Өнөөдөр Нэгдсэн Үндэсний Байгууллагын “Энхийг сахиулагчдын өдөр”-ийг тэмдэглэн өнгөрүүлэх ажлын хүрээнд Жанжин Д.Сүхбаатарын талбайд ёслолын ажиллагаа зохион байгуулагдлаа.
Уг арга хэмжээнд Монгол Улсын Ерөнхийлөгч, Зэвсэгт хүчний Ерөнхий командлагч Ц.Элбэгдорж болон Батлан хамгаалахын сайд, Улсын Их хурал, Засгийн газрын гишүүд, ЗХЖШ-ын дарга, БХЯ, ЗХЖШ-ын удирдлага, Төрийн цэргийн байгууллагуудын удирдлага, Гадаад орнуудаас Монгол Улсад суугаа Элчин сайд, Батлан хамгаалахын болон Цэрэг-агаарын цэргийн атташе нар, гадаад дотоодын хүндэт зочид, Улаанбаатарын цэргийн хүрээний Зэвсэгт хүчний ангиудын бие бүрэлдэхүүн, Энхийг сахиулах ажиллагаанд оролцсон ХХЕГ, ШШГЕГ, Дотоодын цэрэг, ЦЕГ, ТЕГ-ын бие бүрэлдэхүүний төлөөлөгчид, иргэд, залуучууд, өсвөр үеийнхэн оролцлоо.
Арга хэмжээний нээлтийн үеэр, Хүндэт харуул, цэргийн бие бүрэлдэхүүн Монгол Улсын Ерөнхийлөгч, Зэвсэгт хүчний Ерөнхий командлагч Ц.Элбэгдоржийг угтаж Хүндэт харуулын дарга илтгэл өгч Монгол Улсын Төрийн дууллыг эгшиглүүлэв.
Дараа нь Монгол Улсын Ерөнхийлөгч, Зэвсэгт хүчний Ерөнхий Командлагч Ц.Элбэгдорж Энхийг сахиулагчдад хандаж үг хэлэн, мэндчилгээ дэвшүүлж үүргээ нэр төртэй, амжилттай гүйцэтгэсэн энхийг сахиулагч, дайчдад шагнал гардуулсан юм.
Монгол Улсын Ерөнхийлөгч, Зэвсэгт хүчний Ерөнхий командлагч хэлсэн үгэндээ:
“Монгол Улсын Зэвсэгт хүчин, эх орон, ард түмнийхээ дуудсан цаг бүрт бэлэн байж олон улсын болон НҮБ-ын энхийг сахиулах үйл ажиллагаанд идэвхтэй оролцож байна. Монгол цэргийн ур чадвар, бие сэтгэлийн тэсвэр хатуужил, улс орон, ард түмнийхээ бахархам түүх, нэр хүндийг өндөрт өргөж, албаа сайн хааж байгаа манай зэвсэгт хүчний бие бүрэлдэхүүн энхийг сахиулагчдад Монголын төр, ард түмэн гүн хүндэтгэл илэрхийлж байна.
Дэлхийн хамтын нийгэмлэгийн энхийн үйлс, улс орныхоо тусгаар тогтнол, ард иргэдийн эрх, эрх чөлөөт байдлыг хамгаалан бэхжүүлэх аз хийморьтой, онцгой албандаа улам их амжилт олохыг цэрэг дайчид Та бүхэндээ чин сэтгэлээсээ хүсэн ерөөе” хэмээн баяр хүргэлээ.
Ёслолын арга хэмжээний үеэр, НҮБ-ын Энхийг сахиулах ажиллагаанд үүрэг гүйцэтгэж байгаа цэргийн баг, цэргийн ажиглагч нараас ирүүлсэн мэндчилгээг уншиж танилцуулсан бөгөөд Зэвсэгт хүчний Ерөнхий командлагчид НҮБ-ын Энхийг сахиулах болон олон улсын бусад ажиллагаанд үүрэг гүйцэтгэсэн энхийг сахиулагчдаас дурсгалын зүйл гардуулав.
Дараа нь Зэвсэгт хүчний Ерөнхий командлагч болон хүндэт зочид төлөөлөгчид, иргэд, цэргийн багийнхны ар гэрийнхэн энхийг сахиулах ажиллагаатай холбогдох үзэсгэлэнг үзэж сонирхсон юм.
Монгол Улсын Их Хурлаас 1998 онд батлан гаргасан “Монгол Улсын төрийн цэргийн бодлогын үндэс” баримт бичигт, Зэвсэгт хүчний тайван цагийн нэг чиг үүргийг “НҮБ-ын Энхийг сахиулах ажиллагаанд үүрэг гүйцэтгүүлэх” гэж тодорхойлсон бөгөөд Зэвсэгт хүчний тухай Монгол Улсын хуульд Зэвсэгт хүчний тайван цагийн нэг үүрэг нь “Энхийг сахиулах олон улсын ажиллагаанд оролцох” хэмээн тогтоож өгсөн байна.
Монгол Улс 2002 оны 8 дугаар сараас эхлэн НҮБ-ын энхиийг сахиулах ажиллагаанд оролцож эхэлсэн бөгөөд энэ хугацаанд Бүгд Найрамдах Ардчилсан Конго Улс, Баруун Сахар, Судан, Этиоп ба Эритрей, Гүрж, Чад, Төв Африкийн Бүгд Найрамдах Улсад энхийг сахиулах ажиллагаанд оролцоод байна.
Мөн 2006 оны 1 дүгээр сараас эхлэн Сьерра Леон Улс дахь Олон Улсын тусгай шүүхийн аюулгүй байдлыг хангах зорилгоор 8 ээлжийн 2000 цэргийн алба хаагч үүрэг гүйцэтгэсэн бол өнөөгийн байдлаар 9 дүгээр ээлжийн 150 цэргийн албан хаагч үүргээ гүйцэтгэж байна.
2009 оны 11 дүгээр сараас эхлэн Чад, Төв Африкийн Бүгд Найрамдах Улс дахь НҮБ-ын энхийг сахиулах ажиллагаанд Монгол Улс анх удаа батальоны хэмжээнд, тэргүүний бүлгээ илгээгээд байна.
Мөн 2003 оноос 2008 он хүртэл “Иракийн эрх чөлөө” ажиллагааны хүрээнд Ирак Улсын дайны дараах сэргээн босголт, хүмүүнлэгийн үйл ажиллагаанд манай улсын 10 ээлжийн мянга гаруй албан хаагч үүрэг гүйцэтгэсэн бөгөөд Косова, Афганистан улсууд дахь олон улсын цэргийн ажиллагаанд мөн оролцсон байна.
