Монгол Улсын Ерөнхийлөгч Ц.Элбэгдоржийн илгээлт "Хүн ам зүйн цонхны үе ба хөгжлийн бодлогын зарим асуудлууд" сэдэвт Үндэсний зөвлөлдөх уулзалтад оролцогсдод
"Хүн ам зүйн цонхны үе ба хөгжлийн бодлогын зарим асуудлууд" сэдэвт
Үндэсний зөвлөлдөх уулзалтад оролцогсдод
Хүндэт хүндэт хатагтай, ноёд оо, Эрхэм зочид, төлөөлөгчид өө,
Та бүхэнд энэ өдрийн мэндийг дэвшүүлж, эрүүл энх аз жаргал, сайн сайхныг хүсэн ерөөе.
Монгол Улсын хүн амын насны бүтэц хамгийн тааламжтай үедээ байна. Хэдхэн жилийн өмнө манай улсын хүн ам залууд тооцогдож байсан бол өнөөдөр идэршиж, мэргэжлийн хэлээр бол "хүн ам зүйн цонхны үе" эхлээд байгаа юм.
Эрдэмтдийн тооцоолсноор “Хүн ам зүйн цонхны үе нь” улс орны хөгжилд хүний нөөцийн талаасаа олон давуу талуудыг авчирдаг бөгөөд энэ боломжийг зохистой ашиглаж, зөв хуваарилж чадсанаар улс орны хөгжилд өсөлт дэвшилт бий болгодгийг судлаачид нотолсон байна.
Өнөөдөр Монгол Улсад хүний нөөцийн хувьд улс орноо улам бүр хөгжүүлэх боломжтой түүхэн үе ирээд байна. Тиймээс түүхэнд ховорхон тохиох энэ торгон мөчид бодлого боловсруулагчид, шийдвэр гаргагчид хийгээд түүнийг хэрэгжүүлэгчид, ард иргэд ч өндөр ач холбогдол өгөх ёстой юм.
Бидний өмнө “Хүн амын цонхны үе”-ийн онцлог нь юу вэ?, яагаад энэ үеийг онцгойлон авч үзэх ёстой вэ? гэдэг асуулт урган гарч байна.
Чухам л энэ л үед манай улсын хүн амын хөдөлмөрийн нөөц хамгийн их, хамгийн үр бүтээлч байх боломжтой. Энэ нь иргэддээ, ялангуяа залуучуудад мэргэжил, ур чадвар эзэмшүүлэх, тэдэнд зориулсан ажлын байрыг олноор бий болгох, ажилчдынхаа мэргэжил, боловсрол, ажлын дадлага туршлагыг тасралтгүй дээшлүүлэх хэрэгцээ шаардлага бий болно гэсэн үг. Ингэснээр өрсөлдөх чадвартай, өргөн хэмжээний мэдлэг мэдээлэлтэй, чадварлаг иргэдтэй болох зүй тогтолтой юм. Иргэн нь чадварлаг бүтээмж өндөр орны хөгжил цэцэглэлт ч бусад орныг манлайлж чаддаг хөгжлийн хууль бий.
Мөн энэ үед нөхөн үржихүйн идэвхтэй насны эмэгтэйчүүдийн тоо хамгийн өндөр байх учраас төрөх хүүхдийн тоо өнөөгийнхөөс нэмэгдэх болно. Чухам л улс үндэстэн оршин тогтнох, бүрэн эрхт, тусгаар тогтносон байхын гол учиг нь хүн ам зүйн өсөлт билээ.
Тиймээс төрөх газруудын хүчин чадлыг нэмэгдүүлэх, эх нялхаст зориулсан эмнэлгийн тусламж, үйлчилгээний чанар хүртээмжийг сайжруулж улам боловсронгуй болгох зэргээр бид Монголын маргааш болсон ирээдүйн иргэдээ өндөр бэлтгэлтэйгээр угтаж авах учиртай.
Төрөлтийг дагаж цэцэрлэг, сургуулийн насны хүүхдийн тоо хэд дахин өснө. Сургууль, цэцэрлэг, дотуур байрын асуудал хүрэлцээтэй эсэх, шинээр барьж байгуулах шаардлагатай юу? зэрэг асуултын хариултад бид бэлтгэж эхлэх цаг болжээ.
Шинжлэх ухааны тооцоолсноор үзэхэд “Хүн ам зүйн цонх” хэмээх энэхүү нийгмийн үзэгдэл нь 25-30 жилийн дараа буурч эхлэхэд ахмад настны тоо огцом нэмэгдэх болно. Тухайн үед ахмадуудад зориулсан эрүүл мэндийн, соёл, амралтын, рашаан сувилgлын, халамж асрамжийн үйлчилгээ, тэтгэвэр, тэтгэмжийн асуудал зохистой шийдэгдсэн байх ёстой. Бид ч бас үүнд бэлтгэлтэй байх хэрэгтэй.
Чухамхүү энэ бүх асуудалд одооноос анхаарал хандуулж, хариу олох зорилгоор "Хүн ам зүйн цонхны үе ба хөгжлийн бодлогын зарим асуудал" сэдэвт Үндэсний зөвлөлдөх уулзалтыг зохион байгуулж байгааг миний бие сайшаан дэмжиж байна.
Ийнхүү зөвлөлдөх нь хүн амын бүтцэд гарч буй эерэг өөрчлөлтийг хөгжлийн үйл явцад оновчтой ашиглах, ирээдүйд бий болох сөрөг үр дагаврыг багасгах, урьдчилан сэргийлэхэд чиглэсэн бодлого боловсруулах үндэсний чадавхийг нэмэгдүүлэх, олон нийтийн ойлголт хандлагыг төлөвшүүлэхэд зохих хувь нэмэр оруулах болно.
Өнөөдрийн зөвлөлдөх уулзалтын ач холбогдол нь үндэсний хийгээд салбарын хөгжлийн урт, дунд хугацааны бодлого, тэдгээрийг хэрэгжүүлэх арга замыг оновчтой тодорхойлоход шинэ хандлага, арга зүйг авчрах, хүн амын цонхны үеийг туулж өнгөрүүлсэн бусад орны туршлага, алдаа онооноос сургамж авах онцгой чухал зорилготой юм.
Цаашид энэ асуудлыг салбар бүрийн хөгжлийн чиг хандлага, төлөв байдалтай уялдуулан хөгжүүлэхийн тулд цуврал ярилцлага, зөвлөлдөх уулзалтыг үргэлжлүүлэн зохион байгуулах, төлөвлөлтийн шинэ арга зүйг боловсруулж нэвтрүүлэх нь зүйтэй гэж үзэж байна.
Цаг үеэ мэдэрсэн, ач холбогдол бүхий арга хэмжээг хамтран зохион байгуулж байгаа УИХ-ын Нийгмийн бодлого, боловсрол, соёл, шинжлэх ухааны байнгын хороо, Нийгмийн хамгаалал, хөдөлмөрийн яам, Үндэсний хөгжил, шинэтгэлийн хороо, НҮБ-ын Хүн амын сан, МУИС-ын Хүн амын сургалт, судалгааны төвийн хамт олонд гүн талархал илэрхийлж, Үндэсний зөвлөлдөх уулзалтын ажиллагаанд амжилт хүсье.
МОНГОЛ УЛСЫН ЕРӨНХИЙЛӨГЧ
ЦАХИАГИИН ЭЛБЭГДОРЖ
Улаанбаатар хот
2010 оны 6 дугаар сарын 9-ний өдөр
Монгол Улсын Ерөнхийлөгч Ц.Элбэгдоржийн илгээлт "Хүн ам зүйн цонхны үе ба хөгжлийн бодлогын зарим асуудлууд" сэдэвт Үндэсний зөвлөлдөх уулзалтад оролцогсдод
