Монгол Улсын Ерөнхийлөгчийн Хүний эрх, Иргэний оролцооны бодлогын зөвлөх Ч.Сосормаа Мансуурлын эсрэг үндэсний төвийн тэргүүн Л.Азбаяр, Хар тамхи мансууруулах бодисоос иргэдийг хамгаалах нийгэмлэгийн тэргүүн Ш.Лхагвасүрэн, Сэтгэцийн эрүүл мэндийн үндэсний төвийн их эмч С.Мөнхтуяа нарыг хүлээн авч уулзав.
Уг уулзалтаар Монгол Улсын хэмжээнд сүүлийн жилүүдэд хар тамхи, мансууруулах бодис хэрэглэгчдийн тоо өсч байгаа, донтолтонд орсон иргэдийг хамгаалах эрх зүйн зохицуулалт дутмаг байгаа талаар болон өнөөгийн нөхцөл байдал, цаашид авах арга хэмжээний талаар санал солилцлоо.
Хар тамхи, мансууруулах бодисоос иргэдийг хамгаалах нийгэмлэгийн тэргүүн Ш.Лхагвасүрэн хэлэхдээ, 1999 оноос хар тамхитай тэмцэх үйл ажиллагаа эхэлсэн бөгөөд Засгийн газраас 2000-2005 онд хэрэгжүүлэх “Хар тамхи, мансууралтай тэмцэх” үндэсний хөтөлбөрийг батлан гаргасан. Гэтэл санхүүжилтийн хүндрэлээс болоод хэрэгждэггүй, үр дүнгүй байгаа гэдгийг онцолж байв.
Мөн тэрээр 2002 онд батлагдсан мансууруулах эм, сэтгэцэд нөлөөт бодисын эргэлтэд хяналт тавих тухай хууль өнөөдрийн байдлаар эрх зүйн зохицуулалтыг хангаж чадахгүй нэмэлт, өөрчлөлт оруулах шаардлагатай байгааг дурьдаж байлаа.
Өнөөдрийн нийгэмд өсвөр үеийнхэний дунд хар тамхи, мансууруулах бодисын хэрэглээ өсч, гэмт хэрэгт холбогдох нь сэтгэл түгшээсэн асуудлуудын нэг болоод байгаа юм. Мөн Хар тамхи, мансууруулах бодисоос иргэдийг хамгаалах нийгэмлэгт хандаж байгаа иргэдийн насжилт залуужиж, цаашид нэмэгдэх хандлага их байгааг уулзалтанд оролцогчид санал нэгтэй хэлж байв.
Сэтгэцийн эрүүл мэндийн үндэсний төвийн их эмч С.Мөнхтуяа, Хар тамхи, мансууруулах бодисоос иргэдийг хамгаалах тал дээр Үндэсний хэмжээнд хэрэгждэг хөтөлбөртэй болох шаардлага байгааг онцоллоо.
Уулзалтын төгсгөлд цаашид хар тамхи, мансууруулах бодисоос иргэдийг хамгаалах зорилгоор өргөн хүрээтэй хэлэлцүүлэг зохион байгуулах талаар тохиролцов.
