Монгол Улсын Ерөнхийлөгч Ц.Элбэгдорж энэ сарын 18-ны өдөр Ардчилал, сонгуулийн туслалцааны хүрээлэнгийн Ази, Номхон далайн бүсийн захирал ноён Э.Эллис-ийг хүлээн авч уулзав.
Уулзалтын үеэр Монгол Улсын Ерөнхийлөгч Ц.Элбэгдорж Монгол Улсад ардчиллыг бэхжүүлэх үйл явц, сонгуулийн тогтолцооны асуудлаар санал солилцож, дэлхий дээр ардчилал, ардчилсан сонгуулийн чиглэлээр идэвхитэй үйл ажиллагаа явуулдаг Ардчилал, сонгуулийн туслалцааны хүрээлэнд Монгол Улсыг гишүүнээр элсүүлэх санаачилга гаргаад байгаагаа танилцуулав.
Швед Улсын Стокгольм хотод төвтэй Ардчилал, сонгуулийн туслалцааны хүрээлэн нь Ази тивд үйл ажиллагаагаа идэвхижүүлэх чиглэл барьж байгааг ноён Э.Эллис танилцуулж, Монгол Улсын ардчилсан тогтолцоог бэхжүүлэх, сонгуулийн хуулийг боловсронгуй болгох чиглэлээр хамтран ажиллахааар зорьж байгааг мэдээлэв.
Уулзалтын үеэр мөн Монгол Улсын ардчилсан тогтолцооны үнэлгээг хийх, энэ чиглэлээрх үндэсний мэргэжилтнүүдийг бэлтгэхэд хамтран ажиллах талаар ярилцав.
Ардчилал, сонгуулийн туслалцааны хүрээлэн нь Засгийн газар хоорондын байгууллага бөгөөд одоогоор тус байгууллагад Европ, Латин Америк, Африк, Азийн 25 улс гишүүн ажээ. Уг байгууллагын Ази, Номхон далайн бүсийн захирал ноён Э.Эллис нь сонгуулийн тогтолцооны асуудлаарх дэлхийн тэргүүлэх мэргэжилтнүүдийн нэг бөгөөд тэрээр айлчлалынхаа явцад Монгол Улсын Сонгуулийн Ерөнхий хороо болон улс төрийн намуудын удирдлага, түүнчлэн УИХ-ын сонгуулийн хуулийн өөрчлөлтийн асуудлаарх ажлын хэсгийнхэнтэй уулзаж ярилцжээ.
