Монгол Улсын Ерөнхийлөгч зарлиг гарган Монгол Улс, БНСУ-ын хоорондын хамтын ажиллагааг хөгжүүлэх, орон нутгийн иргэдийн амьдралыг сайжруулах олон төсөл, хөтөлбөрийг хэрэгжүүлэхэд оруулсан хувь нэмрийг нь үнэлж БНСУ-ын “Шинэ Тосгон” хөдөлгөөний Ерөнхийлөгч Лий Жей Чаныг “Найрамдал” медалиар шагнав.
Шагнал гардуулсынхаа дараа Монгол Улсын Ерөнхийлөгч Ц.Элбэгдорж ноён Лий Жей Чаныг хүлээн авч уулзсан бөгөөд “Монгол Улсад олон төсөл хөтөлбөр хэрэгжүүлж, хоёр орны иргэдийн хооронд үр өгөөжтэй хамтын ажиллагааг бий болгож, бүх нийтээрээ мод тарих бидний санаачилгыг дэмжиж байгаад баяртай байна” хэмээн онцлон хэллээ.
Уулзалтын үеэр ноён Лий Жей Чан хэлэхдээ, 1960-аад оны үеэр Солонгосын эдийн засаг хүнд нөхцөлд байхад “Нэг тосгон” хөдөлгөөнийхөн эдийн засгийг сэргээхэд маш том хувь нэмэр оруулсан. Монголын “Нэг тосгон” хөдөлгөөнийхөн ч бас Монгол Улсын эдийн засгийг улам эрчимтэй хөгжихөд хувь нэмрээ оруулна гэж бодож байна.
Бид Монгол Улсын Ерөнхийлөгчийн нэг хүн нэг мод тарих санаачилгыг бүрэн дэмжиж байгаа бөгөөд энэ нь манай зорилго, үйл ажиллагаанд бүрэн нийцэж байгаа. Монгол-Солонгос хоёр ард түмний харилцаа түүхийн хувьд баялаг уламжлалтай учраас бид Монгол Улсад хэрэгтэй, сайн зүйл хийхийн төлөө ажиллана” гэж хэллээ.
