Монгол Улсын Ерөнхийлөгчийн Тамгын газрын
даргын 2010 оны 05 дугаар сарын 13-ны
өдрийн 51 дүгээр захирамжийн хавсралт
Нэг.Нийтлэг үндэслэл
1.1. Монгол улсын Ерөнхийлөгчийн Тамгын газар (цаашид Тамгын газар” гэх)-ын ажилтан албан хаагчдын ёс зүйн дүрмийн зорилго нь тус байгууллагын ажилтан, албан хаагчид нь байгууллагын үйл ажиллагаанд дагаж мөрдөх ёс зүйн хэм хэмжээг баримтлан хуулийг дээдлэх, шударга ёсыг бэхжүүлэх, хүний эрх, эрх чөлөөг хүндэтгэн тэгш хандах, эрхэлсэн ажлаа мэргэжлийн өндөр түвшинд гүйцэтгэж Монгол Улсын Ерөнхийлөгчийн Тамгын газар түүний албан хаагчийн нэр төрийг хамгаалахад оршино.
1.2. Ёс зүйн хэм хэмжээ гэдэг нь хууль дүрмээр олгогдсон эрх мэдэл, чиг үүргээ хэрэгжүүлэхдээ хамт олон, нийгмийн харилцааны хүрээнд дагаж мөрдвөл зохих зан үйлийн нийлбэр цогц мөн.
1.3. Тамгын газрын ажилтан, албан хаагч нь ёс зүйн дүрмээ чанд сахин биелүүлэх нь тэдний үүрэг, нэр төрийн баталгаа мөн.
1.4. Ёс зүйн зөрчил гаргасан ажилтан, албан хаагчид хариуцлага тооцохтой холбогдсон харилцааг энэ дүрмээр зохицуулна.
Хоёр.Тамгын газрын ажилтан, албан
хаагчдын баримтлах зарчим
2.1.Үнэнч шударга байх
2.1.1. Тамгын газрын ажиллагсад нь төрийн байгууллагын нэрийн өмнөөс бусад байгууллага, иргэдтэй хамтран ажиллахдаа өөрийн байгууллагын ёс зүйн хэм хэмжээг чандлан сахих.
2.1.2. Тамгын газрын ажилтан албан хаагчид нь ажил үүргээ мэргэжлийн өндөр түвшинд үнэнч шударгаар биелүүлнэ.
2.1.3. Ажилтан албан хаагчид нь өөрийн буруутай үйл ажиллагаанаас алдаа гарсан тохиолдолд буруу үйлдлээ шударгаар хүлээн зөвшөөрөх, уучлал хүсэх, дахин давтахгүй байх.
2.1.4. Ерөнхийлөгч, Ерөнхийлөгчийн Тамгын газрын нэр хүндийг илэрхийлэх хэвлэмэл хуудас, тамга, тэмдгийг гагцхүү хууль дүрэмд заасны дагуу Тамгын газрын албан хэргийн үйл ажиллагаанд зориулан ашиглах.
2.2.Хариуцлагатай байх
2.2.1. Ажилтан нь байгууллагын болон албан хаагчдын нэр төрийг хамгаалах үүрэг хариуцлагаа ямагт ухамсарлан эрхэлсэн ажлаа мэргэжлийн өндөр түвшинд хариуцлагатай гүйцэтгэх.
2.2.2.Баримт бичиг, мэдээлэл боловсруулах чадвараа байнга хөгжүүлж эрх хэмжээнийхээ хүрээнд байгууллагыг төлөөлөн хийх, мэдээлэл, баримт бичгийг хуулинд нийцүүлэн үйлдэх.
2.2.3.Байгууллагын нууцтай албан үйл ажиллагааны дагуу танилцсан, олж мэдсэн бол нууцыг чандлан хадгалах, нууцын баталгаа өгөх.
2.2.4.Өөрийн албан үүргийн дагуу гүйцэтгэсэн ажлын хариуцлагаа бүрэн хүлээх.
2.2.5.Тамгын газрын ажилтан албан хаагчид нь Төрийн албаны тухай хууль, Тамгын газрын дүрэм, Хөдөлмөрийн дотоод журам, эрх бүхий байгууллагын баталж гаргасан акт болон ёс зүйн дүрмийг ажилдаа мөрдлөг болгож ажиллах.
2.3.Тэгш байх
2.3.1.Хамт олон, иргэд, олон нийттэй харилцахдаа тэднийг албан тушаал, алдар хүнд, үндэс угсаа, хэл соёл, арьсны өнгө, нас хүйс, нийгмийн гарал, хөрөнгө чинээ, шашин шүтлэг, үзэл бодол, туршлага мэдлэг, эрүүл мэндийн онцлог болон хувийн шалтгаанаар ялгаварлаж гадуурхахгүйгээр тэдэнд адил тэгш хандах.
2.4.Итгэл хүндэтгэлтэй байх
2.4.1. Тамгын газрын ажилтан албан хаагчид нь үүрэгт ажилдаа итгэл үнэмшилтэй, эвсэг, бүтээлч хамт олон байхын төлөө чин эрмэлзлэлтэй байх.
2.4.2. Ажилтан албан хаагчид нь төрийн нэрийн өмнөөс ажиллаж байгаагаа ямагт санаж байгууллага, хамт олон, иргэдийн эрх ашгийг хуулийн дагуу эрхэмлэн дээдэлж тэдэнтэй харилцааны өндөр соёлтой, хүндэтгэлтэй харилцах.
2.4.3. Шүүмжлэл, өөрийн санал бодлоо илэрхийлэхдээ бусдын санаа, үзэл бодолд хүндэтгэлтэй хандаж аливаа маргаан (саналын зөрүү) зөрчлийг эв зүйгээр шийдвэрлэх.
2.4.4. Албан хэрэгцээний зориулалттай телефон утасны дуудлаганд хариу өгөхдөө байгууллага, алба нэгжийн эсвэл өөрийн нэр, албан тушаалыг хэлэх.
2.4.5. Ажлын шаардлагаар олгогдсон эд хогшил, техник, тоног төхөөрөмжийг зохих зориулалтын дагуу гамтай эзэмшиж, ашиглах.
2.4.6. Тамгын газрын ажилтан албан хаагчид нь төрийн ордны хамгаалалт, үйлчилгээний журмын дагуу төлөв, албаны ажил хэрэгч хувцаслах.
2.4.7. Тамгын газраас зохиогдож буй олон нийтийн шинжтэй арга хэмжээнд идэвхтэй оролцох.
Гурав. Тамгын газрын ажилтан, албан хаагчдад хориглох зүйл
3.1. Тамгын газрын ажилтан албан хаагчид нь албан үүргээ гүйцэтгэхдээ бусдаас шан харамж авах, хувийн харьцаа тогтоох, хувьдаа ашиг олох зорилгоор албан тушаалын нэр хүндийг ашиглах.
3.2. Ажилтан албан хаагчид нь төрийн нэрийн өмнөөс ажиллаж байгаагаа ямагт эрхэмлэж хамт олон, олон нийт, иргэдтэй харьцахдаа бүдүүлэг үг хэрэглэх, хараах, доромжлох.
3.3. Хувийн үзэл бодол, таамаглалаа Ерөнхийлөгч түүний Тамгын газрын байр суурь хэмээж хамт олон, иргэд, олон нийтэд ухуулан ойлгуулах, тулган шаардах, гажуудуулан мэдээлэх,
3.4. Бүрэн төгс шийдвэр гараагүй, ажлын үйл явц, байгууллагын нууцын зэрэглэлд тооцсон мэдээлэл, материалыг ил гаргах.
3.5. Тамгын газрын нэр хүндийг илэрхийлэх хэвлэмэл хуудас, тамга тэмдгийг эрх хэмжээнээс давсан үйл ажиллагаанд ашиглах.
3.6.Хамт олон, зочдын дунд байхдаа удирдах албан тушаалтан, ажилтнуудтай албан бус харьцаа тогтоох,
3.7. Бусдын өрөөнд зөвшөөрөлгүй орох, бусдын зүйлийг зөвшөөрөлгүй авах, ажил үүргээ гүйцэтгэхэд нь саад учруулах.
3.8. Төрийн ордонд албан бус хувцастай нэвтрэх (орох), төрийн ордны журам зөрчих.
3.9. Албан үүргийн чиг үүргээс гадуур нийгэм, соёлын арга хэмжээнд оролцохдоо уг үйл ажиллагаа, арга хэмжээ нь байгууллагын нэр хүндэд харшлахаар бол түүнд оролцох.
3.10. Нийгэм болон бусдад хор хөнөөлтэй хууль бус үйлдэл, эс үйлдэхгүй хийх.
3.11. Албаны ажлаа хувийн зорилгоор их бага хэмжээгээр ашиглахгүй байх.
3.12. Хамт олны дунд элдэв хов жив, хэрүүл маргаан үүсгэх, нэр төр, албан тушаал хөөцөлдсөн үйлдэл гаргах
Дөрөв.Ажилтан, албан хаагчдын ёс зүйн
зөрчил, түүнийг хянан шийдвэрлэх
4.1.Ёс зүйн зөрчил
4.1.Тамгын газрын ажилтан албан хаагчдын ёс зүйн зөрчил гэж Төрийн албаны тухай хууль, бусад хууль тогтоомж, эрх бүхий байгууллагаас баталж гаргасан эрхийн акт болон энэ дүрмээр тогтоосон албан хаагчдын ёс зүйн хэм хэмжээг санаатай буюу санамсаргүйгээр зөрчсөн үйлдэл, эс үйлдэхүйг хэлнэ.
4.2. Ёс зүйн зөрчлийг хянан шийдвэрлэх
4.2.1.Албан хаагчийн ёс зүйн зөрчил гаргасан тухай иргэд, байгууллага, хамт олны хүсэлт, өргөдөл, гомдлыг дараах хэлбэрээр хүлээн авч шалгаж шийдвэрлэнэ.
1. Иргэн, албан тушаалтан, хамт олон, ажиллагсад, байгууллагаас ирүүлсэн өргөдөл, гомдол, хүсэлт мэдээллээр;
2. Хэвлэл, мэдээллийн хэрэгслэлээр нийтлэгдсэн нийтлэл, мэдээллээр; (шалгаж тогтоосон нөхцөлд)
4.3.Ёс зүйн зөвлөл
4.3.1.Тамгын газар нь Ёс зүйн зөвлөлтэй байна.
4.3.2 Ажилтан албан хаагч ёс зүйн зөрчил гаргасан тохиолдолд Тамгын газрын дэд даргаар ахлуулсан “Ёс зүйн зөвлөл” хянаж шалгаж шийдвэрлэнэ.
4.3.3.Энэ дүрэмд заасан ёс зүйн хэм хэмжээг зөрчсөн ажилтан, албан хаагчид Төрийн албаны тухай хууль, хөдөлмөрийн тухай хууль болон бусад хууль, дүрэм, журмын дагуу сахилгын шийтгэл ноогдуулна.
4.3.4.Тамгын газрын ажилтнууд эдгээр ёс зүйн дүрмийг бүрнээ баримтлан ажиллахаа илэрхийлж гарын үсэг зурж захиргаандаа хадгалуулна.
