, Сталинградын тулалдаан, Москва орчмын тулалдаан, Берлиныг эзэлсэн нь зэрэг түүхэн том тулаан бүрийг харуулсан танхимуудтай , Дэлхийн 2-р дайны тухай өгүүлсэн ховор нандин үзмэр, баримтуудтай манай гариг дээрх хамгийн том уг музейд Монгол Улс, монголын ард түмэнтэй холбоотой баримт, үзмэрүүд онцгой байр суурь эзэлж байна.
Тухайлбал, дайн зарласан өдөр буюу 1941 оны 6-р сарын 22-ны өдөр хуралдсан МАХН-ын Төв Хорооны тэргүүлэгчид, БНМАУ-ын Бага хурлын тэргүүлэгчид, Ардын сайд нарын зөвлөлийн хамтарсан хурлын тогтоол энэ музейд хадгалагдаж байна. Уг тогтоол нь зөвлөлтийн нутагт халдан довтолсон Германы фашистуудыг эрс буруушаан, жигшин зэмлэхийн зэрэгцээ, Монголын ард түмэн “Бүхнийг фронт руу, бүхнийг ялалтын төлөө” өгөхөөр шийдвэрлэж байгааг зарлан тунхагласан юм.
Шилэн хоргонд байх хагас богино, нэхий дээлийн талаар Аугаа их Эх орны дайны Төв музейн захирал, дэслэгч генерал В.И.Забаровский хэлэхдээ “ Өвлийн дүн хүйтэнд болсон Москваг чөлөөлөх тулалдаанд манай цэргүүд ялсан нь Монголын ард түмнээс ирүүлсэн 15 мянган нэхий дээл, эсгий гутал, нэхий бээлийтэй холбоотой” гэсэн юм.
Монголын ард түмнээс Зөвлөлтийн ард түмэнд бэлэглэсэн “Хувьсгалт Монгол” танкийн цуваа, нисэх эскадрилийг фронтод хэрхэн баярлан хүлээн авч байгааг харуулсан гэрэл зургууд онцгой сэтгэгдэл төрүүлнэ.
