Монгол Улсын Ерөнхийлөгчийн Тамгын газраас УДШ-ийн Ерөнхий шүүгч, ШЕЗ-ийн дарга С.Батдэлгэрт албан бичиг илгээв
Монгол Улсын Ерөнхийлөгчийн нэр дээр иргэдээс ирүүлсэн гомдол, хүсэлтийн мөрөөр шүүгчээр ажиллаж байгаа хүмүүсийн боловсрол нь "Шүүхийн тухай" хуулийн 28 дугаар зүйлийн 28.1.1, "Дээд боловсролын тухай" хуулийн 8 дугаар зүйлийн 8.7 дахь хэсэгт заасан шаардлагыг хангаж байгаа эсэхэд хяналт, шалгалт хийж, дүгнэлт гаргах үүрэг бүхий, Боловсрол, соёл, шинжлэх ухааны яам, Мэргэжлийн хяналтын ерөнхий газрын холбогдох ажилтнуудыг оролцуулсан ажлын хэсгийг "Төрийн хяналт шалгалтын тухай" хуулийн 3 дугаар зүйлийн 3.1, "Монгол Улсын Ерөнхийлөгчийн Тамгын газрын дүрэм"-ийн 2 дугаар зүйлийн 2.2.3, 6 дугаар зүйлийн 6.1 дэх хэсгийг тус тус үндэслэн Ерөнхийлөгчийн Тамгын газрын даргын Захирамжаар байгуулж, дүгнэлт гаргуулжээ.
Ажлын хэсэг, шүүгчээр ажиллаж буй шүүгчдийн хувийн хэрэг материалыг Шүүхийн Ерөнхий зөвлөлөөс татан авч танилцсаны гадна зарим их, дээд сургуулиудын сургалт эрхлэх зөвшөөрлийн хуулбарыг Боловсрол, соёл, шинжлэх ухааны яамнаас албан ёсоор авч хяналт хийжээ.
Зарим шүүгчид өмнөх шатны боловсролын түвшний болзол хангалгүйгээр хуулийн дээд сургуульд элсэн 2,5 жилийн сургалтанд хамрагдан төгссөн байгаа нь "Дээд боловсролын тухай" хуулийн 8 дугаар зүйлийн 8.7-д "Дээд боловсрол эзэмшүүлэх сургалт 90 багц цагаас доошгүй байх бөгөөд өмнөх түвшний сургалтын багц цагийг оролцуулан бакалаврын сургалт 120-оос, магистрын сургалт 150-аас, докторын сургалт 210 багц цагаас тус тус доошгүй байна" гэсэн заалтыг зөрчсөн нэр бүхий13 шүүгчдийн дипломыг хууль бус гэж үзэх үндэслэлтэй гэж ажлын хэсэг дүгнэлт гаргажээ.
Шүүхийн Ерөнхий зөвлөл нь 2001 оноос 2009 онд дээд боловсрол эзэмших 90 багц цагийн сургалтыг дүүргээгүй, дээд боловсролын болзол хангаагүй хүмүүсийг нэр дэвшүүлж, шүүгчээр томилуулахаар санал болгосон, Ерөнхийлөгч тэдгээр хүмүүсийг шүүгчээр томилсон зэрэг нь "Шүүхийн тухай" хуулийн 28 дугаар зүйлийн 28.1.1 дэх хэсэгт заасан "Үндсэн хуулийн тавин нэгдүгээр зүйлийн 3 дахь хэсэгт заасан болзлыг хангасан Монгол Улсын иргэн шүүгчид нэрээ дэвшүүлэх эрхтэй" гэсэн, "Монгол Улсын Үндсэн хууль"-ийн Тавин нэгдүгээр зүйлийн 3 дахь хэсэгт"...хууль зүйн дээд боловсролтой, ...иргэнийг бусад шүүхийн шүүгчээр томилж болно" гэсэн заалтад нийцээгүй байна гэсэн ажлын хэсгийн дүгнэлтийг ЕТГ зүйтэй байна гэж үзэж, энэ асуудлыг Ерөнхийлөгчид танилцуулсан байна.
Иймд хууль ноцтой зөрчсөн энэ асуудлын талаар Шүүхийн ерөнхий зөвлөл, шүүгч нарт мэдэгдэн шалгалт хийж, дүнг хуралдаанаараа хянан хэлэлцэж, энэ асуудлыг хэрхэн шийдвэрлэх тухай саналаа,30 хоногийн дотор ЕТГ-т ирүүлэхийг мэдэгдсэн албан бичгийг Ерөнхий шүүгч С.Батдэлгэрт, ЕТГ-аас илгээсэн байна.
Монгол Улсын Ерөнхийлөгчийн Тамгын газраас УДШ-ийн Ерөнхий шүүгч, ШЕЗ-ийн дарга С.Батдэлгэрт албан бичиг илгээв
