Ерөнхийлөгчийн зөвлөх Ч.Сосормаа ЗЦГ-ын удирдлагуудтай уулзав
Монгол Улсын Ерөнхийлөгчийн Хүний эрх, иргэний оролцооны бодлогын зөвлөх Ч.Сосормаа ЗЦГ-ын дэд дарга, цагдаагийн хурандаа Ч.Жаргалсайхан болон бусад удирдлагуудтай уулзаж замын цагдаагийн газрын өнөөгийн нөхцөл байдал, зам тээврийн осолд өртөж байгаа иргэд, тэднийг хэрхэн хамгаалах талаар ярилцаж санал солилцов.
Замын цагдаагийн газрын мэдээгээр сүүлийн 5 жилийн дунджаас үзвэл жилд 300 гаруй хүн зам тээврийн ослоор амь насаа алдаж, 1080 орчим хүн бэртэж гэмтсэн байна. Иймээс Замын хөдөлгөөний аюулгүй байдал, түүнийг хэрхэн ханган ажиллах нь олон талт асуудлыг хамарсан тулгамдсан асуудал болж байгаа юм.
Уулзалтын үеэр ЗЦГ-ын дэд дарга Ч.Жаргалсайхан хэлэхдээ, Замын хөдөлгөөний аюулгүй байдлыг хангах үүднээс БНСУ-аас 12,8 сая долларын эргэн төлөгдөх нөхцөлтэй зээлээр гэрлэн дохионы шинэ системийг суурилуулж байгаа ба наадмын өмнө ашиглалтад оруулж эхэлнэ. Мөн дээрх ажлын хүрээнд ногоон гэрлийн урсгалтай болж, явган хүмүүс зам хөндлөн гарах аюулгүй байдал илүү найдвартай хангагдах боломжтойг онцолж байлаа.
Мөн тэрээр замын хөдөлгөөний осол зөрчлөөс бага насны хүүхдийг хэрхэн хамгаалах, урьдчилан сэргийлэх талаар авто замын дэргэд байрладаг 16сургууль, ойролцоо байрладаг 20сургуулийн ойр орчим олон улсын стандартад нийцсэн хурд сааруулагч тавих шаардлагатай байгааг дурьдаж байв.
Түүнчлэн ЕБС-н ойролцоо өглөө, өдрийн цагаар замын түгжрэл хиймлээр бий болж байна. Цаашид замын хөдөлгөөнийг багасгах зорилгоор ЕБС-ийн сурагчдыг нэгдсэн журмаар сургуульд нь хүргэж өгдөг автобустай болгох саналыг тавьж байлаа.
Тухайлбал, эхний ээлжинд замын ойр орчим байдаг сургуулиудын багш, эцэг эхийн төлөөлөл хамтран хуваарь гаргаж өдөрт хүүхдүүдийг зам хөндлөн гаргахад нь туслах ажил зохион байгуулах хэрэгтэй аж.
Тэрээр цааш хэлэхдээ Замын хөдөлгөөний асуудал олон салбарын үйл ажиллагааг уялдуулж байж сайжрах болон хэрэгжүүлэх тал дээр хариуцлагын асуудал их чухал болж байна. Зам эвдэрвэл хэдэн цагийн дараа засах, Замын тэмдэг унавал хэдий хугацаанд шинээр хийх гэх мэт олон асуудлыг хууль, дүрэм журмаар зохицуулах шаардлагатай байна.
Түүнчлэн замын ойр орчим аж ахуйн үйл ажиллагаа эрхлээд байгаа тухайлбал машин угаагаад зам эвдлээд байгаа тохиолдолд хэн хариуцлага хүлээх вэ гэсэн олон асуудлууд эзэнгүй болоод байна.
Эдгээр олон асуудлыг Замын цагдаагийн газар, Хотын захиргаа, эсвэл аль нэг яам ч дангаараа шийдэх боломжгүй болсон байна. Тиймээс засгийн газрын түвшинд зангидан ажиллах хэрэгтэйг тэрээр онцолж байлаа.
Уулзалтын төгсгөлд Монгол Улсын Замын хөдөлгөөний аюулгүй байдлын талаар нэгдсэн хэлэлцүүлэг хийж, харилцан санал солилцохоор тохиролцов.
Ерөнхийлөгчийн зөвлөх Ч.Сосормаа ЗЦГ-ын удирдлагуудтай уулзав
