Бүгд Найрамдах Индонез Улсаас Монгол Улсад суух Онц бөгөөд Бүрэн эрхт Элчин сайд Имрон Котан Монгол Улсын Ерөнхийлөгч Ц.Элбэгдоржид итгэмжлэх жуух бичгээ өнөөдөр барилаа.
Жуух бичгээ барьсантай нь холбогдуулан хүлээн авч уулзах үеэрээ, Монгол Улсын Ерөнхийлөгч, ноён Имрон Котаныг Элчин сайдаар ажилллах хугацаанд хоёр талын харилцаанд ихээхэн ахиц өөрчлөлт гарна гэдэгт итгэлтэй байгаагаа илэрхийллээ.
Монгол Улс, БНИндонез Улстай ашигт малтмал, уул уурхай, эрчим хүч, худалдаа хөрөнгө оруулалт болон боловсрол, аялал жуулчлалын салбарт хамтын ажиллагааг эрчимжүүлэх сонирхолтой байдаг.
Хоёр талын харилцааг шинэ агуулгаар баяжуулж, харилцан ашигтай эдийн засгийн хамтын ажиллагааг хөгжүүлэх боломж бий” гээд ядуурлыг бууруулж, терроризм, авилгатай тэмцэх чиглэлээр Индонезийн туршлагыг судлах, хамтран ажиллах сонирхолтой байгаагаа илэрхийллээ.
Элчин сайд Имрон Котан, Монгол Улсын Ерөнхийлөгчид БНИндонез Улсын Ерөнхийлөгчийн чин сэтгэлийн мэндчилгээг уламжлаад, хоёр орны харилцааг хөгжүүлэхийн төлөө чармайн ажиллах болно гэлээ. Элчин сайд “Манай улсын бизнес эрхлэгчид хөрөнгө оруулагчид Монгол Улсыг сонирхдгийн нэг адил монголын бизнесменүүд хамтран ажиллах сонирхол их байгааг би тэдэнтэй уулзаад мэдлээ.
Ялангуяа дэд бүтэц, худалдаа, эдийн засгийн салбарт бидэнд харилцан ашигтай ажиллах боломж бий гэж Таны хэлж байгаатай санал нэг байна” гээд харилцаа хамтын ажиллагааг өргөжүүлэх талаар зарим тодорхой саналуудаа хэллээ.
Монгол Улс, БНИндонез Улсын хооронд өндөр дээр хэмжээний айлчлалыг тогтмолжуулах, бүс нутгийн олон талт хамтын ажиллагаанд идэвхтэй хамтран ажиллах зэрэг асуудлуудаар мөн санал солилцов.
Монгол Улсын Ерөнхийлөгч 1997 онд, Монгол Улсын Ерөнхий сайд 2002 онд БНИндонез Улсад, харин БНИндонез Улсын Ерөнхийлөгч 2003 онд Монгол Улсад тус тус айлчилж байсан юм.
БНИндонез Улс техникийн хамтын ажиллагааны хөтөлбөртөө Монгол Улсыг хамруулж, эрүүл мэнд, мэдээллийн технологи, цахилгаан холбоо болон хөдөө аж ахуй, ус цаг уурын мэдээллийн чиглэлээр манай мэргэжилтнүүдийг сургаж байна.
БНИндонез Улсаас Монгол Улсад суух Онц бөгөөд Бүрэн эрхт Элчин сайд Имрон Котан нь Женев, Австрали улсуудад улсаа төлөөлөн ажиллаж байсан туршлагатай дипломат юм байна.
