Ерөнхийлөгч Ц.Элбэгдорж, БНУзбекистан улсын Ерөнхийлөгч И.А.Каримов нар
Монгол Улсын Ерөнхийлөгч Ц.Элбэгдорж, БНУзбекистан улсын Ерөнхийлөгч И.А.Каримов нар 2010 оны 6-р сарын 10-ны өдөр Ташкент хотноо уулзлаа.
Ерөнхийлөгч И.А.Каримов, Монгол Улсын Ерөнхийлөгчийг ШХАБ-ын дээд хэмжээний уулзалтад хүрэлцэн ирсэнд талархлаа илэрхийлээд, 2009-2010 онд Узбекистан Улс ШХАБ ыг тэргүүлж байх үеэрээ гаргасан санаачилга, хийж гүйцэтгэсэн ажлынхаа талаар танилцуулав. Тэрээр мөн Монгол Узбекистан улсуудын хамтын ажиллагааны асуудлаар зарим санал бодлоо илэрхийлсэн.
Тухайлбал, манай хоёр орон уул уурхайн нөөц баялаг ихтэй, далайд гарцгүй, хөрш орнуудаараа дамжин өнгөрдөг, транзит тээврээс хараат байдаг гэхчилэн адил төстэй талууд их байгаа. Энэ чиглэлээр мэдээлэл солилцон, харилцан ашигтай хамтран ажиллах боломжтой хэмээн хэлэв. Тэрээр металлургийн үйлдвэрт олон жилийн өмнө инженерээр ажиллаж байхдаа ,монгол төлөөлөгчидтэй уулзаж байсан тухайгаа дурсаж, 1991 онд тус улс тусгаар тогтносноос хойш хүнсний бүтээгдэхүүн болон байгалийн хий, шатахууны импортын хараат байдлаас гарах, үндэсний үйлдвэрлэлээ хөгжүүлэх, хөвөнгийн экспортыг нэмэгдүүлэх талаар авсан арга хэмжээ туршлагынхаа талаар танилцуулав. Мөн хөрш орнууд болон төв азийн бүс нутгийн байдал хамтын ажиллагааны талаар санал бодлоо дэлгэрэнгүй ярилаа.
Ерөнхийлөгч Ц.Элбэгдорж, ШХА- ын дээд хэмжээний уулзалтад урьсанд талархлаа илэрхийлж, түүхийн уялдаа холбоотой хоёр ард түмний хувьд түүхийн эд өлгий, эх сурвалжуудыг хамтран судлах, эрдэмтэд солилцох мөн ХАА-н чиглэлд хамтран ажиллах боломжтой хэмээн үзэж байгаагаа илэрхийлэв.
Хоёр орны харилцааг хөгжүүлэхийн тулд эрхзүйн үндсийг сайн тавих ёстой. Ийм учраас тохиролцоод байгаа шаардлагатай гэрээ хэлэлцээрүүдийг байгуулахад бэлтгэж эхлэхийг Монгол Улсын Ерөнхийлөгч санал болгов.
Далайд гарцгүй орнуудын хувьд олон улсын тавцанд үйл ажиллагаагаа нэгтгэж хамтран ажиллах, үндэсний аж үйлдвэр, уул уурхайн салбарыг хөгжүүлэхэд харилцан туршлага солилцох боломжтой хэмээн үзэж байгаагаа тэмдэглэв.
Ерөнхийлөгч И.А. Каримовыг, тааламжтай цагтаа Монгол Улсад айлчлахыг урив. Хариуд нь Ерөнхийлөгч И.А.Каримов урилгыг талархан хүлээн авч, дараа жил Монгол Улсад айлчлах болно гэлээ.
Ерөнхийлөгч Ц.Элбэгдорж, БНУзбекистан улсын Ерөнхийлөгч И.А.Каримов нар
