Монгол Улсын Ерөнхийлөгч зарлиг гарган мод тарих үндэсний өдөртэй болсонтой холбогдуулан Ерөнхийлөгчийн зарлигаар зарим хүмүүст төрийн дээд одон, медаль гардууллаа.
Монгол Улсад Байгаль орчныг хамгаалах чиглэлээр үйл ажиллагаа явуулан, ой модыг хамгаалах, нөхөн сэргээх, үржүүлэх, олон нийтэд сурталчилах ажлыг олон жил үр бүтээлтэй хийж ирсэн нэр бүхий хүмүүст ийнхүү “Мод тарих үндэсний өдөр”-ийн анхны шагналыг хүртээв.
Хөдөлмөрийн Гавъяаны улаан тугийн одонгоор Сэлэнгэ аймгийн Ерөө сумын Бугант тосгоны иргэн Отгоны Алтанцэцэгийг, Алтангадас одонгоор Нийслэлийн Сонгинохайрхан дүүргийн иргэн Жаргалын Бяцхандаа, Өмнөговь аймгийн Гурвантэс сумын иргэн Жанчивын Даваа, Нийслэлийн Хан-Уул дүүргийн иргэн Баяртын Пүрэвжав нарыг, Хөдөлмөрийн хүндэт медалиар Нийслэлийн Сүхбаатар дүүргийн иргэн Дашдондогийн Насанбаяр нарыг тус тус шагналаа.
Шагнал гардуулах үеэр Монгол Улсын Ерөнхийлөгч хэлсэн үгэндээ, “Төрийн дээд шагнал хүртсэн иргэддээ Монгол Улсын ард түмний нэрийн өмнөөс, ялангуяа энэ буянтай үйлс бүтээж мод, бут сөөг, жимс, жимсгэнэ тарьж байгаль орчноо баярлуулж, хүрээлэн байгаа орчноо сайхан болгож бусдад үлгэр дууриал үзүүлж, хүмүүст эзэмшсэн дадлага туршлагаа сургаж байгаад тань чин сэтгэлийн талархал илэрхийлье. Байгаль орчноо хамгаалах нь зөвхөн төрийн хийдэг ажил биш, нийт иргэдийн оролцоотойгоор бүтдэг үйл хэрэг юм” гэж онцоллоо.
Дараа нь Ерөнхийлөгч шагнуулсан иргэдийнхээ намтар, танилцуулгаас нэг бүрчлэн дурьдаж, хөдөлмөр зүтгэлийг нь үнэлэн, бахархаж байгаагаа хэлсэн юм.
О.Алтанцэцэг нь Бугант группын “Номин-Од” ХХК-ийн захирал бөгөөд 1998 оноос эхлэн үйл ажиллагаагаа явуулж жилд 20-50 га талбайд ойжуулалт хийж 2895 га талбайг хамгаалалтандаа авч ажиллаж байна. Тэрээр 30 жилийн хугацаанд 806 сая нарсны тарьц бойжуулж, 6873 га талбайд 20.6 сая суулгацыг ойд шилжүүлэн суулгаж 60.4 сая тарьцыг улсын хэмжээний бусад аж ахуй нэгжүүдэд өгсөн байна. Мөн тэрээр өөрийн ойжуулсан 4736 га талбайн 14.2 сая модноос 1227 га талбай буюу 3.7 сая модыг ойн санд хүлээлгэн өгчээ.
Ж.Бяцхандаа нь тариалангийн салбарт тасралтгүй 32 дахь жилдээ ажиллаж байгаа бөгөөд 1999 оноос Фермер эмэгтэйчүүдийн холбоог байгуулан газар тариалангийн салбарт мэргэжилтэй ажилтан бэлтгэх, газар тариалан, туслах аж ахуй эрхлэх замаар орлого багатай өрхүүдийн өрхийн орлогыг нэмэгдүүлэх, нийслэлийн болон хөдөө орон нутгуудад өрхийн аж ахуйг хөгжүүлэхэд өндөр үр бүтээлтэй ажиллаж иржээ. Тэрээр энэ чиглэлээрээ найман төрлийн ном, 20 гаруй төрлийн гарын авлага гаргасан бөгөөд 2007 оноос мод үржүүлгийн чиглэлээр ажиллаж, байгаль орчныг хамгаалах, нөхөн сэргээх, хотын утааг багасагах талаар идэвхтэй ажиллаж ирсэн байна.
Ж.Даваа нь 1992 оноос эхлэн өнөөг хүртэл 10-17 метрийн өндөртэй 1000 орчим модыг тарьж ургуулаад байна. Тэрээр жилд 20000-30000 модны үрсэлгээ бойжуулж бусдад түгээж цөлжилтийн эсрэг тууштай тэмцэж байна.
Б.Пүрэвжав нь 1975 оноос эхлэн гацуур, царс, хуш, үхрийн нүд, давжаа алим, гүзээлгэнэ зэрэг 30 гаруй төрлийн 4000 гаруй мод, бут сөөг 6000 гаруй гоёлын цэцэг, 20 гаруй төрлийн хүнсний ногоо тарих өрхийн цэцэрлэг бий болгож үйл ажиллагаагаа явуулж иржээ. Сүүлийн жилүүдэд 100 гаруй оюутан, 300 гаруй сурагчид бусад ажил мэргэжлийн 150 гаруй иргэдэд мод, бут сөөг, цэцэш, хүнсний ногоо тарих хичээл зааж 40 гаруй өрхөд мод тарьж өгсөн бөгөөд 100 гаруй хүнийг ажлын байртай болгожээ.
Д.Насанбаяр нь сэтгүүлч мэргэжлээр 13 жил ажиллаж байгаа бөгөөд сүүлийн 5 жилийн турш байгаль орчны сэдвээр дагнан ажиллаж “Мод үгүйлсэн монгол гэр”, “Байгаль хамгаалахад хамтын оролцооны менежмент”, “бүх нийтээрээ мод тарьцгаая” зэрэг олон үр өгөөжтэй нэвтрүүлэг бүтээсэн бөгөөд нийт 12.000 минутын нэвтрүүлэг бүтээж үзэгчдийн хүртээл болгосон байна. Түүний нэвтрүүлгүүд гарснаас хойш 40.000 гаруй иргэн зөвлөгөө авч 130.000 гаруй өрх, 400 га талбайд 400.000 орчим бут сөөг тарих боломжийг бүрдүүлсэн гэсэн судалгаа гарчээ.
