Манай улсад албан ёсны айлчлал хийж байгаа БНХАУ-ын Төрийн Зөвлөлийн Ерөнхий сайд Вэнь Зябао өнөөдөр Монгол Улсын Ерөнхийлөгчид бараалхлаа.
Ерөнхийлөгч Ц.Элбэгдорж, ярианыхаа эхэнд эрхэм хүндэт зочдыг манай оронд тавтай зочлон саатахыг хүсээд, өнгөрсөн сард БНХАУ-ын дарга Ху Жинтаогийн урилгаар БНХАУ-д төрийн айлчлал хийх үеэр Ерөнхий сайдтай уулзсаныхаа дараа ийнхүү, Улаанбаатарт дахин уулзаж байгаад баяртай байгаагаа илэрхийлэв.
“БНХАУ-ын Төрийн Зөвлөлийн Ерөнхий сайдын түвшинд 16 жилийн дараа хийж байгаа энэхүү айлчлал нь ноён Ерөнхий сайд Та Монгол, Хятадын харилцаа, хамтын ажиллагааг чухалчлан үзэж байгаагийн тод илрэл гэж бид үзэж байна. Таны айлчлалын үеэр хоёр талын харилцааны хэд хэдэн баримт бичигт гарын үсэг зурж, бизнес форум зохион байгуулсан нь хамтын ажиллагааны цаашдын хөгжилд чухал ач холбогдолтой юм” гэж Ерөнхийлөгч ярианыхаа эхэнд хэллээ.
Ноён Вэнь Зябао хариу мэндчилээд, “Бээжинд Тантай сарын өмнө уулзахад Та харилцаа, хамтын ажиллагааг эрчимжүүлэх талаар хэд хэдэн тодорхой санал тавьж байсан. ХАА-н эцсийн бүтээгдэхүүн боловсруулж, гуравдах зах зээлд гаргах, дэд бүтэц, цахилгаан эрчим хүчний салбарт хамтран ажиллах, Орос-Хятадыг холбосон байгалийн хийн хоолойг Монголоор дамжуулах зэрэг Таны тавьсан тодорхой саналуудыг бид судалж, тодорхой шатанд яриа хэлэлцээ эхэлсэн байгаа. Би Монгол Улсын Ерөнхий сайдтай уулзах үеэр ч мөн эдгээр асуудлуудыг хөндөж ярилцлаа. Түүнчлэн манай хоёр орон газрын тосны салбарт хамтран ажиллах бололцоотой” гэж Төрийн Зөвлөлийн Ерөнхий сайд ярив.
“Бидний Бээжинд ярьсан олон асуудлуудыг анхаарч, тодорхой шийдэлтэй ирсэнд Танд талархаж байна. Эдгээр асуудлууд нь манай хоёр улсын хооронд эдийн засгийн хамтын ажиллагааг хөгжүүлэх гол түлхэц салбарууд билээ. Ялангуяа далайд гарцгүй Монгол орны хувьд, эцсийн бүтээгдэхүүн үйлдвэрлэж, гуравдагч зах зээлд гаргах талаар БНХАУ-тай хамтран ажиллах сонирхол их байгаа гэдгийг Та бүхэн ойлгож, энэ талаар нэгдсэн ойлголтолтонд хүрч байгаад бид баяртай байна” гэж Ерөнхийлөгч Ц.Элбэгдорж хэлэв.
Ураны салбарт хамтран ажиллах, БНХАУ-д Монгол Улсаас сурах оюутны тоог нэмэгдүүлэх, цэрэг батлан хамгаалах, гаалийн салбарын хамтын ажиллагааг өргөтгөх, Их Түмэн гол төслөөр дамжуулж бүс нутгийн хамтын ажиллагааг эрчимжүүлэх болон олон улсын харилцааны харилцан сонирхсон бусад асуудлаар ярилцаж, санал бодлоо солилцлоо.
Уулзалтын төгсгөлд, хоёр улсын харилцаа хамтын ажиллагааг бүх салбарт хөгжүүлэхийн төлөө хичээн ажиллах болно гэдгээ Ерөнхийлөгч, Ерөнхий сайд нар харилцан илэрхийллээ.
