Өнөөдөр Монгол Улсын Ерөнхийлөгч Цахиагийн Элбэгдоржид Бүгд Найрамдах Филиппин Улсаас Монгол Улсад хавсран суух Элчин сайд ноён Франциско Ло Бенедикто Итгэмжлэх жуух бичгээ өргөн барив.
Итгэмжлэх жуух бичиг барьсантай нь холбогдуулан Монгол Улсын Ерөнхийлөгч Ц.Элбэгдорж Бүгд Найрамдах Филиппин Улсаас Монгол Улсад суух Элчин сайдаар тохоон томилогдож ирсэнд нь ноён Ф.Л.Бенедиктод баяр хүргэж, хоёр улсын найрсаг харилцааг хөгжүүлэхэд Элчин сайд өндөр хувь нэмэр оруулна гэдэгт итгэлтэй байгаагаа илэрхийлэв.
Уулзалтын үеэр хоёр орны хамтын ажиллагааг хөгжүүлэх, ялангуяа аялал жуулчлал, боловсрол, соёлын харилцаа, бизнесийн хамтын ажиллагааг идэвхижүүлэх талаар өргөн хүрээнд ярилцсан бөгөөд Филиппин Улсын Засгийн газраас Монгол Улсын зудад нэрвэгдсэн аймаг, малчдад тусламж үзүүлж ирсэнд тусгайлан талархаж байгаагаа хэлэв.
Ерөнхийлөгч, Монгол Улс Зүүн өмнөд Азийн орнуудтай хоёр тал болон олон талын харилцааг хөгжүүлэхийг эрмэлзэж байдгийг тэмдэглээд, Монгол Улс АСЕАН-тай ойртон түншлэх, Зүүн Азийн дээд хэмжээний яриа хэлэлцээнд хамрагдахад ач холбогдол өгч байдгийг дурьдаж энэ чиглэлээр Монгол Улсын явуулж буй үйл ажиллагааг Филиппин Улс дэмжинэ гэдэгт итгэж буйгаа илэрхийлэв.
Монгол Улс, Филиппин Улсын хооронд 1973 оны 10 дугаар сарын 11-нд дипломат харилцаа тогтоосон байна.
Филиппин Улсаас Монгол Улсад суух Онц бөгөөд Бүрэн эрх Элчин сайдаар томилогдсон Ф.Л.Бенедикто нь 1964 онд Сан Жозе-Реколетос-ын Их сургуулийг худалдааны чиглэлээр төгсөж 1987 онд тус сургуульдаа хүмүүнлэгийн ухааны чиглэлээр докторын зэрэг хамгаалсан байна. Тэрээр 1986 оноос эхлэн Филиппин Улсаас Бүгд Найрамдах Сингапур, БНСУ, Бразил, Канад, Энэтхэг зэрэг улсуудад суух элчин сайдаар томилогдон ажиллаж ирсэн туршлагтай дипломатч юм.
