Ташкент хотноо ШХАБ-ын дээд хэмжээний уулзалт болов.
ШХАБ-ын гишүүн болон ажиглагч орнуудын Төрийн тэргүүн нарын Зөвлөлдөх уулзалт БНУзбекистан Улсын нийслэл Ташкент хотноо өнөөдөр боллоо.
Энэхүү уулзалтад ШХАБ-ын гишүүн орнуудын төрийн тэргүүд болох, ОХУ-ын Ерөнхийлөгч Д.А.Медведев, БНХАУ-ын дарга Ху Жин Тао, БНКазУ-ын Ерөнхийлөгч Н.Назарбаев, БНТажикистан Улсын Ерөнхийлөгч Э.Рахмон, БНУзбекистан Улсын Ерөнхийлөгч И.А.Каримов, БНКыргызстан Улсын гадаад хэргийн сайд Р.Казакбаев, мөн ажиглагч орнуудын төрийн тэргүүд болох Монгол Улсын Ерөнхийлөгч Ц.Элбэгдорж, БНАфганистан Улсын Ерөнхийлөгч Х.Карзай, Пакистан Улсын Ерөнхийлөгч А.А.Зардари, БНТуркменистан Улсын Ерөнхийлөгч Г.М.Бердымухаммедов болон БНЭУ-ын гадаад хэргийн сайд С.М.Кришна, Исламын Бүгд Найрамдах Иран Улсын гадаад хэргийн сайд М.Моттаки нар оролцов.
Дээд хэмжээний уулзалтыг БНУзбекистан Улсын Ерөнхийлөгч И.А.Каримов нээсний дараа, гишүүн орнуудын Төрийн тэргүүд үг хэлэв.
Тэд, Азийн бүс нутагт энхтайван, тогтвортой байдлыг хангах, терроризм, зохион байгуулалттай гэмт хэрэгтэй тэмцэх, хар тамхины наймааг хумих, эдийн засгийн хамтын ажиллагааг өргөжүүлэх, хүмүүнлэгийн салбарт хамтран ажиллах чиглэлээр тодорхой санал бодлуудаа хэлж байлаа.
Мөн ажиглагч орнуудын төрийн тэргүүд үг хэлэв.
Монгол Улсын Ерөнхийлөгч Ц.Элбэгдорж хэлсэн үгэндээ “Манай Улс бүс нутгийн улс төр, эдийн засгийн хамтын үйл явцад оновчтой оролцох бодлогынхоо хүрээнд ШХАБ-ыг Төв Азийн бүс нутгийн олон талт хамтын ажиллагаанд оролцох нэг чухал суваг гэж үздэг юм. ШХАБ-аас ажиглагч улсууд хийгээд хил залгаа улс орнуудыг ШХАБ-ын эдийн засгийн чиглэлийн үйл ажиллагаанд татан оролцуулах нь бүс нутгийн эдийн засгийн хамтын ажиллагааг бэхжүүлэх, эдийн засаг, худалдаа, хөрөнгө оруулалт, зам тээвэр, хөдөө аж ахуй зэрэг салбарт эрх тэгш, харилцан ашигтай харилцааг хөгжүүлэх таатай нөхцөл бүрдүүлэхэд дэм болно хэмээн үзэж байгааг ажиглагч орны хувьд талархан тэмдэглэж байна. Ялангуяа, эрчим хүч, зам тээвэр, тэргүүний технологийн салбарт “үлгэр жишээ” төслүүдийг хэрэгжүүлэх үзэл санаа бидний анхаарлыг татаж байгааг энд онцлохыг хүсч байна” гэлээ.
ШХАБ-ын дээд хэмжээний уулзалтын үр дүнд дараах баримт бичгүүдийг гаргалаа.
1. Төрийн тэргүүн нарын зөвлөлийн шийдвэрүүд:
· ШХАБ-д шинээр гишүүн элсүүлэх журам
· ШХАБ-ын үйл ажиллагааны дүрэм
· ШХАБ-ын Ерөнхий нарийн бичгийн даргын 2009 оны ажлын тайлан-илтгэл
· ШХАБ-ын дэргэдэх Терроризмтэй тэмцэх бүс нутгийн албаны 2009 оны тайлан илтгэл
2. ШХАБ-ын гишүүн орнуудын дээд хэмжээний уулзалтын тухай хэвлэлийн мэдэгдэл.
3. ХАА-н салбарт хамтран ажиллах тухай баримт бичиг
4. Гэмт хэргийн эсрэг хамтын ажиллагааг эрчимжүүлэх тухай баримт бичиг эдгээр болно.
Бүс нутгийн орнуудын сайн хөршийн хамтын ажиллагааг хөгжүүлэхэд өөрийн хувь нэмрийг оруулж, гишүүн орнуудын хүрээнд энхтайван, тогтвортой байдлыг бэхжүүлэх, иргэншил хоорондын хамтын ажиллагааг өргөжүүлэх чухал механизм болоод байгаа ШХАБ нь жил ирэх бүр зохион байгуулалтын хувьд бэхжиж, хамтын ажиллагааны хүрээ нь өргөжин тэлж, аюулгүй байдал, худалдаа, эдийн засаг бизнес болон хүмүүнлэгийн салбарыг хамрах боллоо.
ШХАБ нь сүүлийн жилүүдэд худалдаа, эдийн засгийн хамтын ажиллагааны салбарт илүү анхаарлаа хандуулж байгаа бөгөөд энэ чиглэлээр үйл ажиллагааны тодорхой мөрийн хөтөлбөртэй ажиллаж байна. Тухайлбал “Гишүүн орнуудын хооронд худалдаа, эдийн засгийн хамтын ажиллагааг хөгжүүлэх дунд болон урт хугацааны хөтөлбөр”-ийг батлан ажиллаж байна. Мөн гишүүн орнуудын томоохон компануудыг нэгтгэсэн Бизнесийн зөвлөл,банк хоорондын хамтын ажиллагааны Банкны нэгтгэл, эрдэм шинжилгээний байгууллага болон иргэний нийгмийн төлөөллийг оролцуулсан Шанхайн форумын үйл ажиллагаа эхлээд байна.
Ташкент хотноо ШХАБ-ын дээд хэмжээний уулзалт болов.
