Өнөөдөр ОХУ-ын Свердловск мужийн Захирагч А.С.Мишарин Монгол Улсын Ерөнхийлөгчид бараалхав. Уулзалтын эхэнд Ерөнхийлөгч ноён А.С.Мишарин Свердловск мужийн Амбан захирагчийн албанд томилогдсон явдалд баяр хүргээд, ОХУ-ын аж үйлдвэр, уул уурхайн салбарын уламжлалтай, чухал мужийн удирдлага томоохон бүрэлдэхүүнтэй Монгол Улсад албан ёсны айлчлал хийж байгаад сэтгэл хангалуун байгаагаа хэлсэн юм.
Ерөнхийлөгч, “Таны айлчлалын хүрээнд Свердловск мужийн бизнес төлөөлөгчид манай талын ажил хэрэгч хүмүүстэй уулзан, холбоо тогтоож, манай орон, эдийн засаг, бизнесийн боломжийн талаар тодорхой ойлголттой болж байгаа нь олзуурхууштай байна” гэж онцолсон юм.
Ерөнхийлөгч цааш өгүүлэхдээ, “Монгол Улсад сүүлийн жилүүдэд томоохон ашигт малтмалын орд газруудыг эзэмших ажил далайцтай өрнөж байна. Үүнд гадаад дотоодын хөрөнгө оруулалтыг татах, ялангуяа уул уурхайн салбарт туршлага ихтэй улс орон, байгууллагуудтай хамтын ажиллагааг хөгжүүлэх зорилго тавин ажиллаж байна. Энэ утгаараа манай хойд хөрш, түүний дотор Свердловск мужийн томоохон бизнесийн төлөөлөл нөхцөл байдлыг газар дээр нь үзэж сонирхох бүрэн боломж бий” гэв.
“Монгол, Оросын харилцаа сүүлийн жилүүдэд ахицтай хөгжиж байгаа бөгөөд, ялангуяа соёл, боловсрол, шинжлэх ухааны салбарын харилцаа мэдэгдэхүйц өргөжиж байгаа юм. ОХУ-ын бүс нутгуудын их, дээд сургуулиудад манай олон оюутан амжилттай суралцаж байна. Зөвхөн Эрхүү хотод гэхэд 800 гаруй монгол оюутан суралцаж буй. Иймээс Уралын нэр хүндтэй их, дээд сургуулиудыг манай залуучуудын дунд суралчилж, манай улсын эдийн засгийн хэрэгцээ болсон уул уурхайн боловсон хүчин бэлтгэхэд танай муж оролцох бүрэн боломжтой” гэж Ерөнхийлөгч нэмж хэлэв.
Свердловск мужийн Екатеринбург хотноо 70 гаруй монгол оюутнууд сурч буй бөгөөд Монгол улсын уул уурхайн мэргэжилтнүүдийн тал хувь нь Уралын политехникийн сургууль, Уралын уулын дээд сургуулийн төгсөгчид юм.
Уулзалтын үеэр ноён, Александр Сергеевич Монгол оронд айлчлан ирж олон чухал хүмүүстэй танилцаж байгаадаа баяртай байгаагаа хэлээд төмөр зам, уул уурхай, боловсруулах үйлдвэрийн салбар болон бизнес, боловсролын салбарт өргөн хүрээнд хамтран ажиллах хүсэлтэй байгаагаа хэлсэн юм.
Уулзалтын төгсгөлд Уралын Улсын Их Сургуулийн ректор Петрович Ковазерийг Монгол-Оросын харилцаанд оруулсан хувь нэмрийг нь үнэлж Монгол улсын Ерөнхийлөгч Алтан гадас одонгоор шагнасан юм.
