Монгол Улсын Ерөнхийлөгч Цахиагийн Элбэгдоржид өнөөдөр цаазаар авах ялыг халах асуудлаархи Испани Улсын Үндэсний зохицуулагч, Элчин сайд, ноён Рафаел Валле Гарагорри бараалхлаа.
Өнгөрсөн 1 дүгээр сарын 14-нд Монгол Улсын Ерөнхийлөгч цаазаар авах ялд хориг тавьж, УИХ-д мэдэгдэл хийсний дараа олон улсын байгууллагууд, олон орны төр засгийн тэргүүдээс баяр хүргэж дэмжсэн захидал ирүүлсэн бөгөөд түүний дотор Европын холбоо, түүний гишүүн орны нэг болох Испани Улс байсан юм.
Түүнээс хойш цаазаар авах ялыг дэлхий нийтээр бүрэн халах зорилготой хэд хэдэн томоохон олон улсын хуралд Монгол Улын Ерөнхийлөгч бие төлөөлөгчөө илгээж амжилттай оролцсон билээ.
2010 оны 2 дугаар сарын 24-26-ны өдрүүдэд Женев хотноо болсон “Цаазаар авах ялын эсрэг дэлхийн 4 дүгээр чуулган”-д Монгол Улсын Ерөнхийлөгч мэндчилгээ дэвшүүлж, цаазар авах ялыг дэлхий нийтээр бүрэн халахыг тууштай дэмжиж байгаагаа илэрхийлэн, Монгол Улсын байр суурийг баттай дэмжиж буй улс орнуудад талархал илэрхийлсэн юм. Мөн өнгөрсөн 5 дугаар сарын 17,18-нд Италийн Ром хотноо болсон “Амьдрал үгүй бол шударга ёс үгүй” сэдэвт олон улсын хууль зүйн сайд нарын 5 дугаар чуулга уулзалтад Ерөнхийлөгчийн зөвлөх Ч.Сосормаа оролцсон юм.
Европын Холбоог одоогоор тэргүүлж буй Испани Улсын Засгийн газраас 2015 он гэхэд цаазаар авах ялыг дэлхий даяар бүрэн халахын төлөөх дэлхий нийтийн томоохон эвсэл болох “Цаазаар авах ялыг халах олон улсын комисс” байгуулахаар зарласан бөгөөд энэхүү комисст дэлхийн олон бүс нутгийг төлөөлсөн өндөр албан тушаалын 15 төлөөлөгч сонгогдох юм. Энэ комисст төлөөлөгчөө илгээхийг Испанийн Засгийн газраас Монгол Улсад хандан санал тавьсны дагуу Монгол Улсын Ерөнхийлөгч өөрийн хуулийн бодлогын зөвлөх Г.Ганзоригийг уг Комиссын гишүүнээр ажиллуулахаар нэр дэвшүүлээд байгаа юм.
Уулзалтын үеэр Монгол Улсын Ерөнхийлөгч, Испанийн Засгийн газрыг төлөөлөн ирсэн ноён Гарагоррид талархал илэрхийлээд Монгол Улсын Ерөнхийлөгч цаазаар авах ялыг түдгэлзүүлэхээр мораториум зарласан явдалд Испани Улс өндөр ач холбогдол өгөн дэмжиж буйд талархал илэрхийлэв.
Мөн тэрээр, “ээдрээтэй, байнга маргаан дагуулдаг энэхүү ялыг бүрэн халах асуудал нь улс төрийн хувьд эрсдэлтэй алхам боловч Монгол Улс нэгэнт ардчилсан тогтолцоог бэхжүүлэхийн төлөө тууштай зорьж байгаа нь энэ ялыг бүрэн халах хангалттай үндэслэл болж байгаа юм. Хүний эрхийг дээдэлсэн, шударга ёсыг хүндэтгэдэг зэрэг ижилхэн үнэт зүйлсийг эрхэмлэдэг Монгол, Испани Улсууд цаазаар авах ялыг дэлхий даяар бүрэн халахын төлөө хамтран тууштай тэмцэх болно” гэж хэлэв.
Элчин сайд ноён Гарагорри хэлэхдээ цаазаар авах ялд хориг тавьсан тухай Монгол Улсын Ерөнхийлөгчийн шийдвэр нь маш сайхан мэдээ байсан бөгөөд тэр даруй л даа дэлхий нийтийн дэмлэг хүлээсэн. Испани Улс мөн өдөр нь л Европын Холбоо гишүүн орнууддаа хандан Монгол Улсын Ерөнхийлөгчийн шийдвэрийг дэмжих уриалга гаргасныг тэмдэглэв.
Испани Улсын Засгийн газраас Монгол Улсын Ерөнхийлөгчийн шийдвэрийг дэмжиж буйн илэрхийлэл болгож Элчин сайд ноён Р.В.Гарагорриг ийнхүү илгээсэн бөгөөд тэрээр Монголд ажиллах хугацаандаа Ерөнхийлөгч, УИХ-ын дарга, ХЗДХ-ийн сайд, УИХ, Засгийн газрын гишүүд болон олон нийтийн байгууллагын төлөөлөгчидтэй уулзахаар төлөвлөж буй ажээ.
