Монгол Улсын Ерөнхийлөгч Ц.Элбэгдорж “ Монголын уламжлалт сэтгэлгээ, арга билгийн ухааны үндэс” хичээлийн тухай зарлиг гаргах гэж буй билээ.
Ерөнхийлөгч зарлигийн төсөлдөө “… Монгол хүн бүрийг бага балчраас нь үндэсний уламжлалт соёл, ёс заншил, зан үйлд сургаж амьдрал ахуйд нь мөрдлөг болгон хэвшүүлэх хэрэгцээ, шаардлага зүй ёсоор урган гарч байна” гээд ерөнхий боловсролын сургуулийн суралцагчдад үндэсний үнэт зүйлс, соёл, уламжлалт зан заншлын нийтлэг хэм хэмжээг таниулах зорилгоор “ Иргэний боловсрол” хөтөлбөрийн хүрээнд заавал судлах “ Монголын уламжлалт сэтгэлгээ, арга билгийн ухааны үндэс “ хичээлийн үндсэн агуулгыг тодорхойлсон байна.
Уг зарлигийн төслийг Ерөнхийлөгчийн дэргэдэх “Иргэний танхим”-аар хэлэлцүүлэв.
Хэлэлцүүлэгт 80 шахам иргэн оролцож санал бодлоо илэрхийлсэн бөгөөд их дээд сургуулийн багш, эрдэмтэн судлаачид, Монголын ахмад багш нарын холбооны төлөөлөл, оюутан сурагчид, түүх соёлын зүтгэлтнүүд уг санаачилгыг талархан дэмжиж, цаг үеэ олсон, алсыг харсан, 21 дүгээр зуунд, цаашдаа Монголыг монголоор нь авч үлдэхэд үлэмж тустай, монгол хүүхдийн хүмүүжил соёлд чухал нөлөө үзүүлэх хөтөлбөр болжээ гэж дүгнээд агуулгын хүрээг улам сайжруулан, цаг алдалгүй хэрэгжүүлэх нь чухал гэж тэмдэглэв.
