Энэ Мягмар гараг буюу 5 дугаар сарын 11-ний өдөр Монгол Улсын аюулгүй байдлын тулгуур баримт бичиг болох Үндэсний аюулгүй байдлын үзэл баримтлалын төслийг Стратегийн судалгааны хүрээлэнгийн дэргэдэх Аюулгүй байдал, гадаад бодлогын зөвлөлөөр хэлэлцүүллээ.
Тус Бодлогын зөвлөл нь П.Очирбат, Д.Бямбасүрэн, Ц.Гомбосүрэн, Б.Чимид зэрэг манай улсын нийгэм, улс төрийн нэрт зүтгэлтнүүд, Д.Энхбат, С.Оюун, Х.Тэмүжин, Ж.Энхбаяр зэрэг Улсын Их Хурлын гишүүд, эрдэмтэн судлаачид, бизнесийн төлөөллөөс бүрдэж буй бөгөөд Б.Батбаяр буюу Баабар зөвлөлийн даргаар сонгогдон ажиллаж байгаа юм.
Энэ Мягмар гарагт болсон хоёр дахь хурлаараа тус зөвлөл Үндэсний аюулгүй байдлын үзэл баримтлалын төсөлтэй танилцан, үнэтэй санал зөвлөлгөөгөө хүргэсэн ба зөвлөлийн гишүүд улс орны өмнө тулгамдаж буй аюулгүй байдлын чухал асуудлыг хөндөн ярилцаж, тус үзэл баримтлалын төслийг улам боловсронгуй болгоход цаашид ч хамтран ажиллахаа мэдэгдлээ.
