Өнөөдөр Монгол Улсын Ерөнхийлөгч Цахиагийн Элбэгдорж Монгол Улсад албан ёсны айлчлал хийж буй БНЧУ-ын Засгийн газрын дарга ноён Я.Фишерийг Төрийн ёслол хүндэтгэлийн өргөөнд хүлээн авч уулзлаа.
Уулзалтын эхэнд Монгол Улсын Ерөнхийлөгч Чех Улсын Засгийн газрын тэргүүнийг Монгол Улсад тавтай морилохыг хүсээд одоогоос 20 жилийн өмнө Монгол Улс нь хуучин Дорнод Европын орнуудын адил хүн төрөлхтөний нийтлэг зүй тогтлын дагуу ардчилал, зах зээлийн харилцаанд шилжиж, өдгөө чөлөөт эдийн засагтай, ардчилсан засаглалтай, хүний эрх, эрх чөлөө, дэлхий нийтийн түгээмэл үнэт зүйлсийг дээдэлсэн улс болоод байгааг онцолсон юм. Мөн Ерөнхийлөгч, Монгол Улс, Бүгд Найрамдах Чех Улсын хооронд дипломат харилцаа тогтоосны 60 жилийн ой манай хоёр оронд ардчилсан хувьсгал өрнөсний 20 жилийн ойтой давхцаж буйд билэгшээж байгаагаа дурьдав.
Ерөнхийлөгч, “Чех Улс нь манай улс Европ дахь чухал түншүүдийн нэг бөгөөд хөгжлийн хамтын ажиллагааны хөтөлбөртөө Монгол Улсыг тэргүүлэх орны нэгэнд оруулж ирснийг тэмдэглэв.
Уулзалтын үеэр Ерөнхийлөгчийн онцолсон бас нэгэн зүйл нь Монгол Улс, БНЧУ-ын харилцаа, хамтын ажиллагаа өргөжин тэлэхэд боловсролын салбар дахь хамтын ажиллагаа тэргүүлэх үүрэг гүйцэтгэж ирснийг дурьдаж байв. Тухайлбал, Чехийн их, дээд сургуульд олон монгол оюутан төрөл бүрийн мэргэжлээр суралцаж төгссөн, одоо ч үргэлжлүүлэн суралцаж байгаа бөгөөд эдгээр оюутан залуус эх орныхоо хөгжил цэцэглэлтэд багагүй хувь нэмэр оруулж ирснийг тэмдэглэж, цаашид ч тэдний тоог нэмэгдүүлэх сонирхолтой байгаагаа илэрхийлсэн юм.
БНЧУ-ын Засгийн газрын дарга, ноён Ян Фишер, халуун дотноор хүлээн авч уулзсан Ерөнхийлөгч Ц.Элбэгдорж болон монголын ард түмэнд талархаж байгаагаа илэрхийлээд олон жилийн найрсаг хамтын ажиллагаатай Монгол Улстай БНЧУ нь улам бүр дотно харилцаатай, олон салбарт хамтран ажиллаж амжилтад хүрнэ гэдэгт итгэлтэй байгаагаа илэрхийлж, Ерөнхийлөгчийн дурдсан асуудлуудаар санал бодлоо илэрхийлэв.
Монгол Улс, Бүгд Найрамдах Чех Улсын хооронд 1993 оны 1 дүгээр сарын 1-нд дипломат харилцаа тогтоосон байна. Харин Монгол улс хуучин Чехословак Улстай 1950 оны 4 дүгээр сарын 25-нд дипломат харилцаа тогтоож, Улаанбаатар, Прага хотноо 1956 онд ЭСЯ-даа харилцан нээж байжээ.
Уулзалтын дараа Монгол Улсын Ерөнхийлөгч Ц.Элбэгдорж хоёр орны харилцаа, хамтын ажиллагааг хөгжүүлэхэд оруулсан хувь нэмрийг нь үнэлж сүүлийн 19 жилийн турш БНЧУ-ын Гадаад хэргийн тэргүүн дэд сайдаар ажиллаж байгаа хатагтай Х.Бамбасоваг “Алтан гадас” одонгоор шагнасан юм.
