Дэлхийн дулаарал, уур амьсгалын өөрчлөлтийн үр дагавар нь байгаль орчин, нийгэм, эдийн засагт нөлөөлж буй сөрөг нөлөөллийг бууруулах, уг нөхцөл байдалд дасан зохицох асуудал өнөөдөр улс орны болоод хүн бүрийн өмнө тулгарч байгаа амин чухал асуудлын нэг болоод байна.
Эх орон, байгаль дэлхийгээ хайрладаг уламжлалт монгол зан заншлаа дээдэлж, хүн бүр байгалиа нөхөн сэргээхэд гар бие оролцон, экологийн тэнцвэрт байдлыг хадгалах, Монгол Улсын төр засгаас ногоон байгууламж, ойн санг нэмэгдүүлэхээр хэрэгжүүлж байгаа олон талт ажлуудыг зохион байгуулалттай нэгдмэл үйл ажиллагаа болгон эрчимжүүлж, улмаар үндэсний хөдөлгөөн болгон өрнүүлэх зорилгоор эрдэмтэд, иргэдийн санал хүсэлтэнд тулгуурлан БОАЖЯам, Ойн газар, "Ногоон хэрэм" үндэсний хөтөлбөрийн ажлын алба, Нийслэлийн Байгаль Хамгаалах газар, иргэдийн саналыг авч холбогдох хуулийн заалтуудыг үндэслэн "Мод тарих үндэсний өдөр"-ийг зарлах тухай МУ-ын Ерөнхийлөгч 2010 оны 4 дүгээр сарын 14-ний өдрийн 63 тоот зарлиг гаргасан билээ. Түүнийг хэрэгжүүлэх, дэмжлэг туслалцаа үзүүлэх талаар яам, агентлагууд, ААН байгууллагууд, ТББ, аймаг орон нутаг болон хэвлэл мэдээллийн байгууллагуудад дэмжихийг уриалсан.
Энэхүү зарлигийг хэрэгжүүлэх талаар БОАЖЯамны сайдын албан даалгаврыг улс, орон нутгийн төрийн захиргааны байгууллагуудад хүргүүлж, "Мод тарих үндэсний өдөр"-өөр хийгдэх зохион байгуулалтын ажлын төлөвлөгөө гарган, иргэд байгууллагын дэмжлэгийг авч ажилласны үр дүнд 2010 оны 5 дугаар сарын 15-ны өдөр Монгол Улс даяар мод тарих үйл ажиллагаанд 5799 албан байгууллага, аж ахуйн нэгж, 93 мянган иргэн оролцож, нийт ХААН банкны онлайн сүлжээгээр авсан урьдчилсан мэдээгээр 408170 мод, бут сөөг тарьсан дүн мэдээ гарсан байна.
Энэ жил мод тарих ажлыг хийхдээ зөвхөн арчлах эзэн, төлөвлөгдсөн зардалтай газруудад мэргэжлийн байгууллагын зөвлөгөөний дагуу мод тарих ажлыг хийлээ.
"Мод тарих үндэсний өдөр"-ийг тохиолдуулан байгалиа нөхөн сэргээх, хамгаалах, мод тарьж ургуулах үйлсэд олон жил үр дүнтэй идэвх зүтгэлтэй ажилласан иргэдийн төлөөлөл болох нэр бүхий 6 хүнийг төрийн одон медалиар МУ-ын Ерөнхийлөгчийн зарлигаар шагнаж урамшууллаа.
МУ-ын Ерөнхийлөгч Цахиагийн Элбэгдорж болон ЕТГ-ын хамт олон мод тарих үндэсний өдрөөр Нийслэлийн Чингэлтэй дүүргээс санал болгосон санаачлагыг хүлээн авч 8.0 сая төгрөгний зардал гарган Нийслэлийн Чингэлтэй дүүргийн 56-р цэцэрлэгийг моджуулах, тохижуулах ажилд оролцож, гадна талбайн хүүхдийн иж бүрэн тоглоом бэлэглэсэн байна.
Цаашид мод тарих үндэсний өдрийн үйл ажиллагааг тогтмолжуулж, тарьсан модыг бие даан ургах чадвартай болсон үед нь иргэд ААН-ээс төр хүлээн авч, гаргасан зардал, модны төрөл, нас, өндрийг харгалзан худалдан авах арга механизмыг буй болгох зорилгоор МУ-ын Ерөнхийлөгчийн ивээл дор "Үндэсний ойн сан"-г байгуулан мод бут сөөг тарих, арчлах, хамгаалах чиглэлээр хийгдэх иргэд, ТББ, ААН-ийн төсөл, санаачлагыг дэмжиж ажиллахаар тус сангийн дүрмийн төслийг боловсруулан, сан байгуулах бэлтгэл ажлыг ханган ажиллаж байна.
