Монгол Улсын Ерөнхийлөгч Ц.Элбэгдоржийн санаачилгаар болж байгаа “Эрдэс баялгийн салбараа зохистой хөгжүүлэх нь” дугуй ширээний ярилцлага-уулзалт өнөөдөр Их Тэнгэр цогцолборт эхэллээ.
Давосын эдийн засгийн чуулган байгууллага энэхүү арга хэмжээний хамтран зохион байгуулагч нь бөгөөд, Монгол Улсын Ерөнхийлөгчийн гаргасан уул уурхайн салбарт хөрөнгө оруулах олон улсын загвар гэрээтэй болох санаачилгыг талархан дэмжсэний үндсэн дээр ийнхүү Улаанбаатар хотод уулзалт зохион байгуулж байна.
Уулзалтыг нээж Монгол Улсын Ерөнхийлөгч Ц.Элбэгдорж хэлэхдээ, “Уул уурхайн салбарын сайтар бодож боловсруулсан бас уян хатан нөхцөлтэй хөрөнгө оруулалтын гэрээний загвар байснаар дэлхий даяар сая сая хүн түүний үр ашгийг хүртэх боломжтой юм.
Хэрэв тийм олон улсын загвар гэрээ байсан бол Монгол Улс, гадны хөрөнгө оруулагчид аль аль нь ОюуТолгойн гэрээг байгуулах гэж ийм олон жилийг алдахгүй байх байсан. Монгол Улс ч өөр олон улс орон ч татвараас гадна байгаль орчныг хамгаалах, нөхөн сэргээлт зэргийг зохицуулсан загвар гэрээнээс их үр ашиг хүртэнэ гэдэгт итгэлтэй байна” гэлээ.
Зохион байгуулагчдын хэлснээр энд уул уурхайн салбарын туршлагатай шинжээчид иржээ. Тухайлбал, Дэлхийн эдийн засгийн чуулга уулзалтын Глобал аж үйлдвэрийн төвийн дэд дарга Алекс Уонг, Уул уурхай, металлын Глобал зөвлөлийн тэргүүн Бритт Банкс мөн тус байгууллагын Эрдэс баялгийн салбарын орлогч захирал Иан Клавиттер нар оролцож байна.
Тэд эрдэс баялгийн салбарын ашиг орлогыг хэрхэн зөв зохистой ашиглах, хөрөнгө оруулалтын загвар гэрээ ямар байж болох талаар монголын шийдвэр гаргагчид, хөрөнгө оруулагчид болон олон нийт төрийн бус байгууллагынхантай санал бодлоо солилцож байна.
Уулзалт ярилцлага маргааш үргэлжлэх болно.
