Монгол Улсын Ерөнхийлөгч Ц.Элбэгдоржийн санаачлагаар, Ерөнхийлөгчийн Тамгын газар, Давосын хэмээх тодотголтой “Дэлхийн эдийн засгийн форум” байгууллагатай хамтран эрдэс баялгийн салбарт хөрөнгө оруулах олон улсын загвар гэрээ байгуулах асуудлаар энэ оны 6-р сарын 17-18ны өдрүүдэд Улаанбаатар хотноо дугуй ширээний уулзалт-хурал зохион байгуулах гэж байна.
Энэ уулзалтын талаар Ерөнхийлөгчийн ахлах зөвлөх П.Цагаан хэлэхдээ:
“Ерөнхийлөгч Ц.Элбэгдорж өнгөрсөн жил Давосын эдийн засгийн чуулга уулзалтанд оролцох үеэрээ уул уурхайн салбарт хөрөнгө оруулах олон улсын загвар гэрээ байгуулах санал дэвшүүлсэн. Энэ санал нь Засгийн газрууд, хөрөнгө оруулагчид, төрийн бус байгууллага, олон нийтийн зүгээс дэмжлэг авсан юм. Дэлхий дээр олон янзын загвар гэрээ байгаа. Даяаршиж байгаа дэлхий ертөнцөд эрдэс баялгийн салбарт оролцдог бүх талуудын эрх ашгийн тэнцвэрийг хангасан загвар гэрээний төсөл боловсруулах нь хөгжиж байгаа орнууд, ялангуяа манай улсад онцгой чухал ач холбогдолтой байх болно. Энэ уулзалт туйлын ажил хэрэгч уур амьсгалд явагдах бөгөөд, уул уурхай, эрдэс баялагтай холбоотой үйл ажиллагаа явуулдаг, энэ салбарын үйл ажиллагаанд идэвхитэй оролцдог олон улсын банк санхүүгийн байгууллага, хөрөнгө оруулагчид, дэлхийн нэр хүндтэй хуульчид, санхүүчид, төрийн бус байгууллагын төлөөлөгчид оролцоно” гэлээ.
Энэхүү олон улсын арга хэмжээг Монгол Улсын Засгийн газар бүх талаар дэмжиж оролцох бөгөөд манай улсын банк санхүү, уул уурхай, төрийн бус байгууллагын төлөөлөгчид урилгаар оролцох юм байна.
